ᓄᑕᕋᓛᑦ ᓄᕙᒡᔪᐊᖅᑐᑐᑦ ᐳᕝᕕᕿᓂᖓ (ᖁᐱᕐᕈᖅ)

ᐳᕙᒃᑯᑦ ᓄᕙᒡᔪᐊᖃᕐᓂᖅ ᐋᓐᓂᐊᕈᑕᐅᒐᔪᒃᑐᖅ ᐊᐃᑦᑐᕐᓘᑕᐅᓴᕋᐃᖦᖢᓂᓗ. ᓄᑕᖅᑲᐃᑦ ᑕᒪᐃᓐᓂᑲᓴᒃ ᐅᑭᐅᖅᑖᖅᐸᒃᐳᑦ ᒪᕐᕈᖕᓂᒃ ᑖᔅᓱᒥᖓ ᓄᕙᓚᐅᖅᓯᒪᓪᓗᑎᒃ. ᐃᓛᓐᓂᑯᑦ, ᐳᕙᖕᒧᑦ ᐱᐅᔪᓐᓃᕈᑕᐅᔪᓐᓇᓲᖅ ᐊᑲᐅᙱᓕᐅᕈᑕᐅᓪᓗᓂᓘᓃᑦ, ᐱᓗᐊᖅᑐᒥ ᓄᑕᕋᓛᓂ. ᖃᓄᐃᑉᐸᓪᓕᐊᖕᒪᖔᑦ ᐅᔾᔨᖅᓱᕐᓗᒋᑦ ᐊᒻᒪ ᐋᓐᓂᐊᕕᓕᐊᕈᑎᒋᓗᒍ ᐱᐅᔪᓐᓃᖅᐸᓪᓕᐊᖏᓐᓇᖅᐸᑦ.

ᓄᕙᒡᔪᐊᕈᑎᖃᕐᑐᖅ ᐃᒪᓐᓇᐅᓲᖅ

ᓄᕙᒡᔪᐊᖅᑐᑎᑐᑦ ᐋᓐᓂᐊᖅᖢᓂ ᐊᔾᔨᒋᐸᓗᖕᒪᒍ ᓄᕙᑐᐃᓐᓇᖅᑐᑎᑐᑦ, ᓲᕐᓗ:

  • ᖁᐃᖅᓱᖅᐸᒡᓗᓂ
  • ᑲᒃᑭᓕᑲᑕᒡᓗᓂ ᓯᒥᒍᒡᔨᑲᑕᒡᓗᓂᓘᓃᑦ
  • ᐃᒡᒋᐊᕐᓗᒡᓗᑎᑦ
  • ᓯᐅᓯᕆᓗᑎᑦ
  • ᐆᑎᕐᓇᕐᓗᑎᒃ
  • ᐳᕙᖏᑦ ᐅᕕᙱᐊᖅᐸᓕᑦᑎᓗᑎᒃ ᐊᓂᖅᓵᓕᕌᖓᑦ
  • ᐊᓂᖅᓵᒡᒐᓕᕐᓗᕐᑎᑦ

ᓄᑕᕋᓛᑦ ᐳᕝᕕᕿᒍᑎᒃ ᓄᑭᑭᑦᑑᓂᐊᖅᐳᑦ, ᐅᐃᒻᒪᒃᓴᕋᐃᓪᓗᑎᒃ, ᕿᐊᑲᑕᒡᓗᑎᒃ, ᐊᒻᒪ ᑳᙱᓐᓂᖅᓴᐅᓗᑎᒃ ᐃᓕᖅᑯᓯᕐᒥᑑᖏᑦᑐᖅ. ᓄᑕᕋᓛᖑᓗᐊᕈᓐᓃᖅᑐᑦ ᐃᓚᖏᑦ ᐊᒃᓱᕉᓴᖕᓇᖅᑐᒥ ᐳᕝᕕᕿᓂᖅᓴᐅᓇᔭᖅᖢᑎᒃ.

ᓄᑕᕋᓛᕆᔭᐃᑦ ᑕᖅᑮᑦ 6 ᑐᖔᓃᐸᑦ, ᐅᔾᔨᖅᓱᑦᑎᐊᕐᓗᒍ ᖃᐅᔨᒪᐃᓐᓇᕐᓗᒍᓗ. ᐋᓐᓂᐊᓕᖅᐸᓪᓕᐊᑐᐃᓐᓇᕈᕕᑦ, ᐋᓐᓂᐅᓯᐅᖅᑎᒧᑦ ᑕᑯᔭᐅᔭᖅᑐᕆᐊᖃᖅᐳᑎᑦ.

ᓄᑕᕋᓛᕐᒥᒃ ᓄᑕᖅᑲᒥᒡᓘᓃᑦ ᐳᕝᕕᕿᔪᖃᖅᑎᓪᓗᒍ ᐊᓂᖅᓵᒡᒐᓕᖅᐸᑦ, ᐋᓐᓂᐊᕕᖕᒧᑦ ᐅᖄᓚᓗᑎᑦ ᐅᐸᒡᓗᑎᓪᓘᓃᑦ.

ᖁᐊᖅᓵᕐᓇᕈᓐᓃᕋᓱᐊᕐᓂᖅ

ᐳᕝᕕᕿᓂᖅ ᐊᐃᑦᑐᕐᓘᑕᐅᔪᓐᓇᖅᑐᖅ, ᑕᐃᒫᑦᑎᐊᖅ ᓄᕙᒃᑐᑎᑐᑦ. ᐅᓗᕆᐊᓇᖅᑐᖅ ᒥᒃᖠᕚᓪᓕᖅᑎᑦᑐᓇᕆᕗᖅ ᐊᓯᖔᖓᒍᑦ:

  • ᐊᒡᒐᑎᑦ ᐅᐊᓴᖅᐸᒡᓗᒋᑦ ᐅᐊᓴᒐᔪᒡᓗᒋᓪᓗ, ᐱᓗᐊᖅᑐᒥ ᐃᓄᒋᐊᒃᑐᓃᑲᑕᒃᑯᕕᑦ, ᐃᓄᒋᐊᓂ ᐊᐃᑦᑐᕐᓗᐃᔪᓐᓇᕐᓂᖅ ᐊᔪᕐᓇᖏᓐᓂᖅᓴᐅᖕᒪᑦ.
  • ᐊᒡᒐᑎᑦ ᐅᐊᓴᐃᓐᓇᐅᔭᕐᓗᒋᑦ ᓄᑕᕋᓛᒥᒃ ᑎᒍᓯᓂᐊᕌᖓᕕᑦ ᐊᒫᒪᒃᑎᑦᑎᓂᐊᕌᖓᕕᓪᓘᓃᑦ.
  • ᓄᑕᕋᓛᕆᔭᐅᔪᒥᒃ ᑎᒍᓯᕙᙱᓪᓗᑎᑦ ᓄᕙᒃᑳᖓᕕᑦ ᐋᓐᓂᐊᕐᓗᑎᓪᓘᓃᑦ.
  • ᑕᒋᐅᒃᓴᓕᕌᖓᕕᑦ ᖁᐃᖅᓱᓕᕌᖓᕕᓪᓘᓃᑦ ᖃᓃᑦ ᓱᕐᓗᐃᓪᓗ ᑕᓕᑎᑉᐸᒡᓗᒍ.
  • ᓯᒡᒐᓕᐊᖅᑐᙱᓐᓂᓴᐅᓗᑎᑦ ᓄᖃᕐᓗᑎᓪᓘᓐᓃᑦ.  ᓄᑕᕋᓛᑦ ᓄᑕᖅᑲᐃᓪᓗ ᓱᒡᒐᓕᐊᑉ ᐳᔪᖓᓂᒃ ᓂᐅᖅᓯᑎᑦᑕᐃᓕᒪᓗᒋᑦ. ᓱᐴᖅᑐᖅᐸᙱᓪᓗᑎᑦ ᐊᒫᕐᓂᕐᓂ.
    ᕿᑐᕐᖓᕕᑦ ᑲᐴᑎᖏᑦ ᐊᖑᒻᒪᑎᒐᓗᐊᕐᒪᖔᑕ ᐊᒻᒪ ᐊᒥᒐᙱᒃᑲᓗᐊᕐᒪᖔᑕ ᖃᐅᔨᒋᐊᕐᓗᑎᑦ. 
  • ᐊᓈᓇᒥ ᐊᒫᒪᑲᑕᒡᓗᓂ ᐱᐅᓂᖅᓴᐅᔪᖅ ᖁᐱᕐᕈᕐᓂᒃ ᓴᐳᑎᔪᓐᓇᕐᓂᖅᓴᐅᓂᐊᕐᒪᑦ ᐳᕝᕕᕿᔪᑯᓗᒃ.

ᐃᓚᖏᓐᓄᑦ ᓄᑕᕋᓛᓄᑦ ᐊᓐᓇᐅᒪᔾᔪᑎᖃᙱᓐᓂᖅᓴᓄᑦ, ᑲᐴᑎᑕᖃᖅᑐᖅ ᐊᑎᓕᖕᒥᒃ ᓯᓇᔨᔅ ᓴᐳᔾᔨᔪᓐᓇᖅᖢᓂ ᐳᕝᕕᕿᓕᖅᑕᐃᓕᓂᕐᒥᒃ. ᓲᕐᓗ ᐆᒃᑑᑎᒋᓗᒍ, ᓄᑕᕋᓛᖅ ᐃᓄᕐᓗᓂ ᐃᓅᓵᓕᓚᐅᕐᓂᕈᓂ, ᐋᓐᓂᐊᓯᐅᖅᑎᒧᑦ ᑲᐱᔭᐅᖁᔭᐅᓇᔭᖅᑐᒃᓴᐅᔪᖅ ᓴᐳᑎᒋᔪᓐᓇᕐᓂᐊᕐᒪᒍ ᐳᕝᕕᕿᓂᕐᒥᒃ. ᓯᓇᔨᔅ ᑕᖅᑭᑕᒫᖅ ᑲᐱᔭᐅᔾᔪᑎᒋᔭᐅᓲᖅ ᐳᕝᕕᕿᓐᓇᐅᓂᖓᓂ. ᐋᓐᓂᐊᓯᐅᖅᑎᒋᔭᓯ ᓄᓇᔅᓯᓐᓂ ᐊᐱᖅᓱᕐᓗᒍ ᓯᓇᔨᔅ ᒥᒃᓵᓄᑦ ᑐᑭᓯᒋᐊᒃᑲᓂᕈᓐᓇᖅᐳᑎᑦ.

ᒪᒥᓴᐃᓂᖅ ᐳᕝᕕᕿᔪᒥᒃ

ᐳᕝᕕᕿᓂᖅ ᐃᒻᒥᓂ ᐊᓂᒍᕐᓂᒃᑯᑦ ᒪᒥᓲᖑᔪᖅ. ᓄᑕᕋᕐᒥᒃ ᐳᕝᕕᕿᔪᖃᖅᐸᑦ, ᐃᒪᓐᓇ ᐱᔪᓐᓇᖅᐳᑎᑦ:

  • ᐊᑭᓯᖅᑯᖅᑐᑎᓪᓗᒍ ᓂᐊᖁᖓ ᒪᑭᑕᔾᔫᒥᓂᐊᕐᒪᑦ ᑕᐃᒫᒃ ᐊᓂᖅᑎᕆᔪᓐᓇᕐᓂᖅᓴᐅᓂᐊᕐᒪᑦ ᓯᓂᑦᑎᐊᕐᓂᖅᓴᐅᓗᓂᓗ.
  • ᓂᐅᖅᑲᐃᓐᓇᖁᓗᒋᑦ ᓂᒡᓕᓇᖅᑐᓂᒃ. ᐃᒥᑲᑕᐃᓐᓇᕐᓗᑎᑦ − ᐃᒥᑐᐃᓐᓇᕐᒥ (ᐆᓇᖅᑐᒥ ᓂᒡᓕᓇᖅᑐᒥᓪᓘᓐᓃᑦ), ᑏ, ᖃᔪᕐᓂᓪᓗ. ᓄᑕᕋᓛᑦ ᐊᓈᓇᒥᖕᓂᒃ ᐊᒫᒪᖃᑦᑕᐃᓐᓇᓪᓗᐊᖅᑐᑦ ᐅᕝᕙᓘᓃᑦ ᐃᒻᒧᖕᒥᒃ ᐊᒫᒪᒃᐸᒡᓗᑎᒃ.
  • ᐃᒡᓗᐃᑦ ᕿᐅᒃᑲᖓᑎᔾᔫᒥᓗᒍ. ᕿᐅᒃᑲᖓᔾᔪᑎᒥᒃ ᓄᑕᕋᓛᑉ ᐃᒡᓗᕈᓯᐊᓃᑎᑦᑎᔪᓐᓇᕆᕗᑎᑦ.
  • ᐱᔭᕆᐊᖃᖅᐸᑦ, ᓄᑕᕋᖅᓯᐅᑎᒥᒃ ᓂᐊᖁᖅᓯᐅᑎᑐᖅᑎᓪᓗᒍ (ᓲᕐᓗ ᑕᐃᓚᓈᓪ) ᐋᓐᓂᐊᓗᐊᔾᔭᐃᒃᑯᑎᒋᓂᐊᕐᒪᒍ. ᒪᓕᑦᑎᐊᖅᐸᓗᒋᑦ ᓇᓗᓇᐃᔭᐃᔾᔪᑏᑦ. ᐄᔭᒃᑲᑦ ᐊᒃᑐᐃᓂᖃᕈᓇᕐᒪᑕ ᐱᓗᐊᕐᓗᒋᑦ.
  • ᓂᐊᖁᖅᓯᐅᒻᒥᒃ (ᐋᔅᐳᕆᓐ) 20−ᐅᑉ ᑐᖔᓂᑦ ᐅᑭᐅᓕᖕᓄᑦ ᐱᑎᑦᑎᑕᐃᓕᓗᑎᑦ.  ᐊᒃᑐᐊᓂᖃᕐᒪᑦ  Reye syndrome ᐋᓐᓂᐊᓕᕐᔪᐊᖑᔪᖅ ᑎᖑᖕᒧᑦ ᖃᕋᓴᒧᓪᓗ ᐊᒃᑐᐃᓂᖃᖅᑐᖅ.