ᐊᐅᒃᑯᑦ ᑎᒡᓕᕐᓂᖓ ᖁᕝᕙᓯᓗᐊᖅᑐᖅ ᖃᓪᓗᓈᑐᑦ ᕼᐊᐃᐳᑕᓐᓴᓐ ᑎᒡᓕᕐᓂᖅ ᖁᕝᕙᓯᓗᐊᓕᖅᐸᑦ, ᐊᐅᒃ ᑕᖃᕐᔪᐊᒧᑦ ᐊᒃᑐᐃᖕᒪᑦ (ᐊᐅᒃ ᐃᖏᕐᕋᕕᒋᔮᒍᑦ) ᓱᒃᑲᓴᓗᐊᓕᒧᑦ ᑕᖃᒥᒃ ᓱᕋᐃᔪᓐᓇᕐᒪᑦ. ᓱᕋᐃᓐᓂᕈᕕᓪᓕ ᑕᐃᒪ ᐅᖅᓱᕐᒧᑦ ᓯᒥᒍᓐᓇᖅᓯᓲᖑᕗᖅ ᑕᖃᕐᔪᐊᖅ. ᑕᖃᐃᓪᓕ ᓯᒥᒃᐸᑕ, ᑎᒦᓪᓗ ᓱᓇᒃᑯᑖᖏᓪᓗ ᐊᐅᒃᑖᕐᓂᑭᓐᓂᖅᓴᐅᓂᐊᖅᐳᑦ. ᑎᒥᐅᑉ ᐊᐅᓚᔾᔪᑎᖏᓪᓕ ᐱᐅᔪᓐᓃᕈᓐᓇᖅᑐᑦ ᓲᕐᓗ ᑕᖅᑑᒃᑭᒃ, ᖃᕋᓴᐃᑦ, ᐊᒻᒪ ᐆᒻᒪᑏᑦ.
ᐅᓪᓘᑎᓪᓗᒍ, ᐊᐅᒃ ᑎᓪᓕᕐᓂᖓ ᖁᕝᕙᓲᖅ ᐊᑦᑎᒃᓯᒃᑲᓂᖅᐸᒃᖢᓂᓗ. ᕿᓚᒥᐅᒐᓗᐊᖅ ᑎᒡᓕᕐᓂᖅ ᖁᕝᕙᓯᓚᐅᑲᒍᓐᓇᓲᖅ ᓂᙵᐅᒪᒍᕕᑦ, ᖁᕕᐊᑦᑕᒃᑐᐊᓘᒍᕕᑦ ᐅᕝᕙᓘᓃᑦ ᐃᖃᐃᓕᓴᖅᑎᓪᓗᑎᑦ.
ᐃᓚᖏᓪᓕ ᑎᒡᓕᕐᓂᖏᑦ ᖁᕝᕙᓯᓗᐊᖅᑐᑦ ᖃᐅᔨᓴᕈᓐᓇᓲᖑᔪᑦ ᐊᖏᕐᕋᖅᓯᒪᓪᓗᑎᒃ.
ᑎᒡᓕᕐᓂᖅ ᖁᕝᕙᓯᓗᐊᖅᐸᑦ ᖃᐅᔨᒪᔾᔪᑏᑦ
ᑎᒡᓕᕐᓂᖅ ᖁᕝᕙᓯᓗᐊᕋᓗᐊᖅᐸᑦ ᓇᓗᓇᓲᖑᔪᖅ ᖃᐅᔨᔾᔪᑎᖃᙱᒻᒪᓐ.
ᖁᕝᕙᓯᒃᑐᐊᓘᑎᓪᓗᒍᓕ, ᓂᐊᖁᕐᓕᖓᔾᔪᑕᐅᓲᖅ, ᑕᐅᑐᑦᑎᐊᕈᓐᓃᖅᖢᑎᒃ, ᒥᕆᐊᙳᑲᑕᒃᖢᑎᒃ, ᐊᒻᒪ ᒥᕆᐊᖅᓴᑲᑕᒃᖢᑎᒃ. ᑕᒪᓐᓇ ᑐᐊᕕᕐᓇᖅᑐᖅ ᐋᓐᓂᐊᓯᐅᖅᑎᒧᐊᑲᐅᑎᒋᔭᕆᐊᓕᒃ. ᑕᒪᒃᑯᐊ ᐊᑐᖃᑦᑕᕈᕕᒋᑦ ᑎᒡᓕᕐᓃᓪᓗ ᖁᕝᕙᓯᓗᐊᖅᐸᑦ, ᐋᓐᓂᐊᕐᕕᓕᐊᕐᓗᑎᑦ ᐅᕝᕙᓘᓃᑦ ᑐᐊᕕᕐᓇᖅᑐᓕᕆᔨᓄᑦ ᐅᖄᓚᓗᑎᑦ.
ᐊᑲᐅᔪᑦ ᑎᒥᒧᑦ ᓂᕈᐊᕆᖔᕈᓐᓇᖅᑕᑎᑦ ᑎᒡᓕᕐᓃᑦ ᑲᒪᒋᓂᐊᕋᕕᐅᒃ
- ᖁᐃᒃᑎᓗᐊᖅᑕᐃᓕᒪᓗᑎᑦ ᐅᖁᒪᐃᓐᓂᕆᔭᐃᑦ ᐃᒃᐱᒋᓗᒍ
- ᑕᕆᐅᓕᖅᐸᙱᓪᓗᑎᑦ ᐊᒻᒪ ᑕᕆᐅᖃᖅᑐᓂᒃ ᐱᓗᐊᖅᑕᐃᓕᒪᓗᑎᑦ. ᓄᓇᒥᖔᖅᑐᓂᒃ ᓂᕿᑐᖃᑦᑕᕐᓗᑎᑦ, ᓂᕿᑦᑎᐊᕙᖕᓂᓘᓃᑦ ᓂᐅᕕᖅᑕᐅᔪᕕᓂᕐᓂᒃ. ᐊᑐᕈᓐᓇᖅᑕᐃᑦ ᓄᓇᕗᒻᒥ ᓂᕿᑦᑎᐊᕙᐃᑦ ᓇᓗᓇᐃᖅᓯᔾᔪᑎᖓ ᓇᓗᓇᐃᖅᓯᔾᔪᑎᖓᑎᒥᖕᓄᑦ ᐱᐅᔪᓂᒃ ᓂᕆᖃᑦᑕᕐᓗᑎᑦ.
- ᐆᒻᒪᕆᖕᓂᖅ ᖃᐅᑕᒫᖅ ᐅᕝᕙᓘᓃᑦ ᖃᐅᑕᒫᑲᓴᑦᑎᐊᖅ
- ᓱᐴᖅᑐᖃᑦᑕᙱᑉᐹᓪᓕᕐᓗᑎᑦ ᓄᖅᑲᕐᓗᑎᓪᓘᓃᑦ. ᐃᑲᔪᖅᑕᐅᓂᐊᕋᕕᑦ, ᐋᓐᓂᐊᓯᐅᖅᑎᒧᑦ ᐅᖃᕐᓗᑎᑦ, ᖃᕋᓴᐅᔭᒃᑯᓪᓘᓃᑦ [ nuquits.ca/iu ],ᓄᓇᕗᒻᒥᓘᓃᑦ ᓄᖅᑲᕈᒪᓂᕐᒧᑦ ᐅᖄᓚᕝᕕᒃ ᐅᓇ 1-866-368-7848-ᒧᑦ ᐅᖄᓚᓗᑎᑦ.
- ᒪᓕᒃᐸᒡᓗᒍ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᒥᖃᑦᑕᕐᓗᓂ ᖃᐅᔨᒪᔾᔪᑎᐅᔪᖅ
- ᐊᕐᕌᒍᑕᒫᖅ ᐋᓐᓂᐊᕐᕕᖕᒧᑦ ᖃᐅᔨᓴᖅᑕᐅᕙᒡᓗᑎᑦ ᑎᒥᓕᒫᑯᑦ ᐊᒻᒪ ᖃᐅᔨᓴᕈᑕᐅᔭᕆᐊᖃᓲᑦ ᐊᑐᖁᔭᐅᔪᑦ ᐊᑐᖅᐸᒡᓗᒋᑦ ᐋᓐᓂᐊᓯᐅᖅᑎᕕᑦ ᐅᖃᐅᓯᕆᔭᖏᑦ. ᖃᓄᐃᑦᑐᓂᒃ ᐃᓅᓕᓴᐅᑎᓂᒃ ᐊᑐᓪᓗᐊᕐᒪᖔᖅᐱᑦ ᐅᖃᐅᑎᔪᓐᓇᕐᒫᑎᑦ ᐱᔪᓐᓇᖅᑕᕐᓂᒃ.
ᐃᑲᔫᑎᔅᓴᑦ:
ᐊᐅᒃ ᑎᒡᓕᕐᓂᖓ ᖁᕝᕙᓯᓗᐊᖅᑐᖅ (ᓂᕿᑦᓯᐊᕙᓕᕆᓂᖅ)
