ᐊᐅᒃᑯᑦ ᓱᑲᖃᓗᐊᕐᓂᖅ

ᑎᒥᕗᑦ ᑕᒪᐃᓐᓂᓕᒫᖅ ᐃᔭᕈᕙᐅᔭᖏᑦ ᓱᑲᕐᒥᒃ ᐊᑐᖅᐸᖕᒪ, ᐊᐅᖕᒥᖔᖅᑐᒥᒃ ᓄᑭᖃᕈᑎᒋᓪᓗᓂᐅᒃ.  ᑎᒥᐅᑉ ᓄᑭᖃᕈᑎᒋᖕᒪᒍ ᓲᕐᓗ ᐊᔪᕐᓇᙱᖦᖢᓂ ᐱᓱᒋᐊᒃᓴᖅ, ᐅᓪᓚᒋᐊᒃᓴᖅ, ᐊᒻᒪ ᐃᓱᒪᔾᔪᑎᒋᔪᓐᓇᖅᖢᑎᒍ. ᐊᐅᒃᑯᑦ ᓱᑲᖃᓗᐊᕐᓂᖅ ᐋᓐᓂᐊᖑᔪᖅ ᑎᒥᒥᒃ ᐊᔪᓕᖅᑎᑦᑎᓲᖑᓪᓗᓂ ᓱᑲᕐᒥᒃ ᓄᑭᒃᓴᙳᖅᑎᑦᑎᔭᕆᐊᒃᓴᖅ. ᓄᑭᒃᓴᐅᓕᕐᓗᓂ ᐊᑐᖅᑕᐅᖏᖔᖅᖢᓂ, ᐊᐅᖕᒦᖏᓐᓇᓲᖑᔪᖅ. ᐊᐅᖕᒦᑐᖅ ᓱᑲᖅ ᖁᕝᕙᓯᓗᐊᖅᐸᓪᓕ ᑎᒥᐅᑉ ᐊᐅᓪᓚᔾᔪᑎᖏᑦ ᓱᕈᖅᑕᐅᓲᑦ − ᑕᖅᑐᐃᑦ, ᐃᔩᒃ, ᐆᒻᒪᑎ, ᑕᖃᐃᑦ, ᐊᒻᒪ ᖃᕋᓴᖅ. ᓱᖁᑎᒋᔭᐅᙱᒃᑯᓂᓕ, ᐊᐅᒃᑯᑦ ᓱᑲᖃᓗᐊᕐᓗᓂ ᑐᖁᔾᔪᑕᐅᔪᓐᓇᖅᑐᖅ.

ᐃᓅᓯᖃᑦᑎᐊᖅᐹᓪᓕᕋᓱᖕᓂᕐᒧᑦ ᐱᓕᕆᕙᒡᓗᓂ ᐊᐅᒃᑯᑦ ᓱᑲᖃᙱᑉᐹᓪᓕᕐᓇᖅᑐᖅ:

  • ᓱᐴᖅᑐᖃᑦᑕᙱᑉᐹᓪᓕᕐᓗᑎᑦ ᓄᖅᑲᕐᓗᑎᓪᓘᓃᑦ. ᐃᑲᔪᖅᑕᐅᓂᐊᕋᕕᑦ, ᐋᓐᓂᐊᓯᐅᖅᑎᒧᑦ ᐅᖃᕐᓗᑎᑦ, ᖃᕋᓴᐅᔭᒃᑯᓪᓘᓃᑦ [nuquits.ca] ᓄᓇᕗᒻᒥᓘᓃᑦ ᓄᖅᑲᕈᒪᓂᕐᒧᑦ ᐅᖄᓚᕝᕕᒃ ᐅᓇ 1-866-368-7848-ᒧᑦ ᐅᖄᓚᓗᑎᑦ.
  • ᖁᐃᒃᑎᓗᐊᖅᑕᐃᓕᓗᑎᑦ ᑎᒦᑦ ᐅᖁᒪᐃᒡᓕᑎᓗᐊᖏᓪᓗᒍ
  • ᐆᒻᒪᕆᖕᓂᖅ  ᖃᐅᑕᒫᖅ ᐅᕝᕙᓘᓃᑦ ᖃᐅᑕᒫᑲᓴᑦᑎᐊᖅ
  • ᓄᓇᒥᖔᖅᑐᓂᒃ ᓂᕿᑐᖃᑦᑕᕐᓗᑎᑦ, ᓂᕿᑦᑎᐊᕙᖕᓂᓘᓃᑦ ᓂᐅᕕᖅᑕᐅᔪᕕᓂᕐᓂᒃ. ᐊᑐᕈᓐᓇᖅᑕᐃᑦ ᓄᓇᕗᒻᒥ ᓂᕿᑦᑎᐊᕙᐃᑦ ᓇᓗᓇᐃᖅᓯᔾᔪᑎᖓ​​​​​​​ ᑎᒥᖕᓄᑦ ᐱᐅᔪᓂᒃ ᓂᕆᖃᑦᑕᕐᓗᑎᑦ.
  • ᐊᕐᕌᒍᑕᒫᖅ ᐋᓐᓂᐊᕐᕕᖕᒧᑦ ᖃᐅᔨᓴᖅᑕᐅᕙᒡᓗᑎᑦ ᑎᒥᓕᒫᑯᑦ ᐊᒻᒪ ᖃᐅᔨᓴᕈᑕᐅᔭᕆᐊᖃᓲᑦ ᐊᑐᖁᔭᐅᔪᑦ ᐊᑐᖅᐸᒡᓗᒋᑦ ᐋᓐᓂᐊᓯᐅᖅᑎᕕᑦ ᐅᖃᐅᓯᕆᔭᖏᑦ.

ᐊᐅᒃᑯᑦ ᓱᑲᖃᓗᐊᕐᓗᓂ ᖃᓅᔪᓐᓇᕐᒪᖔᖅ

ᐊᔾᔨᒌᖏᑦᑐᓂᒃ ᐊᐅᒃᑯᑦ ᓱᑲᖃᓗᐊᕐᓗᓂ ᐋᓐᓂᐊᖑᔪᓐᓇᖅᑐᑦ: ᓱᑲᖃᓗᐊᓕᖅᐸᓪᓕᐊᔪᖅ, ᓱᑲᖃᓗᐊᖅᑐᖅ 1, ᓱᑲᖃᓗᐊᖅᑐᖅ 2, ᐊᒻᒪ ᓄᑕᕋᓛᒃᓴᓖᑦ ᓱᑲᖃᓗᐊᕈᒻᓇᕐᒥᔪᑦ ᐊᐅᖏᑦᑎᒍᑦ. ᐊᐅᓚᑦᑎᑦᑎᐊᕐᓂᖅ ᐊᐅᒃ ᓱᑲᖃᓗᐊᖅᑎᓪᓗᒍ ᑎᒥᐅᑉ ᐊᐅᓚᔾᔪᑎᖏᓐᓄᑦ ᓱᕈᙱᑉᐹᓪᓕᕐᓇᖅᑐᖅ. ᓇᓕᐊᖕᓂᒃ ᐋᓐᓂᐊᖃᕐᓃᑦ ᒪᓕᒃᖢᒍ, ᐊᐅᓚᓂᖃᑦᑎᐊᕈᓐᓇᖅᑐᖅ ᐃᓅᓯᕆᖕᓇᖅᑐᓂᒃ ᓂᕈᐊᕆᔭᖃᖅᐸᒡᓗᓂ, ᓲᕐᓗ ᖁᐃᒃᑎᓗᐊᙱᓪᓗᑎᑦ ᐊᒻᒪ ᓂᕿᑦᑎᐊᕙᖕᓂᒃ ᓂᕆᕙᒡᓗᑎᑦ. ᐊᐅᒃᑯᑦ ᓱᑲᖃᓗᐊᕋᓗᐊᕈᕕᑦ ᑕᐃᒫᒃ ᐱᓕᕆᖃᑦᑕᕈᕕᑦ ᓈᒻᒪᒍᓐᓇᖅᑐᖅ. ᐋᓐᓂᐊᕐᓂᖅᓴᐅᒍᕕᓪᓕ, ᐃᓅᓕᓴᐅᑎᓂᒃ ᐱᖃᑦᑕᕆᐊᖃᖅᑐᒃᓴᐅᔪᑎᑦ (ᐄᔭᒐᕐᓂᒃ, ᑲᐱᔭᐅᕙᒡᓗᑎᓪᓘᓃᑦ).

ᐃᓄᐃᑦ ᐊᐅᖕᒥᒍᑦ ᓱᑲᖃᓗᐊᖅᑐᖅ ᐃᒻᒥᓂᒃ ᖃᐅᔨᓴᖃᑦᑕᕈᓐᓇᖅᑐᑦ ᐊᖏᕐᕋᖅᓯᒪᓗᑎᒃ ᖃᐅᔨᓴᕈᑎᑯᓗᖕᒧᑦ.