ᐃᒦᓐᓇᖅᖢᓂ ᑲᔪᓯᐅᖅᑲᓂᖅ
ᐃᒦᓐᓇᕐᓗᓂ ᑲᔪᓯᐅᖅᑲᓂᖅ ᑐᑭᖃᖅᑐᖅ ᐃᒥᐊᓗᑲᓪᓛᓗᖕᒥᒃ ᓂᐅᖅᑲᖅᑐᕕᓂᐅᓗᓂ ᕿᓚᒥᑯᓗᒃ.
- ᐊᕐᓇᓄᑦ, ᑐᑭᖃᖅᖢᓂ ᐱᖓᓱᑦ ᐅᖓᑖᓂ ᐃᒥᖅᑐᕕᓂᐅᓪᓗᑎᒃ ᑕᕝᕙᓂᑦᑕᐃᓐᓇᖅ ᐊᑕᐅᓯᕐᒦᖦᖢᑎᒃ ᐃᒥᓯᒋᐊᕋᒥᒃ.
- ᐊᖑᑎᓄᑦ, ᑐᑭᖃᖅᖢᓂ ᑎᓴᒪᑦ ᐅᖓᑖᓂ ᐃᒥᖅᑐᕕᓂᐅᓪᓗᑎᒃ ᑕᕝᕙᓂᑦᑕᐃᓐᓇᖅ ᐊᑕᐅᓯᕐᒦᖦᖢᑎᒃ ᐃᒥᓯᒋᐊᕋᒥᒃ.
ᑎᒥ ᑲᒪᒋᔭᖃᕈᓐᓇᕐᒪᑦ ᑭᓯᐊᓂ ᐊᑕᐅᓯᕐᒥᒃ ᐃᒥᖅᑕᐅᔪᒥᒃ ᐊᑕᐅᓯᕐᒥ ᐃᑲᕐᕋᒥ. ᑲᔪᓯᐅᖅᑲᔪᒥᒃ ᐃᒥᓕᕈᕕᓪᓕ, ᓂᐅᖅᑲᖅᑕᑎᑦ ᐊᖏᓂᖅᓴᐅᖕᒪᑕ ᑎᒥᐅᑉ ᐱᓕᕆᔪᓐᓇᖅᑕᖓᑕ ᐅᖓᑖᓂ.
ᑲᔪᓯᐅᖅᑲᔪᒥᒃ ᐃᒥᐊᓗᒃᑐᖅᓯᒪᓪᓗᓂ ᖁᐊᖅᓵᕐᓇᕈᓐᓇᖅᑐᑦ ᐅᑯᐊ:
- ᐋᖓᔮᕐᓗᓂ ᐊᖁᑦᑐᖅ, ᐱᕐᕈᓗᐊᕿᔾᔪᑕᐅᔪᓐᓇᖅᖢᓂ, ᐋᓐᓂᖅᑐᖃᕈᓐᓇᖅᖢᓂ ᐊᒻᒪ ᑐᖁᔪᖃᕈᓐᓇᖅᖢᓂ, ᐃᒻᒪᖄᓗ ᐱᕋᔭᒃᑐᕕᓂᐅᓂᕐᒧᑦ ᑎᑎᖅᑲᐅᑎᑖᕋᔭᕐᒥᔪᖅ.
- ᐅᓇᑕᕐᓂᖅ, ᓱᕋᒃᓯᓂᕐᒧᑦ/ᐋᓐᓂᖅᓯᕆᒃᑲᓂᕐᓂᕐᒧᑦ ᐱᔾᔪᑕᐅᔪᓐᓇᖅᖢᓂ ᐊᒻᒪᓘᓃᑦ ᐱᕋᔭᖕᓂᕐᒧᑦ ᐸᓯᔭᒃᓴᓕᐊᖑᔪᓐᓇᕆᓪᓗᓂ.
- ᓴᐳᑎᓯᒪᙱᓪᓗᓂ ᑯᔭᖃᑎᖃᕐᓂᖅ, ᑯᔭᖕᓂᒃᑯᑦ ᐊᐃᑦᑐᕐᓗᐃᑲᑕᒍᓐᓇᖅᖢᓂ ᐅᕝᕙᓘᓃᑦ ᐸᕐᓇᒃᓯᒪᙱᓪᓗᓂ ᓄᑕᕋᒃᓴᖅᑖᕈᓐᓇᕐᒥᔪᖅ.
- ᐃᒥᓗᐊᖅᑐᕕᓂᐅᓗᓂ ᖃᓂᒻᒪᒍᑕᐅᔪᓐᓇᖅᑐᖅ ᑐᖁᔾᔪᑕᐅᔪᓐᓇᕆᓪᓗᓂᓗ.
ᐃᒥᐊᓗᖕᒥᒃ ᖃᓂᒻᒪᖕᓂᖅ/ᑐᖁᓂᖅ
ᐃᓄᒃ ᐃᒥᐊᓗᒃᑐᕈᓂ ᑎᒥᐊᑕ ᐅᖓᑖᓂ ᐱᔪᓐᓇᖅᑕᖓᓂᒃ ᕿᓚᒥᑯᓘᔪᒃᑯᑦ, ᐃᒥᐊᓗᒃ ᑎᒥᒧᑦ ᐱᐅᔪᓐᓃᕈᑎᔪᓐᓇᕐᒪᑦ. ᐃᒥᓗᐊᖅᑐᕕᓂᐅᓗᓂ ᑎᒥᐅᑉ ᐱᔪᓐᓇᖅᑕᖓᑕ ᐅᖓᑖᓂ ᖁᐊᖅᓵᓇᖅᑐᖅ ᑐᖁᔾᔪᑕᐅᔪᓐᓇᕐᓂᖓᓄᑦ. ᑕᐃᒪᐃᑦᑐᕐᓕ ᑕᐃᒪ ᒥᕆᐊᖅᓴᕋᔭᖅᐳᖅ, ᖀᖅᓱᑲᑕᒡᓗᓂ ᐊᒻᒪ ᐊᓂᕐᓂᖓ ᐃᓕᖅᑯᓯᖅᓱᕈᓐᓃᕐᓗᓂ, ᖃᐅᔨᒪᔪᓐᓃᑲᑕᒡᓗᓂᓗ (ᓯᓂᓕᑲᑕᒡᓗᓂ). ᓯᓂᓕᖅᑐᖃᖅᐸᓪᓕ ᐃᒥᖅᓯᒪᔪᒥᒃ, ᑐᐱᑦᑐᓐᓇᖅᑐᑦ, ᕿᕿᑦᑐᓐᓇᖅᑐᑦ, ᐅᕝᕙᓘᓃᑦ ᑎᒥᖓ ᓂᒡᓕᓗᐊᖅᑐᕕᓂᐅᓗᓂ ᐊᓂᕐᓂᖃᕈᓐᓃᕈᓐᓇᕐᒥᔪᖅ.
ᑐᓴᒃᑲᓐᓂᕈᒪᒍᕕᑦ ᖃᓄᖅ ᐃᒥᐊᓗᒃ ᐊᒃᑐᐃᓂᖃᒃᑲᓐᓂᕈᓐᓇᕐᒪᖔᖅ ᓄᑕᕋᓛᒃᓴᖃᕐᓗᓂ, ᑕᑯᒋᐊᕐᓗᒍ ᓄᑕᕋᓛᒃᓴᖃᕐᓗᓂ ᖃᓄᐃᙱᑦᑎᐊᕐᓂᖅ.
ᐊᑯᓂᐊᓗᒃ ᐃᒥᐊᓗᒃᑐᖅᑎᐅᓕᕐᓗᓂ ᖃᓄᐃᓐᓇᖅᐸ
ᐃᒥᐊᓗᖕᒥᒃ ᐊᑐᖃᑦᑕᕐᓗᓂ ᐊᑯᓂᐊᓗᒃ ᐃᒥᖅᑎᐅᓕᕐᓗᓂ ᓈᒻᒪᙱᑦᑐᓂᒃ ᐊᒃᑐᐃᓂᖃᕈᓐᓇᖅᑐᖅ ᑎᒥᒧᑦ. ᑎᒥᐅᑉ ᖃᓄᐃᓐᓂᕆᔭᖓ ᓴᖅᑭᑲᐅᑎᒋᓇᔭᙱᑦᑐᒃᓴᐅᔪᖅ ᐃᒻᒪᖄ ᐱᐅᔪᓐᓃᖅᐸᓪᓕᐊᔪᓐᓇᖅᑐᖅ. ᑎᒥᑯᑦ ᖃᓄᐃᔾᔪᑕᐅᔪᓐᓇᖅᑐᑦ ᐊᑯᓂᐊᓗᒃ ᐃᒥᐊᓗᒃᑐᖅᑎᐅᓗᓂ ᐅᑯᐊᖑᕗᑦ:
- ᖃᕋᓴᖅ ᐱᐅᔪᓐᓃᕐᓗᓂ
- ᐆᒻᒪᓯᕆᓂᖅ
- ᐆᒻᒪᑎᒃᑯᑦ/ᑕᖃᒃᑯᑦ ᖃᓂᒻᒪᓯᖅ
- ᐊᐅᒃ ᑎᒡᓕᕐᓂᖓ ᖁᕝᕙᓯᓗᐊᕐᓗᓂ
- ᑎᖑᒡᓗᓕᕐᓗᓂ
- ᒪᔅᓴᕐᓗᓕᕐᓗᓂ
- ᐃᓱᒪᒃᑯᑦ ᐋᓐᓂᖅᓯᒪᔾᔪᑎᖃᓕᕐᓗᓂ
- ᐊᐅᒃᑯᑦ ᓱᑲᖃᓗᐊᕐᓂᖅ
- ᐊᕿᐊᕈᒃᑯᑦ ᐊᖕᒪᔪᖃᓕᕐᓗᓂ
- ᐋᓐᓂᐊᖅᑖᕐᓂᖅ: ᐅᖃᒃᑯᑦ, ᐃᕕᐊᖏᒃᑯᑦ, ᑎᖑᒃᑯᑦ, ᖃᓂᒃᑯᑦ, ᐃᒡᒋᐊᒃᑯᑦ, ᐃᖅᖢᒃᑯᑦ
ᐃᓕᖕᓂᒃ ᑲᒪᒋᑦᑎᐊᕐᓗᑎᑦ ᐃᓅᖃᑎᖕᓂᒡᓗ. ᖃᑕᙳᑎᑎᑦ ᐱᖃᓐᓇᕆᔭᑎᓪᓗ ᖃᐅᔨᒪᑎᓪᓗᒋ ᐃᑲᔪᖅᑕᐅᔪᓐᓇᕐᓂᖏᓐᓂ ᐃᑲᔪᖅᑕᐅᔭᕆᐊᖃᕈᑎᒃ.
ᐃᒃᐱᒋᔭᒃᑯᑦ ᐅᕝᕙᓘᓐᓃᑦ ᐃᓱᒪᒃᑯᑦ ᐊᒃᓱᕈᕐᓇᖅᑐᖅᓯᐅᓗᐊᕈᕕᑦ ᖃᐅᔨᒪᔭᖃᕈᒐᕕᓪᓘᓐᓃᑦ, ᐃᑲᔪᖅᑕᐅᔪᓐᓇᑦᑎᐊᖅᐳᓯ. ᐅᖃᖃᑎᖃᖃᑦᑕᕆᑦ ᐱᖃᓐᓇᕆᔭᕐᓂᒃ, ᐃᓚᖕᓄᑦ, ᐃᓕᓴᐃᔨᒧᑦ, ᐃᓅᓯᓕᕆᔨᒧᑦ, ᐃᓐᓇᕐᒧᑦ, ᐅᖃᐅᓯᕆᓗᒋᓗ ᐃᓱᒫᓘᑎᒋᔭᑎᑦ. ᐋᓐᓂᐊᕕᓯᓐᓅᕐᓗᑎᓪᓗ ᐃᓱᒪᓕᕆᔨᒥᑦ ᐅᖃᖃᑎᖃᕆᐊᖅᑐᕐᓗᑎᑦ.
ᖃᐅᔨᔭᐅᖏᓪᓗᑎᑦ ᑭᓇᐅᖕᒪᖔᕐᓂ ᐃᑲᔪᖅᑕᐅᔪᒪᒍᕕᑦ, ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᖕᒧᑦ ᐅᖄᓚᔪᓐᓇᖅᐳᑎᑦ, ᐅᓪᓗᓕᒫᖅ/ᐅᓐᓄᐊᓕᒫᖅ ᒪᒃᐲᖓᓲᖅ ᐅᕙᓂ 1-800-265-3333-ᒧᑦ.
ᐊᔪᕐᓇᖅᑐᖅᓯᐅᕈᕕᑦ ᖃᐅᔨᒪᔭᐃᓪᓘᓃᑦ ᐊᒃᓱᕈᕐᓇᖅᑐᒃᑰᖅᐸᑦ, ᐃᑲᔪᖅᑕᐅᔭᕆᐊᓕᒃ ᐃᑲᔪᖅᑎᑖᖅᑎᓪᓗᒍ. ᐃᑲᔪᖅᑕᐅᕝᕕᖕᒧᑦ ᐅᖄᓚᓗᑎᑦ, ᑐᐊᕕᕐᓇᖅᑐᒃᑯᑦ ᐃᑲᔪᖅᑕᐅᕝᕕᖕᒧᑦ ᐅᕝᕙᓘᓃᑦ ᐋᓐᓂᐊᕐᕕᖕᒧᑦ ᐅᐸᒍᓐᓇᕆᕗᑎᑦ ᒫᓐᓇᑲᐅᑎᒋ.
ᑐᓴᒃᑲᓐᓂᕈᒪᒍᕕᑦ, ᐅᕗᖓ ᑕᑯᒋᐊᕐᓗᑎᑦ ᓱᕐᕋᖕᓇᖅᑐᑦ ᐅᐃᕆᓐᓇᖅᑐᐃᓪᓗ.
