ᖃᓂᒃᑯᑦ ᖃᓄᐃᖏᑦᑎᐊᕐᓂᖅ ᐃᑲᔪᓲᖅ ᐃᒪᓐᓇ:
- ᑭᒍᑎᑦᐊᕆᖕᓇᖅᑐᖅ ᑭᒍᑎᒃᑯᓪᓗ ᐊᐅᓂᖅᑖᕐᓇᙱᖦᖢᓂ
- ᒪᙳᕐᓗᓕᕐᓇᖏᑦᑐᖅ
- ᓂᕿᒥᒃ ᑕᒧᐊᓪᓗᓂ ᓯᖃᓕᓯᑦᑎᐊᕈᑕᐅᓪᓗᑎᒃ
- ᐅᖃᓪᓚᒃᑎᓪᓗᒋᑦ ᑐᑭᓯᓇᕐᔫᒥᔪᓐᓇᖅᖢᑎᒃ
ᑭᒍᑎᓯᐅᖅᐸᒡᓗᓂ ᐃᕙᓗᒃᓴᐅᑎᒧᓪᓗ ᓱᕈᐃᔭᖅᐸᖕᓂᖅ ᖃᐅᑕᒫᖅ ᖃᓂᕐᓗᓕᕐᓇᖏᑦᑑᕗᖅ. ᖃᓂᒃᑯᑦ ᖃᓄᐃᖏᑦᑎᐊᕐᓂᖅ ᐃᓅᓯᓕᒫᒧᑦ ᐊᑑᑎᖃᖅᑐᖅ − ᓄᑕᖅᑲᓄᑦ, ᐃᓐᓇᕐᓄᑦ, ᐊᒻᒪ ᐃᓄᑐᖃᕐᓄᑦ.
ᐃᓄᒃ ᓂᕆᐊᓂᒃᑳᖓᑦ, ᓂᕿᐅᑉ ᐊᒥᐊᒃᑯᕐᓗᑯᖏᑦ ᑭᒍᑎᒦᓕᖃᑦᑕᕐᒪᑕ. ᐃᕙᓗᒃᓴᐅᑎᒧᑦ ᓱᕈᐃᔭᕐᓂᖅ ᑭᒍᑎᓯᐅᖃᑦᑕᕐᓂᕐᓗ ᓱᕈᔪᖕᓂᖅ ᐲᖅᓯᔾᔪᑕᐅᓲᖅ, ᐲᖅᑕᐅᖏᑉᐸᑕᓕ ᑕᐃᑲᓃᖏᓐᓇᕐᓗᑎᒃ ᑎᓯᒃᑎᑦᑐᓐᓇᕐᒪᑕ. ᐊᐅᓂᖅᑖᕈᓐᓇᖅᓯᓪᓗᓂ ᐊᔪᕐᓇᙱᓐᓂᖅᓴᒥ ᒪᙳᕐᓗᓕᕈᓐᓇᖅᖢᓂᓗ, ᐊᒻᒪ ᖃᖓᒃᑲᓂᐅᓕᖅᐸᑦ ᑭᒍᑏᖅᑕᐅᔪᓐᓇᖅᓯᓗᓂ. ᓱᕈᕈᔪᒃ ᑭᒍᑎᒦᑦᑐᖅ ᑎᓯᒃᑎᒃᑳᖓᑦ ᑕᐃᔭᐅᓕᓲᖅ ᓯᑎᒃᑎᓐᓂᑯ−ᒥᒃ. ᑭᒍᑎᓕᕆᔨᑐᐊᑦ ᑭᓯᐊᓂ ᐲᖅᓯᔪᓐᓇᖅᑐᑦ ᓯᑎᒃᑎᓐᓂᑯᓂᒃ. ᑕᐃᒪᐃᒻᒪᓐ ᑭᒍᑏᑦ ᓴᓗᒪᑏᓐᓇᕆᐊᖃᓲᖑᕗᑦ ᑕᒪᓐᓇᓗ ᐱᒻᒪᕆᐊᓘᔾᔪᑎᒋᕙᐅᒃ.
ᖃᓄᐃᒻᒪᓐ ᖃᓂᒃᑯᑦ ᖃᓄᐃᖏᑦᑎᐊᕐᓂᖅ ᐱᒻᒪᕆᐅᕙ?
ᖃᓂᒃᑯᑦ ᖃᓄᐃᖏᑦᑎᐊᕐᓂᕐᒥᒃ ᑲᒪᙱᑦᑐᑦ ᐊᐅᓂᖅᑖᓲᖑᔪᑦ, ᒪᙳᕐᓗᓕᖅᐸᒃᖢᑎᒃ, ᐅᕝᕙᓘᓃᑦ ᑭᒍᑕᐃᖅᑕᐅᕙᒃᖢᑎᒃ. ᖃᓂᒃᑯᑦ ᖃᓄᐃᖏᑦᑎᐊᕐᓂᖅ ᐊᒃᑐᐃᓂᖃᓲᖅ:
- ᑭᖕᒪᕈᓐᓇᕐᓂᕐᒥᒃ ᓂᕿᒥᒃ ᓯᖃᓕᓯᑦᑎᐊᕐᓂᕐᒥᒃ ᑎᒥᐅᑉ ᐊᑐᕈᓐᓇᕐᓂᐊᕐᒪᒍ
- ᐱᕈᖅᐸᓪᓕᐊᓂᖅ ᐱᕙᓪᓕᐊᑎᑦᑎᓂᕐᓗ
- ᒪᙳᕐᓗᓕᖁᓂ ᐳᕕᓕᕈᓐᓇᖅᑐᖅ ᐅᕝᕙᓘᓃᑦ ᐊᐅᖕᓇᖅᖢᓂ
- ᑎᒥᓕᒫᒧᑦ ᖃᓄᐃᙱᑉᐹᓪᓕᕐᓇᖅᑐᖅ. ᑭᒍᑎᒃᑯᑦ ᐊᐅᓂᖃᕐᓂᖅ ᐊᒻᒪ ᒪᙳᕐᓗᖕᓂᖅ ᐱᐅᔪᓐᓃᖅᑎᑦᑎᔪᓐᓇᕐᒥᖕᒪᑕ ᐳᕙᖕᓂᒃ ᐊᒻᒪ ᐊᐅᒃᑯᑦ ᓱᑲᖃᓗᐊᓕᕈᑕᐅᔪᓐᓇᕆᓪᓗᓂ.
- ᑕᑯᔭᐅᓂᕆᔭᖓ ᐊᒻᒪ ᐃᓗᒃᑯᑦ ᐃᒻᒥᓂᒃ ᐅᒃᐱᕆᓂᖅ
ᖃᐅᑕᒫᖅ ᑲᒪᒋᑦᑎᐊᕐᓂᖅ
- ᑭᒍᑎᓯᐅᖅᐸᒡᓗᑎᑦ ᐃᕙᓗᒃᓴᐅᑎᒧᓪᓗ ᓱᕈᐃᔭᖅᐸᒡᓗᑎᑦ ᐅᓪᓗᖅ ᒪᕐᕈᐃᖅᓱᕐᓗᖑ. ᓄᑕᖅᑲᐃᑦ ᐃᑲᔪᖅᐸᒡᓗᒋᑦ ᑭᒍᑎᓯᐅᖅᑎᓪᓗᒋᑦ ᓱᕈᐃᔭᐃᑎᓪᓗᒋᓪᓘᓃᑦ ᐃᕙᓗᒃᓴᐅᑎᒧᑦ ᐃᒻᒥᓂᒃ ᐊᔪᕈᓐᓃᓚᐅᖏᓐᓂᖏᓂ.
- ᓂᕿᑦᑎᐊᕙᖕᓂ ᓂᕆᕙᒡᓗᑎᑦ
- ᓄᖅᑲᖅᐹᓪᓕᕐᓗᑎᑦ ᓯᒡᒐᓕᐊᒥᒃ ᐅᕝᕙᓘᓃᑦ ᓱᐴᖅᑐᖃᑦᑕᕈᓐᓃᕐᓗᑎᑦ. ᓱᐴᖅᑐᖅᐸᒃᑯᕕᑦ, ᖃᓃᑦ ᒪᙳᕐᓗᖏᒃᑲᓗᐊᕐᒪᖔᓪᓘᓃᑦ ᖃᐅᔨᒋᐊᖅᑕᐅᑎᑉᐸᒡᓗᒋᑦ.
ᑕᑯᒋᐊᕐᓗᒍ ᓄᓇᕗᑦ ᖁᖓᑦᑐᖅ ᑐᑭᓯᒋᐊᒃᑲᓂᕈᒪᒍᕕᑦ ᖃᓂᒃᑯᑦ ᖃᓄᐃᖏᑦᑎᐊᕐᓂᕐᒥᒃ!
ᑭᒍᑎᑦᑎᐊᕆᖕᒪᖔᖅ ᖃᐅᔨᒋᐊᖅᑕᐅᖃᑦᑕᕐᓂᖅ
ᐃᓚᖏᑦ ᓄᓇᓖᑦ ᓲᕐᓗ − ᐃᖃᓗᐃᑦ, ᑲᖏᖅᖠᓂᖅ, ᐊᕐᕕᐊᑦ, ᐊᒻᒪ ᐃᒃᐱᐊᕐᔪᒃ − ᐅᑭᐅᓕᒫᖅ ᑭᒍᑎᓕᕆᔨᖃᐃᓐᓇᓲᑦ. ᐊᓯᖏᑦ ᓄᓇᓖᑦ ᑎᑭᑕᐅᓲᖑᓪᓗᑎᒃ ᑭᒍᑎᓕᕆᔨᓂᒃ ᐅᑭᐅᑉ ᐃᓗᐊᓂ ᖃᔅᓰᑲᓪᓚᒃᖢᑎᒃ.
ᓄᓇᕗᒻᒥᐅᑦ ᑭᒍᑎᓕᕆᔨᒥᒃ ᖃᐅᔨᓴᖅᑕᐅᖃᑦᑕᓪᓗᐊᖅᑐᑦ ᖃᓂᖏᑦ ᖃᓄᐃᙱᒃᑲᓗᐊᕐᒪᖔᑕ. ᐋᓐᓂᐊᕕᓕᕆᔩᑦ ᖃᐅᔨᒋᐊᕐᓗᒋᑦ ᑭᒍᑎᓕᕆᔩᑦ ᒥᒃᓵᓄᑦ ᓄᓇᒋᔭᕐᓂ.
ᖃᕋᓴᐅᔭᐅᑉ ᐃᑭᐊᖅᑭᕕᖓ ᑕᑯᓗᒍ www.nunavutsmiles.ca ᑐᑭᓯᒋᐊᒃᑲᓂᕈᒪᒍᕕᑦ.
