ᐳᕙᒡᓗᖕᓂᖅ ᐋᓐᓂᐊᖑᔪᖅ ᖁᐱᕐᕈᒧᑦ ᐱᒋᐊᓲᖅ ᑖᒃᑯᐊᓗ ᐊᐃᑦᑐᕐᓘᑕᐅᔪᓐᓇᖅᖢᑎᒃ ᐃᓄᖕᒥᒃ ᐊᓯᐊᓄᑦ ᐃᓄᖕᒧᑦ ᐊᓂᖅᓵᕐᓂᒃᑯᑦ. ᐳᕙᒡᓗᖕᓂᖅ ᐆᒻᒪᐅᔪᓐᓇᖅᑐᖅ ᐅᕝᕙᓘᓃᑦ ᐆᒻᒪᐅᙱᑦᑐᓐᓇᕆᓪᓗᓂ. ᐳᕙᒡᓗᒃᑐᖃᖅᑎᓪᓗᒍ ᐆᒻᒪᐅᔪᒥᒃ, ᐊᒃᑐᐃᓂᖃᓲᖅ ᐳᕙᖕᓂᒃ ᑭᓯᐊᓂᑦᑕᐅᖅ ᐊᓯᖏᓐᓂᒃ ᐊᒃᑐᐃᔪᓐᓇᕐᒥᖕᒪᑦ ᓲᕐᓗ ᖃᕋᓴᕐᒥᒃ, ᑕᖅᑑᖕᓂᒃ ᐅᕝᕙᓘᓃᑦ ᕿᒥᕐᓗᖕᒥᒃ. ᐳᕙᒡᓗᒃᑐᑦ ᒪᒥᑕᐅᔪᓐᓇᓲᑦ ᐃᓅᓕᓴᐅᑎᓄᑦ. ᐃᓅᓕᓴᐅᑎᓄᑦ ᒪᒥᓴᖅᑕᐅᖏᒃᑯᓂᓕ, ᐃᓅᓯᕐᒧᑦ ᐅᓗᕆᐊᓇᕈᓐᓇᖅᑐᖅ.
ᖃᓄᖅ ᐊᔾᔨᒌᖏᓐᓂᖃᕐᒪᑕ ᐆᒻᒪᐅᔪᒥᒃ ᐳᕙᒡᓗᖕᓂᖅ ᐊᒻᒪ ᐆᒻᒪᐅᖏᑦᑐᒥᒃ ᐋᓐᓂᐊᖃᕐᓂᖅ ᐳᕙᒃᑯᑦ?
ᐳᕙᒡᓗᒃᖢᓂ ᐆᒻᒪᐅᔪᒥᒃ ᑎᒥᒧᑦ ᐋᓐᓂᐊᕐᓇᖅᑐᖅ. ᐳᕙᒡᓗᒃᖢᓂ ᐊᒃᑐᐃᓲᖑᔪᖅ ᐳᕙᖕᓂᒃ, ᐃᓛᓐᓂ ᖃᕋᓴᕐᒥᒃ, ᕿᒥᕐᓗᖕᒥᒃ, ᐊᓯᖏᓐᓂᓘᓃᑦ ᑎᒥᒥᒃ ᐋᓐᓂᐊᓕᕐᓇᓲᖅ. ᐆᒻᒪᐅᒍᓂ ᐳᕙᒡᓗᖕᓂᖅ, ᐊᓯᖏᓐᓄᑦ ᐃᓄᖕᓄᑦ ᐊᐃᑦᑐᕐᓘᑕᐅᔪᓐᓇᖅᑐᖅ.
ᐆᒻᒪᐅᙱᑦᑐᒥᒃ ᐳᕙᒡᓗᒃᖢᓂ ᑐᑭᖃᖅᑐᖅ ᖁᐱᕐᕈᐃᑦ ᑎᒥᖕᓃᑦᑑᒐᓗᐊᑦ ᑭᓯᐊᓂ ᐆᒻᒪᐅᙱᖦᖢᑎᒃ ᐱᕈᖅᐸᓪᓕᐊᙱᖦᖢᑎᒡᓗ. ᐋᓐᓂᐊᖅᑰᔨᔾᔮᙱᑦᑐᑎᑦ ᐊᒻᒪ ᐊᐃᑦᑐᕐᓗᒍᓐᓇᙱᖦᖢᒋᑦ ᐳᕙᒡᓗᖕᓃᑦ ᐊᓯᖕᓄᑦ.
ᐆᒻᒪᐅᔪᒥᒃ ᐳᕙᒡᓗᒃᑐᑦ ᐃᒪᐃᓲᖑᔪᑦ:
- ᖁᐃᖅᓱᕐᓗᓂ ᐱᓇᓱᐊᕈᓰᑦ ᐱᖓᓱᑦ ᐅᖓᑖᓄᑦ
- ᐆᑎᕐᓇᕐᓂᖅ ᐊᒻᒪ ᐅᓐᓄᐊᒃᑯᑦ ᐊᐅᒪᔾᔭᖃᑦᑕᕐᓂᖅ
- ᓂᕿᓂᒃ ᐃᒃᖠᒍᓱᒍᓐᓃᕐᓂᖅ ᐅᕝᕙᓘᓐᓃᑦ ᓴᓗᒃᑎᑉᐸᓪᓕᐊᓂᖅ
- ᐊᐅᖃᖅᑐᒥ ᖁᐃᖅᓱᕐᓂᖅ
- ᑕᖃᖓᐃᓐᓇᕐᓂᖅᓴᐅᖅᑰᔨᓂᖅ
ᐋᓐᓂᐊᕈᑎᖃᙱᒃᑲᓗᐊᕈᕕᑦ ᐳᕙᒡᓗᑐᐃᓐᓇᕆᐊᖃᖅᑐᑎᑦ. ᐱᒻᒪᕆᐅᔪᖅ ᐳᕙᒡᓗᖕᒪᖔᖅᐱᑦ ᖃᐅᔨᓴᖅᑕᐅᒋᐊᒃᓴᖅ ᐋᓐᓂᐊᕐᕕᖕᒥ.
ᐳᕙᒡᓗᓕᖅᑕᐃᓕᒪᓂᖅ
ᖃᓄᖅ ᐳᕙᒡᓗᖕᓇᖅ ᐊᐃᑦᑐᕐᓘᑕᐅᕙᒃᐸ?
ᐳᕙᒡᓗᖕᓇᖅᑐᑦ ᐋᓐᓂᐊᖑᔪᑦ ᐊᐃᑦᑐᕐᓘᑕᐅᔪᓐᓇᖅᑐᑦ ᐊᓂᖅᑎᕆᓂᒃᑯᑦ ᐃᓄᖕᒥᑦ ᐃᓄᖕᒧᑦ. ᑭᓇᑐᐃᓐᓇᖅ ᐋᓐᓂᐊᕈᓂ ᐳᕙᖓᒍᑦ, ᐊᐃᑦᑐᕐᓗᐃᔪᓐᓇᖅᑐᑦ ᐋᓐᓂᐊᒥᒃ ᖁᐃᖅᓱᕐᓗᑎᒃ, ᑕᒋᐅᒡᓗᑎᒃ, ᐅᕝᕙᓘᓐᓃᑦ ᐃᙱᕐᓗᑎᑦ ᐊᒻᒪ ᐃᓛᓐᓂᒃᑯᑦ ᐅᖃᓪᓚᑐᐃᓐᓇᕐᓗᑎᒃ.
ᓯᐊᒻᒪᒍᓐᓇᖅᑐᒥᑦ ᐅᕝᕙᓘᓐᓃᑦ ᓯᐊᒻᒪᒍᓐᓇᙱᑦᑐᒥᑦ ᐳᕙᒡᓗᓕᕈᓐᓇᙱᑦᑐᑎᑦ ᐅᑯᓇᙵᑦ:
- ᐹ ᑎᒍᒻᒥᕕᖏᓐᓂᒃ ᐊᒃᑐᖅᓯᓗᑎᑦ
- ᑎᒎᑎᖃᑎᖃᕐᓂᒃᑯᑦ
- ᐃᒥᐅᑎᓂᒃ ᑕᐅᖅᓰᖃᑦᑕᕐᓗᓂ ᐊᑕᐅᓰᓐᓇᕐᓂᒡᓘᓃᑦ ᐃᒥᐅᑎᖃᕐᓂᒃᑯᑦ
- ᐊᓐᓄᕌᒥᒃ ᐊᑐᖅᑐᐃᓐᓇᐅᖃᑦᑕᕐᓂᖅ
- ᐃᕿᑦᑎᓂᒃᑯᑦ
ᖃᓄᕐᓕ ᐊᐃᑦᑐᕐᓗᒃᑕᐅᑦᑕᐃᓕᔪᓐᓇᕋᒪ?
ᖃᓂᒋᓗᐊᖃᑦᑕᙱᓪᓗᒋᑦ ᐊᒻᒪ ᖃᓂᒃᓴᐃᓐᓇᓗᐊᖃᑦᑕᙱᓪᓗᑎᑦ ᐅᑯᓂᖓ ᖃᓂᒪᔾᔪᑎᓕᖕᓂᒃ:
- ᖁᐃᖅᓱᖃᑦᑕᖅᑐᒥᒃ ᐱᓇᓱᐊᕈᓰᑦ ᐱᖓᓱᑦ ᐅᖓᑖᓂ ᐊᐅᖕᒥᒡᓘᓃᑦ ᖁᐃᖅᓱᖃᑦᑕᖅᐸᑦ
- ᑕᖃᖓᐃᓐᓇᕐᓂᖅᓴᐅᖅᑰᔨᓂᖅ
- ᓂᕆᔪᒪᑦᑎᐊᖃᑦᑕᕈᓐᓃᕐᓗᓂ ᐅᕝᕙᓘᓐᓃᑦ ᓴᓗᒃᑎᑉᐸᓪᓕᐊᓂᖅ
- ᐆᑎᕐᓇᑲᑕᒡᓗᓂ ᐅᕝᕙᓘᓐᓃᑦ ᐅᓐᓄᐊᒃᑯᑦ ᐊᐅᒪᔾᔭᖃᑦᑕᕐᓗᓂ
ᐃᓄᐃᑦ ᐅᑯᓂᖓ ᐊᔪᕐᓇᙱᑦᑐᓂᒃ ᐱᓕᕆᖃᑦᑕᕆᐊᖃᕆᕗᑦ ᖃᓄᐃᙱᑦᑎᐊᖏᓐᓇᖁᓪᓗᒋᑦ:
- ᐊᒡᒐᑎᑦ ᐅᐊᓴᖅᐸᒡᓗᒋᑦ ᐅᐊᓴᒐᔪᒡᓗᒋᓪᓗ
- ᖁᐃᖅᓱᕌᖓᕕᑦ ᐃᑯᓯᖕᓄᑦ ᖁᐃᖅᓱᖅᐸᒡᓗᑎᑦ ᑲᒃᑭᐅᑎᒃᓴᒧᓪᓘᓃᑦ
- ᐊᖏᕐᕋᖅᓯᒪᐃᓐᓇᕐᓗᑎᑦ ᐊᒻᒪ ᓄᓇᓕᖕᓂ ᖃᓄᐃᓕᐅᖅᑎᑦᑎᔪᓄᑦ ᐅᐸᒍᑎᑲᑕᙱᓪᓗᑎᑦ ᐃᓄᒋᐊᓄᐊᑲᑕᙱᓪᓗᑎᓪᓗ.
- ᓱᐴᖅᑐᖃᑦᑕᕈᓐᓃᖅᐹᓪᓕᕐᓗᑎᑦ ᐅᕝᕙᓘᓃᑦ ᓄᖅᑲᕐᓗᑎᑦ. ᐃᑲᔪᖅᑕᐅᓂᐊᕋᕕᑦ, ᐋᓐᓂᐊᓯᐅᖅᑎᒧᑦ ᐅᖃᕐᓗᑎᑦ, ᖃᕋᓴᐅᔭᒃᑯᓪᓘᓃᑦ [ nuquits.ca/iu ],ᓄᓇᕗᒻᒥᓘᓃᑦ ᓄᖅᑲᕈᒪᓂᕐᒧᑦ ᐅᖄᓚᕝᕕᒃ ᐅᓇ 1-866-368-7848-ᒧᑦ ᐅᖄᓚᓗᑎᑦ.
- ᒪᓕᒃᐸᒡᓗᒍ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᒥᖃᑦᑕᕐᓗᓂ ᖃᐅᔨᒪᔾᔪᑎᐅᔪᖅ
- ᓄᓇᒥᖔᖅᑐᓂᒃ ᓂᕿᑐᖃᑦᑕᕐᓗᑎᑦ, ᓂᕿᑦᑎᐊᕙᖕᓂᓘᓃᑦ ᓂᐅᕕᖅᑕᐅᔪᕕᓂᕐᓂᒃ. ᐊᑐᕈᓐᓇᖅᑕᐃᑦ ᓄᓇᕗᒻᒥ ᓂᕿᑦᑎᐊᕙᐃᑦ ᓇᓗᓇᐃᖅᓯᔾᔪᑎᖓᓇᓗᓇᐃᖅᓯᔾᔪᑎᖓᑎᒥᖕᓄᑦ ᐱᐅᔪᓂᒃ ᓂᕆᖃᑦᑕᕐᓗᑎᑦ.
ᐊᐃᑦᑐᕐᓗᐃᑦᑕᐃᓕᒪᓂᕐᒧᑦ ᐳᕙᒡᓗᖕᓇᕐᓂᕐᒥ ᖃᑕᙳᑎᒌᓄᑦ, ᐱᖃᓐᓇᕆᔭᕐᓄᑦ ᐊᒻᒪ ᓄᓇᓕᖕᒥᐅᓄᑦ ᑭᒃᑯᑐᐃᓐᓇᐃᑦ ᐃᓚᐅᖁᔭᐅᕗᑦ ᖃᐅᔨᓴᖅᑕᐅᓂᕐᒧᑦ.
ᑭᒃᑯᑦ ᐳᕙᒡᓗᖕᓇᒧᑦ ᐊᐃᑦᑐᕐᓗᒃᑕᐅᑐᐃᓐᓇᕆᐊᖃᖅᐸᑦ?
ᐅᑯᐊ ᐳᕙᒡᓗᖕᓇᒧᑦ ᐊᐃᑦᑐᕐᓗᒃᑕᐅᑐᐃᓐᓇᕆᐊᖃᕐᓂᖅᐹᖑᔪᑦ:
- ᐃᓄᒋᐊᓗᐊᖅᑐᒥᑦ ᐃᒡᓗᒥᐅᖃᑎᒌᖑᔪᑦ
- ᓂᕆᑦᑎᐊᖃᑦᑕᙱᑦᑐᑦ
- ᑐᖔᓂᑦ 5 ᐅᑭᐅᓖᑦ
- ᐃᓐᓇᑐᖃᐃᑦ
- ᐊᓐᓇᐅᒪᔾᔪᑎᖃᑦᑎᐊᕈᓐᓃᖅᑐᑦ ᐅᕝᕙᓘᓐᓃᑦ ᐋᓐᓂᐊᒃᑯᑖᒃᑐᑦ ᓲᕐᓗ ᑎᒥᖓ ᓱᑲᖃᓗᐊᕐᓗᓂ, ᑎᒥᐅᑉ ᐊᓐᓇᐅᒪᔾᔪᑎᖏᑦ ᓴᙲᑦᑑᓂᖅᓴᐃᑦ ᐅᕝᕙᓘᓐᓃᑦ ᓯᐊᒻᒪᔭᑦᑐᒥᒃ ᐋᓐᓂᐊᖃᓕᕐᑐᑦ
- ᐊᑯᓂᐊᓗᒃ ᖃᓂᒃᓴᖃᑦᑕᕐᓗᓂ ᐳᕙᒡᓗᒃᑐᒥᒃ ᐊᒻᒪ ᐃᒡᓗ ᓇᔪᖅᑕᖓ ᐊᓐᓂᐊᕝᕕᖃᑦᑎᐊᖏᓗᐊᕐᓂᖅᐸᑦ
- ᐳᕙᒡᓗᖕᓇᒧᑦ ᐊᐃᑦᑐᕐᓗᒃᑕᐅᓚᐅᖅᓯᒪᓗᓂ ᐊᕐᕌᒍᓂ ᒪᕐᕉᖕᓂᒃ ᐊᓂᒍᖅᑐᓂᑦ ᑲᒪᒋᔭᐅᓚᐅᖅᓯᒪᙱᓪᓗᓂᓗ.
ᐃᓅᓕᓴᖅᑕᐅᓂᖅ
ᐳᕙᒡᓗᖕᓇᖅ ᐱᔪᓐᓃᖅᑎᑕᐅᔪᓐᓇᖅᐸ?
ᐄ, ᐳᕙᒡᓗᖕᓇᖅ ᒪᒥᑕᐅᔪᓐᓇᖅᑐᖅ ᐃᓅᓕᓴᐅᑎᓄᑦ.
ᐆᒻᒪᕐᒥᒃ ᐳᕙᒡᓗᒡᓗᓂ:
- ᖃᔅᓯᑲᓪᓚᖕᓂ ᐄᔭᒐᖃᑦᑕᕆᐊᖃᕐᓂᐊᖅᑐᑦ ᐳᕙᒡᓗᖕᓂᕆᔭᖓ ᐆᒻᒪᐅᑐᐊᖅᐸᑦ
- ᐄᔭᒐᕋᔭᕐᓗᑎᑦ 6-ᓂ 9−ᓄᑦ ᑕᖅᑭᓄᑦ ᐅᕝᕙᓘᓐᓃᑦ ᐃᓚᖏᓐᓄᑦ ᐊᑯᓂᐅᓂᖅᓴᒥ.
- ᐄᔭᒐᖅᑕᐃᑦ ᐊᑐᓕᓚᐅᙱᓐᓂᖓᓂ, ᐊᖏᕐᕋᖅᓯᒪᖁᔭᐅᑐᐃᓐᓇᕆᐊᖃᖅᑐᑎᑦ ᐊᐃᑦᑐᕐᓗᐃᖦᖤᕐᓂᐊᕋᕕᑦ ᐊᓯᖕᓂᒃ.
ᐆᒻᒪᐅᙱᑦᑐᒥᒃ ᐳᕙᒡᓗᖕᓂᖅ:
- ᐊᑕᐅᓯᕐᒥ ᒪᕐᕉᖕᓂᒡᓘᓐᓃᑦ ᐄᔭᒐᕐᓗᓂ ᐆᒻᒪᐅᙱᑦᑐᒥᒃ ᐳᕙᒡᓗᖕᓂᕐᓗᓂ ᑲᒪᒋᔭᐅᓐᓇᖅᑐᖅ
- ᐃᓅᓕᓴᐅᑎᓂᒃ ᐄᓯᖃᑦᑕᕆᐊᖃᕐᓂᐊᖅᑐᑎᑦ ᐃᒻᒪᖄ 3-ᓂᒃ 9−ᓄᑦ ᑕᖅᑭᓄᑦ
- ᐊᖏᕐᕋᖅᓯᒪᖁᔭᐅᖏᓐᓇᔾᔮᙱᑦᑐᑎᑦ ᐆᒻᒪᐅᙱᑦᑐᒥᒃ ᐳᕙᒡᓗᖕᓂᕐᒧᑦ ᐄᔭᒐᓕᕈᕕᑦ.
ᑐᓴᖅᑕᐅᔭᕆᐊᖃᓪᓚᕆᒃᑐᖅ ᐳᕙᒡᓗᒃᑐᓄᑦ ᑲᒪᒋᔭᐅᔪᓕᒫᓄᑦ
- ᖃᐅᔨᓴᖅᑕᐅᖃᑦᑕᕐᓂᐊᖅᑐᑎᑦ ᖃᑯᑎᒃᑯᑦ ᑲᒪᒋᔭᐅᑎᓪᓗᑎᑦ.
- ᐄᔭᒐᖅᑖᕆᔭᓕᒫᑎᑦ ᐊᑐᑦᑎᐊᖃᑦᑕᕆᐊᖃᖅᑕᑎᑦ ᐊᑐᖁᔭᐅᔪᑦ ᐳᕙᒡᓗᒃᑐᓄᑦ ᓘᒃᑖᓂᑦ.
- ᐄᔭᒐᑎᑦ ᖃᐅᔨᓴᖅᑕᐅᖃᑦᑕᕆᐊᓖᑦ ᐃᖢᐊᖅᓴᐃᔨᓂᒃ
- ᖁᐊᖅᓵᕐᓇᖅᑐᖅ ᐃᒥᐊᓗᒃᑐᕆᐊᒃᓴᖅ ᐳᕙᒡᓗᒃᑐᖅᓯᐅᑎᓂᒃ ᐄᔭᒐᖃᑦᑕᖅᑎᓪᓗᑎᑦ
- ᖁᐊᖅᓵᕐᓇᖅᑐᖅ ᓂᐊᖁᖅᓯᐅᑎᑐᕆᐊᒃᓴᖅ (ᑕᐃᓚᓈᓪ) ᐳᕙᒡᓗᒃᑐᖅᓯᐅᑎᓂᒃ ᐄᔭᒐᖃᑦᑕᖅᑎᓪᓗᑎᑦ
ᐊᐱᖅᑯᑎᒃᓴᖃᕈᕕᑦ ᐳᕙᒡᓗᖕᓂᐅᑉ ᒥᒃᓵᓄᑦ ᐅᕝᕙᓘᓃᑦ ᖃᐅᔨᓴᖅᑕᐅᔪᒪᒍᕕᑦ, ᐋᓐᓂᐊᕐᕕᓕᐊᕐᓗᑎᑦ.
