ᐳᕙᒃᑯᑦ ᐋᓐᓂᐊᖃᕐᓂᖅ ᓄᓇᕗᒻᒥ ᐋᓐᓂᐊᕆᔭᐅᒐᔪᓛᖑᔪᖅ. ᓱᐴᖅᑐᖃᑦᑕᖅᑐᑦ ᐅᓄᖅᑐᐊᓘᓂᖏᓐᓄᑦ ᓄᓇᕗᒻᒥᐅᑦ ᐋᓐᓂᐊᖃᒐᔪᒃᑑᕗᑦ. ᑕᕝᕚᑭᒥᒃ ᐳᕙᖕᒧᑦ ᓂᐅᖅᓯᖃᑦᑕᖅᖢᓂ ᐳᕙᖕᒧᑦ ᐋᓐᓂᐊᖅᑖᕈᓐᓇᕐᓂᖅᓴᐅᓲᑦ ᐃᓄᐃᑦ.
ᐳᕙᒃᑯᑦ ᐋᓐᓂᐊᖅᑖᖅᖢᓂ ᐱᒋᐊᓲᖅ ᒥᑭᑦᑐᑯᓘᓪᓗᓂ ᐊᒻᒪ ᐃᒃᐱᒋᔭᐅᕙᙱᑦᑎᐊᖅᖢᓂ. ᐋᓐᓂᐊᖑᔪᖅ ᐱᕈᖅᐸᓪᓕᐊᓂᒃᑯᑦ ᐊᖏᒡᓕᕙᓪᓕᐊᑎᓪᓗᒍ ᖃᓄᐃᔾᔪᑏᑦ ᐃᒃᐱᒋᔭᐅᓕᓲᑦ ᓲᕐᓗ ᐊᐅᖕᒥᒃ ᒥᕆᐊᕐᓗᓂ, ᓴᓗᒃᑎᑦᑐᑯᓘᓗᓂ, ᐊᒻᒪ ᐊᓂᕐᓂᑭᑦᑐᑯᓘᓕᕐᓗᓂ. ᐳᕙᒃᑯᑦ ᐋᓐᓂᐊᓖᑦ ᑲᒪᒋᔭᓇᓱᐊᖅᖢᑎᒃ ᐊᒃᓱᕈᕐᓇᖅᑑᔪᖅ ᑲᒪᒋᓇᓱᐊᖅᖢᒍ. ᖃᐅᔨᔾᔪᑕᐅᔪᓐᓇᖅᑐᒥᒃ ᕿᓂᖅᓴᖅᑑᒐᓗᐊᑦ ᐳᕙᒡᓗᒃᑐᖃᕐᒪᖔᑦ ᖃᐅᔨᔾᔪᑎᒥᒃ ᑭᓯᐊᓂᓕ ᓱᓕ ᐊᑐᐃᓐᓇᐅᙱᑦᑐᖅ ᖃᐅᔨᓴᕈᑕᐅᓇᔭᖅᑐᖅ.
ᖃᓄᖅ ᐳᕙᒃᑯᑦ ᐋᓐᓂᐊᖅᑖᙱᑦᑐᓐᓇᕐᒪᖔᖅᐱᑦ:
- ᓱᐴᖅᑐᖃᑦᑕᕈᓐᓃᖅᐹᓪᓕᕐᓗᑎᑦ ᐅᕝᕙᓘᓃᑦ ᓄᖅᑲᕐᓗᑎᑦ. ᐊᑯᓂᐊᓗᒃ ᓱᐴᖅᑐᖅᑎᐅᒐᓗᐊᕈᕕᑦ, ᓄᖅᑲᕐᕈᕕᑦ ᐳᕙᒃᑯᑦ ᐋᓐᓂᐊᖅᑖᖏᑉᐹᓪᓕᕈᓐᓇᖅᑐᑎᑦ. ᑕᐃᒪᓕ ᐳᕙᒃᑯᑦ ᐋᓐᓂᐊᖄᓂᒃᑯᕕᑦ, ᓱᐴᖅᑐᖃᑦᑕᕈᓐᓃᕐᓂᖅ ᑲᒪᒋᔭᐅᓕᕐᓗᓂ ᐳᕙᖕᒧᑦ ᐊᑲᐅᓂᖅᓴᐅᓲᖑᒐᓗᐊᖅ ᐊᒻᒪᓗ ᐊᑯᓂᐅᓂᖅᓴᖅ ᐃᓅᔪᓐᓇᕐᓂᐊᖅᖢᑎᑦ. ᐃᑲᔪᖅᑕᐅᓂᐊᕋᕕᑦ, ᐋᓐᓂᐊᓯᐅᖅᑎᒧᑦ ᐅᖃᕐᓗᑎᑦ, ᖃᕋᓴᐅᔭᒃᑯᓪᓘᓃᑦ [ nuquits.ca/iu ], ᓄᓇᕗᒻᒥᓘᓃᑦ ᓄᖅᑲᕈᒪᓂᕐᒧᑦ ᐅᖄᓚᕝᕕᒃ ᐅᓇ 1-866-368-7848-ᒧᑦ ᐅᖄᓚᓗᑎᑦ.
- ᓄᓇᒥᖔᖅᑐᓂᒃ ᓂᕿᑐᖃᑦᑕᕐᓗᑎᑦ, ᓂᕿᑦᑎᐊᕙᖕᓂᓘᓃᑦ ᓂᐅᕕᖅᑕᐅᔪᕕᓂᕐᓂᒃ. ᐊᑐᕈᓐᓇᖅᑕᐃᑦ ᓄᓇᕗᒻᒥ ᓂᕿᑦᑎᐊᕙᐃᑦ ᓇᓗᓇᐃᖅᓯᔾᔪᑎᖓ ᑎᒥᖕᓄᑦ ᐱᐅᔪᓂᒃ ᓂᕆᖃᑦᑕᕐᓗᑎᑦ.
- ᖁᐃᒃᑎᓗᐊᖅᑕᐃᓕᒪᓗᑎᑦ ᐅᖁᒪᐃᓐᓂᕆᔭᐃᑦ ᐃᒃᐱᒋᓗᒍ.
- ᐆᒻᒪᕆᒃᑑᕙᒡᓗᑎᑦ ᖃᐅᑕᒫᖅ
- ᓴᓈᕆᔭᕐᓂ ᖁᐊᖅᓵᕐᓇᖅᑐᖃᕐᓂᖅᐸᑦ (ᐳᓪᓚᓖᑦ ᓱᕈᔪᖕᓇᖅᑐᓖᑦ ᓴᙱᔫᓪᓗᑎᒃ ᐋᓐᓂᐊᓕᕐᓇᖅᑐᑦ) ᖁᐊᖅᓵᕐᓇᖅᑐᖃᕐᓂᕋᐃᒃᐸᑕ ᖃᓄᐃᓕᐅᖁᔨᓂᖏᑦ ᒪᓕᒡᓗᒋᑦ.
ᑐᑭᓯᒋᐊᒃᑲᓂᕈᒪᒍᕕᑦ ᐳᕙᒃᑯᑦ ᐋᓐᓂᐊᖃᕐᓂᐅᑉ ᒥᒃᓵᓄᑦ ᐊᓯᖏᓪᓂᓗ ᐋᓐᓂᐊᖑᖃᑦᑕᖅᑐᓂ, ᐋᓐᓂᐊᓯᐅᖅᑎᒥᒃ ᐅᖃᓪᓚᖃᑎᖃᕐᓗᑎᑦ ᐅᕝᕙᓘᓃᑦ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᔨᒃᑯᑦ ᐱᓕᕆᕝᕕᖓ ᖃᕋᓴᐅᔭᒃᑯᑦ ᐃᑭᐊᖅᑭᕕᖓ ᑕᑯᒋᐊᕐᓗᒍ.
