ᐃᒡᓕᐊᑉ ᐹᖓ ᒪᒃᐲᖓᓂᐅᕗᖅ ᐃᒡᓕᐊᕐᒧᑦ. ᑲᕝᕕᒃ (ᓄᑕᕋᓛᖅ ᐊᖅᑯᑎᖓ) ᐊᑕᔪᖅ ᐃᒡᓕᐊᒧᑦ. ᑕᐃᒪᓕ ᐹᖓᒍᑦ ᐋᓐᓂᐊᓕᕌᖓᑦ ᑕᐃᔭᐅᓲ ᐃᒡᓕᐊᒃᑯᑦ ᐋᓐᓂᐊᖅ.
ᐃᒡᓕᐊᒃᑯᑦ ᐋᓐᓂᐊᓖᑦ ᖃᓄᐃᖅᑰᔨᖏᑦᑐᓐᓇᖅᑐᑦ ᒥᑭᑦᑑᒑᖓᑦ ᐋᓐᓂᐊᖑᔪᖅ. ᐋᓐᓂᐊᖑᔪᖅ ᐊᖏᔫᖑᓂᓕ, ᐃᒃᐱᒋᔭᐅᔪᓐᓇᖅᑐᖅ ᐊ'ᐋᕌᓘᓪᓗᓂ ᐊᒻᒪ ᐊᐅᖕᓇᖅᖢᓂ.
ᐃᒡᓕᐊᒃᑯᑦ ᐲᖅᓯᕕᐅᓗᓂ ᖃᐅᔨᓴᖅᑕᐅᒃᐸᑦ ᑭᓱᖃᕐᓂᖅᐸᑦ ᖃᐅᔨᔭᐅᓵᓕᔪᓐᓇᖅᑐᖅ. ᐃᒡᓕᐊᒃᑯᑦ ᐲᖅᓯᕕᐅᓗᓂ ᖃᐅᔨᓴᖅᑕᐅᔪᒃᓴᒥᒃ ᐃᓕᖅᑯᓯᐅᙱᑦᑐᓂᒃ ᕿᓂᖅᓴᖅᑕᐅᓲᖑᔪᖅ. ᑕᒪᓐᓇ ᐱᓕᕆᐊᖑᓲᖅ ᐃᖢᐊᖅᓴᐃᔨᒧᑦ, ᓘᒃᑖᒧᑦ, ᐃᕐᓂᓱᒃᓰᔨᒧᓪᓘᓃᑦ.
ᐃᒡᓕᐊᑉ ᐹᖓᓂ ᐋᓐᓂᐊᖅ
ᐃᒡᓕᐊᑉᒃᑯᑦ ᐋᓐᓂᐊᖑᔪᑦ ᐃᓚᖏᑦ ᖁᐱᕐᕈᕐᒧᑦ ᐱᒋᐊᓲᑦ ᑕᐃᔭᐅᓪᓗᑎᒃ ᐃᒡᓕᐊᑉ ᐹᖓᓂ ᐋᓐᓂᐊᖅ. ᐃᒡᓕᐊᑉ ᐹᖓᓂ ᐋᓐᓂᐊᖑᔪᖅ ᑐᑎᖕᓂᒃᑯᑦ/ᑯᔭᖕᓂᒃᑯᑦ ᐊᐃᑦᑐᕐᓘᑕᐅᓲᖅ. ᑐᑭᖃᖅᑐᕐᓕ ᒪᕐᕉᒃ ᐃᓅᒃ ᐱᖃᑎᒌᒃᑎᓪᓗᒋᑦ ᖁᐱᕐᕈᓂᒃ ᐊᐃᑦᑐᕐᓗᖃᑦᑕᐅᑎᓪᓗᑎᒃ. ᐅᓄᖅᑐᑲᓪᓚᐃᑦ ᐊᐃᑦᑐᕐᓗᒃᑕᐅᖃᑦᑕᖅᓯᒪᔪᑦ ᐃᒡᓕᐊᑉ ᐹᖓᓂ ᐋᓐᓂᐊᒥᒃ ᐃᓅᓯᖏᓐᓂ ᑭᓯᐊᓂᓕ ᐋᓐᓂᕐᓇᙱᑦᑐᖅ. ᐃᓛᓐᓂᑯᑦ ᑎᒥᐅᑉ ᒪᒥᑎᑦᑐᓐᓇᖃᑦᑕᖅᑕᕋᓗᐊᖓ ᑭᓯᐊᓂᑦᑕᐅᖅ ᐃᓛᓐᓂ ᑕᕝᕙᐅᖏᓐᓇᓕᓲᖅ. ᐃᓚᖏᓐᓄᑦ ᐃᓄᖕᓄᑦ, ᐃᒡᓕᐊᑉ ᐹᖓᓂ ᐋᓐᓂᐊᖅᑖᖅᑐᑦ ᐃᒡᓕᐊᒃᑯᑦ ᐋᓐᓂᐊᖅᑖᕈᓐᓇᕐᒥᔪᑦ.
ᑲᐴᑎᑕᖃᖅᑐᖅ ᓴᐳᑎᔾᔪᑎᐅᔪᓐᓇᖅᖢᓂ ᐃᓚᖏᓐᓂ ᐃᒡᓕᐊᒃᑯᑦ ᐋᓐᓂᐊᓕᕈᑕᐅᔪᓐᓇᖅᑐᓂ. ᓴᐳᑎᔭᐅᓐᓇᕆᕗᖅᑕᐅᖅ ᐃᒡᓕᐊᒃᑯᑦ ᐅᙳᙳᐊᖅᑖᖅᑕᐃᓕᒪᓂᕐᒧᑦ. ᓄᑲᑉᐱᐊᑦ ᓂᕕᐊᖅᓵᑯᓗᐃᓪᓗ ᑲᐱᔭᐅᔪᓐᓇᖅᑐᖅ ᑕᒪᑐᒧᖓ ᓄᓇᕗᒻᒥ. ᑲᐴᑎ (ᑕᐃᔭᐅᓪᓗᓂ ᒐᐅᑕᓯᐅᓪ) ᐊᑭᖃᙱᖦᖢᓂ ᐃᓕᓐᓂᐊᕐᓂᓕᖕᓄᑦ 6−ᒥ ᐊᑐᐃᓐᓇᐅᔪᖅ. .
ᖃᓄᖅ ᐃᒡᓕᐊᒃᑯᑦ ᐋᓐᓂᐊᖅᑖᖅᑕᐃᓕᒪᓂᖅ
- ᐃᓱᒪᓕᐅᕐᓗᑎᑦ ᑲᐱᔭᐅᔪᒪᖕᒪᖔᖅᐱᑦ ᐋᓐᓂᐊᖅᑖᖅᑕᐃᓕᔾᔪᑎᒧᑦ. ᑲᐴᑎ ᐋᓐᓂᐊᖅᑖᖅᑕᐃᓕᒪᓂᕐᒧᑦ ᐊᑭᖃᙱᑦᑐᖅ ᐃᓕᓐᓂᐊᕐᓂᖅ 6−ᒦᑦᑐᓄᑦ ᐊᑐᐃᓐᓇᐅᔪᖅ.
- ᓄᖅᑲᖅᐹᓪᓕᕐᓗᑎᑦ ᐅᕝᕙᓘᓃᑦ ᓱᐴᖅᑐᓗᐊᖃᑦᑕᕈᓐᓃᕐᓗᑎᑦ. ᐃᑲᔪᖅᑕᐅᔪᒪᒍᕕᑦ, ᐋᓐᓂᐊᓯᐅᖅᑎᒧᑦ ᐅᖃᓪᓚᒍᒪᒍᕕᑦ, [ nuquits.ca ], ᐅᕝᕙᓘᓃᑦ ᐊᑭᖃᙱᑦᑐᖅ ᐅᖄᓚᕝᕕᒋᓗᒍ ᓄᖅᑲᕋᓱᒃᑐᓄᑦ ᐃᑲᔪᖅᑕᐅᕝᕕᒃ ᐅᕗᖓ 1-866-368-7848−ᒧᑦ.
- ᐊᐃᑦᑐᕐᓗᒃᑕᐅᑦᑕᐃᓕᒋᑦ ᐃᓕᖕᓂᒃ ᓴᐳᑎᓗᑎᑦ. ᑯᔭᖃᑦᑕᕈᕕᑦ, ᐅᓲᑉ ᐴᖏᓐᓂ ᐊᑐᖅᐸᒡᓗᑎᑦ ᐊᐃᑦᑐᕐᓗᒃᑕᐅᑦᑕᐃᓕᔾᔪᑎᒋᓗᒍ ᐃᒡᓕᐊᑉ ᐹᖓᓂ ᐋᓐᓂᐊᒥᒃ ᐊᒻᒪ ᐊᓯᖏᓐᓂ ᖁᔭᖕᓂᒃᑯᑦ ᐊᐃᑦᑐᕐᓘᑕᐅᓲᖑᔪᓂ. ᑯᔭᖃᑦᑕᖅᑕᐃᑦ/ᑕᑎᑦ ᐅᖃᓪᓚᖃᑎᒋᓗᒍ ᑯᔭᖃᑦᑕᕐᓂᐅᑉ ᒥᒃᓵᓄᑦ.
- ᐊᕐᓇᐅᒍᕕᑦ ᐅᑭᐅᖃᕐᓗᑎᑦ 21-ᒥᑦ 69−ᒧᑦ, ᐃᒡᓕᐊᒃᑯᑦ ᐲᖅᓯᕕᐅᓗᑎᑦ ᖃᐅᔨᓴᖅᑕᐅᒋᑦ. ᐊᕐᓇᐃᑦ ᐃᓕᖅᑯᓯᖃᖁᔭᐅᕗᑦ ᐅᑭᐅᑦ ᐱᖓᓱᐃᑦ ᐃᒡᓕᐊᖓᒍᑦ ᐲᖅᓯᕕᐅᓗᑎᒃ ᖃᐅᔨᓴᖃᑦᑕᖁᔭᐅᔪᑦ. ᐃᒡᓕᐊᒃᑯᑦ ᐲᖅᓯᕕᐅᓪᓗᓂ ᖃᐅᔨᓴᖅᑕᐅᓂᖅ ᐊᔾᔨᒋᖏᒻᒪᒍ ᐊᐃᑦᑐᕐᓗᒃᑕᐅᓂᕐᒧᑦ ᖃᐅᔨᓴᕈᑎᒥ ᑭᓯᐊᓂ ᐊᑕᐅᑦᑎᒃᑯᑦ ᖃᐅᔨᓴᖅᑕᐅᔪᓐᓇᖅᑐᑦ ᑕᒪᒃᑯᐊ. ᐋᓐᓂᐊᓯᐅᖅᑎᒋᔭᐃᑦ ᐅᖃᓪᓚᖃᑎᒋᒍᒃ ᖃᓄᖅ ᖃᐅᔨᓴᖅᑕᐅᓪᓗᐊᕐᒪᖔᖅᐱᑦ ᑐᑭᓯᕝᕕᒋᓗᒍ.
ᑐᑭᓯᒋᐊᒃᑲᓐᓂᕈᒪᒍᕕᑦ ᐃᒡᓕᐊᒃᑯᑦ ᐋᓐᓂᐊᖅᑖᕐᓂᐅᑉ ᒥᒃᓵᓄᑦ ᐋᓐᓂᐊᓯᐅᖅᑎᒧᑦ ᐅᖃᓪᓚᒋᑦ ᐅᕝᕙᓘᓃᑦ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᔨᒃᑯᑦᐃᑭᐊᖅᑭᕕᖓ ᖃᕋᓴᐅᔭᒃᑯᑦ ᑕᑯᒋᐊᕐᓗᒍ..
