ᖁᐱᕐᕈᐊᕐᔪᐃᑦ ᐃᓅᓕᓴᐅᑎᓄᑦ ᒪᒥᓴᒐᒃᓴᐅᖏᑦᑐᓄᑦ ᓴᐅᓂᙳᓇᖅ ᐱᔾᔪᑕᐅᕗᖅ ᐊᐃᑦᑐᐃᕙᒃᖢᓂᓗ ᐃᓄᖕᒥᒃ ᐃᓄᖕᒧᑦ. ᐅᑭᐅᒃᑯᑦ ᓴᐅᓂᙳᓇᒐᔪᒃᐳᖅ. ᓴᐅᓂᙳᓇᖅ ᓇᓗᓕᕈᑕᐅᒐᔪᒃᐳᖅ ᓄᕙᖕᓂᕐᒧᑦ, ᑭᓯᐊᓂᓕ ᓴᐅᓂᙳᓂᖅ ᖃᓂᒪᓇᕐᓂᖅᓴᐅᕗᖅ. ᐋᓐᓂᐊᕐᓂᕐᒧᑦ ᓇᓗᓇᐃᖅᑕᐅᔾᔪᑏᑦ ᓴᖅᑭᓴᕋᐃᓐᓂᖅᓴᐅᕗᑦ ᓄᕙᖕᓂᕐᒥᑦ.
ᐅᓪᓗᓄᑦ ᖁᓕᓄᑦ (10) ᓴᐅᓂᙳᓂᖃᕈᓐᓇᖅᐳᖅ. ᓄᑕᖅᑲᓄᑦ, ᐃᓐᓇᑐᖃᕐᓄᑦ ᐃᓄᖕᓄᓪᓗ ᐋᓐᓂᐊᑯᑖᒃᑐᓄᑦ ᐊᑦᑕᕐᓇᕈᓐᓇᖅᑐᖅ.
ᓇᓗᓇᐃᖅᑕᐅᔾᔪᑏᑦ ᓴᐅᓂᙳᓂᕐᒧᑦ
ᖃᓂᒪᔪᐊᓘᖅᑰᔨᓇᖅᑐᖅ ᓴᐅᓂᙳᓂᖃᖅᑐᒧᑦ ᓇᓗᓇᐃᖅᑕᐅᔾᔪᑏᑦ ᐱᖃᓯᐅᑎᕗᑦ:
- ᐆᑎᕐᓇᕐᓗᑎᒃ
- ᐆᓕᑲᑕᖕᓂᖅ ᖄᓕᖅᑭᑲᑕᖕᓂᕐᓗ
- ᑎᒥᒃᑯᑦ ᓄᑭᒃᑯᓪᓗ ᐋᓐᓂᐊᕐᓂᖅ
- ᓂᐊᖁᙳᓂᖅ
- ᑕᖃᓴᕋᐃᓐᓂᖅ ᓄᑭᑭᓐᓂᕐᓗ
ᓴᐅᓂᙳᓇᖅᑖᖅᑕᕿᓕᓂᖅ
ᓴᐅᓂᙳᓇᕐᒧᑦ ᐋᓐᓂᕇᒃᑯᓯᖅᑕᐅᓯᒪᓂᖅ: ᐋᓐᓂᐊᕇᒃᑯᓯᖅᑕᐅᓯᒪᓂᖅ ᐊᕐᕌᒍᑕᒫᑦ ᓴᐅᓂᙳᓇᕐᒧᑦ ᐊᐃᑦᑐᖅᑕᐅᖏᑉᐹᓕᕈᑕᐅᔪᓐᓇᖅᐳᖅ. ᓴᐅᓂᙳᓇᐅᑎᓪᓗᒍ ᐊᑭᖃᖏᑦᑐᓂᒃ ᓄᓇᓖᑦ ᓄᓇᕗᒻᒥ ᐋᓐᓂᐊᕇᒃᑯᓯᖅᓯᖃᑦᑕᖅᐳᑦ. ᑕᑯᒋᐊᖁᔪᖅ ᐃᑭᐊᖅᑭᕕᒃ (www.flunu.ca) ᐃᓕᕝᕕᒋᒃᑲᓐᓂᕐᓗᒍ ᐱᓕᕆᐊᖑᔪᖅ ᓄᓇᓕᖕᓂᑦ.
ᐅᑭᐊᒃᓵᑕᒫᑦ ᐋᓐᓂᐊᕇᒃᑯᓯᖅᑕᐅᔪᓐᓇᖅᐳᑦ ᐃᓄᓕᒫᑦ ᑭᑭᓪᓗᒋᑦ ᓄᑕᖅᑲᑦ 6 ᑐᖔᓂᑦ ᑕᖅᑭᓖᑦ. ᐋᓐᓂᐊᕇᒃᑯᓯᖅᑕᐅᔪᐃᓇᐅᖁᔪᒥᓇᖅᐳᑦ ᐃᓄᓕᒫᑦ ᓄᑕᖅᑲᑦ 6 ᑐᖔᓂᑦ ᑕᖅᑭᓖᑦ ᑭᑭᓪᓗᒋᑦ ᐊᑦᑕᕐᓇᙱᒃᑭᓪᓗᓂᓗ ᐃᓐᓇᑐᖃᕐᓄᑦ 65 ᐅᖓᑖᓐᓄᓪᓗ ᐊᕐᕌᒍᓕᖕᓄᑦ, ᐳᕙᒡᓗᒃᑐᓄᑦ, ᐆᒻᒪᑎᕐᓗᒃᑐᓄᑦ ᐅᕝᕙᓘᓐᓃᑦ ᑎᒥᒥᒍᑦ ᓱᑲᖃᓗᐊᓕᖅᐸᒃᑐᓄᑦ.
ᐅᓗᕆᐊᓇᖅᑐᖅ ᒥᒃᖠᕚᓪᓕᖅᑎᑦᑐᓇᕆᕗᖅ ᐊᓯᖔᖓᒍᑦ:
- ᐊᒡᒐᑎ ᐅᐊᓴᕋᔪᒡᓗᒋᑦ ᐅᐊᓴᐅᒻᒧᑦ ᐃᒥᕐᒧᓪᓗ, ᐅᕝᕙᓘᓐᓃᑦ ᐊᓪᑲᕼᐋᖃᖅᑐᒧᑦ ᐊᒡᒐᖕᒧᑦ ᓴᓗᒻᒪᖅᓴᐅᑎ.
- ᑎᒦᑦ ᐃᑲᔪᕐᓗᒍ ᓱᕈᖅᑎᑦᑕᐅᓕᒪᓗᒍ − ᓂᕿᑦᑎᐊᕙᒃᑐᖅᐸᒡᓗᓂ , ᑕᖃᐃᖅᓯᑦᑎᐊᖅᐸᒡᓗᓂ, ᐃᖃᐃᓕᓴᖅᐸᒡᓗᓂᓗ.
- ᐊᒡᒑᑭᒃ ᖃᓂᕐᓄᐊᖅᐸᖏᓪᓗᒋᑦ, ᐃᔨᖕᓄᐊᖅᐸᖏᓪᓗᒋᒃ ᓱᕐᓗᖕᓄᐊᖅᐸᖏᓪᓗᒋᓪᓗ.
- ᖃᓃᑦ ᓱᕐᓗᐃᓪᓗ ᓯᒥᒃᐸᒡᓗᒋᑦ ᖁᐃᖅᓱᓕᕌᖓᕕᑦ ᑕᒋᐅᒃᓴᓕᕌᖓᕕᓪᓗ. ᑲᒃᑭᐅᑎᒃᓴᒥᑦ ᐱᖃᕈᕕᑦ ᐊᑐᕐᓗᒍ, ᐃᒋᓕᕐᒥᓗᒍ. ᑲᒃᑭᐅᑎᒃᓴᖃᙱᒃᑯᕕᑦ ᑕᓖᑦ ᐊᑐᕐᓗᒍ.
- ᓯᒡᒐᓕᐊᖅᑐᙱᓐᓂᓴᐅᓗᑎᑦ ᓄᖃᕐᓗᑎᓪᓘᓐᓃᑦ ᓱᐴᖅᑐᖅᑐᖃᖅᑎᓪᓗᒍ ᐳᔪᖓᓃᑦᑕᐃᓕᒪᓗᑎᑦ, ᐊᔪᕐᓇᙱᒃᑳᖓᑦ.
ᓴᐅᓂᙳᓂᖅ ᑲᒪᒋᓗᒍ
- ᑕᖃᐃᖅᓯᑎᐊᕐᓂᖅ.
- ᐃᒥᑲᑕᐃᓐᓇᕐᓗᑎᑦ − ᐃᒥᑐᐃᓐᓇᕐᒥ (ᐆᓇᖅᑐᒥ ᓂᒡᓕᓇᖅᑐᒥᓪᓘᓐᓃᑦ), ᑏ, ᖃᔪᕐᓂᓪᓗ.
- ᑲᒃᑭᐅᑎᓂᒃ ᐃᒡᒋᑦᑐᓐᓇᖅᑐᓂᒃ ᐊᑐᕐᓗᑎᑦ.
- ᐱᔭᕆᐊᖃᖅᐸᑦ, ᓄᕙᒃᑐᓯᐅᑎᓂᒃ ᐃᖢᐊᖅᓴᐅᑎᓂᒃ ᐱᕙᒡᓗᓂᑎᑦ. ᒪᓕᑦᑎᐊᖅᐸᓗᒋᑦ ᓇᓗᓇᐃᔭᐃᔾᔪᑏᑦ. ᐄᔭᒃᑲᑦ ᐊᒃᑐᐃᓂᖃᕈᓇᕐᒪᑕ ᐱᓗᐊᕐᓗᒋᑦ.
- ᓂᐊᖁᖅᓯᐅᒻᒥᒃ (ᐋᔅᐳᕆᓐ) 20−ᐅᑉ ᑐᖔᓂᑦᐊᕐᕌᒍᓕᓄᑦ ᐱᑎᑦᑎᑕᐃᓕᓗᑎᑦ. ᐊᒃᑐᐊᓂᖃᕐᒪᑦ Reye syndrome, ᐋᓐᓂᐊᓕᕐᔪᐊᖑᔪᖅ ᑎᖑᖕᒧᑦ ᖃᕋᓴᒧᓪᓗ ᐊᒃᑐᐃᓂᖃᖅᑐᖅ.
ᓴᐅᓂᙳᓂᖅ ᓇᖕᒥᓂᖅ ᐄᔭᒃᑲᓅᙱᒃᑲᓗᐊᕐᓗᓂ ᒪᒥᑦᑐᓐᓇᖅᑐᖅ. ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᐸᑎ ᓱᓕ ᓴᐅᓂᙳᑲᑕᒃᑯᕕᑦ ᐋᓐᓂᐊᕕᓕᐊᖁᔪᖅ.
