ᓄᑕᕋᓛᒃᓴᖃᕐᓗᓂ ᖃᓄᐃᙱᑦᑎᐊᕐᓂᖅ

ᓄᑕᕋᓛᒃᓴᖃᕐᓂᕐᒧᑦ ᖃᐅᔨᓴᖅᑕᐅᔭᖅᑐᖃᑦᑕᕐᓂᖅ ᐱᒋᐊᖅᓵᓕᓗᒍ ᐃᑲᔫᑎᖃᕈᓐᓇᖅᑐᖅ ᐊᓈᓇᐅᓂᐊᖅᑐᒧᑦ ᓄᑕᕋᓛᒃᓴᖓᓗ ᖃᓄᐃᙱᑦᑎᐊᕐᓂᐊᕐᒪᑕ. ᖃᐅᔨᓴᖅᑕᐅᖃᑦᑕᕐᓂᖅ ᓄᑕᕋᓛᒃᓴᖃᕐᓗᓂ ᐃᕐᓂᓂᐊᓕᕐᓗᓂ ᖃᓄᐃᙱᑉᐹᓪᓕᕐᓇᓲᖅ.

ᑲᐴᑎᑦ

ᑲᐴᑏᑦ, ᐅᕝᕙᓘᓃᑦ ᑲᐱᔭᐅᖃᑦᑕᕐᓂᖅ, ᖁᐊᖅᓵᕐᓇᙱᑦᑑᔪᖅ. ᐋᓐᓂᐊᕈᑕᐅᓲᓂᒃ ᖃᓄᐃᔾᔪᑕᐅᓕᕈᓐᓇᖅᑐᓂᓗ ᓄᖅᑲᖓᑎᑦᑎᔪᓐᓇᕐᒪᑕ.

ᓄᑕᕋᓛᒃᓴᖃᓕᓚᐅᖏᓐᓂᕐᓂ ᑲᐱᔭᐅᔾᔪᑏᑦ ᐊᙳᑎᓯᒪᒐᓗᐊᕐᒪᖔᑕ ᖃᐅᔨᒋᐊᖅᐸᒡᓗᑎᑦ. ᐃᓚᖏᑦ ᑲᐴᑏᑦ, ᓲᕐᓗ ᓄᕙᒡᔪᐊᕐᓇᖏᑦᑐᑦ ᐅᕝᕙᓘᓃᑦ ᖁᐃᖅᓱᑰᔨᓐᓇᖅᑐᒧᑦ ᑲᐱᔭᐅᔾᔪᑏᑦ, ᖁᐊᖅᓵᕐᓇᙱᑦᑑᕗᑦ ᐊᒻᒪᓗ ᐊᑐᖁᔭᐅᓪᓗᑎᒃ ᓄᑕᕋᓛᒃᓴᖃᖅᑎᓪᓗᑎᑦ. ᐋᓐᓂᐊᓯᐅᖅᑎᒋᔭᐃᑦ ᐊᐱᖅᓱᕐᓗᒍ ᓇᓕᐊᖕᓄᑦ ᑲᐴᑎᒧᑦ ᖃᓄᐃᙱᑉᐹᓪᓕᕈᓐᓇᕐᒪᖔᖅᐱᑦ ᓄᑕᕋᓛᒃᓴᐃᓪᓗ.

ᓄᑕᕋᓛᒃᓴᖃᕐᓂᕐᒧᑦ ᖃᐅᔨᓴᖅᑕᐅᓕᕈᕕᑦ ᑲᐴᑏᑦ ᒥᒃᓵᓄᑦ ᐊᐱᕆᔪᓐᓇᖅᐳᑎᑦ ᓇᓕᐊᖕᓂᒃ ᑲᐱᔭᐅᔪᓐᓇᕐᒪᖔᖅᐱᑦ ᐊᒻᒪ ᐅᖃᖃᑎᒋᓗᒍᑦᑕᐅᖅ ᓄᑕᕋᓛᖅ ᑲᐴᑎᖏᑦ ᐱᒻᒪᕆᐅᓂᖏᓐᓂᒃ ᐱᕈᖅᓴᓕᓵᖅᑎᓪᓗᒍ ᑲᐱᔭᐅᖃᑦᑕᕐᓂᕐᒥᒃ ᑐᑭᓯᒋᐊᕐᕕᒋᒃᑲᓂᕐᓗᒍ.

ᓄᑕᕋᓛᑦ ᐊᕐᕕᓂᓖᑦ ᑕᖅᑮᑦ ᑐᖔᓃᑉᐸᑦ ᑲᐱᔭᐅᔪᓐᓇᙱᑦᑐᖅ. ᓄᑕᕋᓛᑦ ᓴᐳᑎᔾᔪᑎᒃᓴᖓᓄᑦ, ᐱᒻᒪᕆᐅᕗᖅ ᐊᖓᔪᖅᑳᖑᔪᑦ ᖃᑕᙳᑎᒋᔭᐅᔪᓪᓗ ᑲᐱᔭᐅᕙᒡᓗᑎᒃ ᓄᕙᒡᔪᐊᕐᓇᙱᑦᑐᒧᑦ. ᐊᑭᖃᙱᑦᑐᖅ ᓄᓇᔅᓯᓐᓂ ᐋᓐᓂᐊᕐᕕᖕᒥ ᐱᔭᒃᓴᐅᓪᓗᓂ .

vaccine

ᓱᐴᖅᑐᖅᐸᙱᓐᓂᖅ ᓄᑕᕋᓛᒃᓴᖃᕐᓗᓂ

ᐃᓅᔪᖃᕐᓂᐊᓕᖅᐸᑦ ᓄᑕᕋᓛᕐᒥᒃ ᓈᒻᒪᑐᒻᒪᕆᐅᕗᕐᓕ ᐊᓈᓇᖑᕐᓂᐊᖅᑐᖅ, ᐊᖓᔪᖅᑳᖑᔪᑦ, ᐊᒻᒪ ᖃᑕᙳᑎᒋᔭᐅᔪᑦ ᓱᐴᖅᑐᑲᑕᐃᓐᓇᓗᐊᕈᓐᓃᕐᓗᑎᒃ ᓄᖅᑲᕐᓗᑎᒡᓘᓃᑦ. ᓱᐴᖅᑐᖃᑦᑕᕐᓂᖅ ᓄᑕᕋᓛᒃᓴᖃᕐᓗᓂ ᖁᐊᖅᓵᕐᓇᖅᑑᖕᒪᑦ ᐊᓂᕐᓂᖃᕈᓐᓃᑐᐃᓐᓇᕆᐊᖃᖅᖢᓂ ᐃᒡᓕᕐᒥᓂ (ᓯᓂᒃᑎᓪᓗᒍ ᐃᒡᓕᕐᒥᓂ ᐊᓂᕐᓂᖃᕈᓐᓃᕐᓗᓂ). ᓱᐴᖅᑐᒐᔪᓗᐊᕈᓐᓃᕐᓗᓂ ᐊᑦᑕᕐᓇᙱᓐᓂᖅᓴᐅᕗᖅ ᐊᓂᕐᓂᖃᕈᓐᓃᕆᐊᒃᓴᖅ ᓯᓂᒃᑎᓪᓗᒍ, ᑭᓯᐊᓂ ᓄᖅᑲᕐᓂᖅ ᓯᒡᒐᓕᐊᒥᒃ ᐊᑲᐅᓛᖑᓪᓗᓂ ᑭᒃᑯᓕᒫᓄᑦ.

ᐊᕐᓇᒥᒃ ᓱᐴᖅᑐᖅᐸᒃᐸᑦ, ᐅᐃᖓᓘᓃᑦ ᖃᑕᙳᑎᖏᓪᓘᓃᑦ ᐊᒻᒪ ᐱᖃᓐᓇᕆᔭᐅᔪᑦ, ᐊᑲᐅᓛᖑᕗᕐᓕ ᓱᐴᖅᑐᖅᐸᒡᓗᓂ ᐊᕐᓇᖅ ᐅᖓᓯᒋᓗᒍ ᕿᒪᒡᓗᒍᓘᓃᑦ ᓯᓚᒧᐊᖔᕐᓗᑎᑦ. ᐊᖏᕐᕋᐃᑦ ᐊᒻᒪ ᐊᒪᐅᑏᑦ ᐳᔪᙳᖅᑎᑉᐸᖏᓪᓗᒍ!  ᐳᔪᖃᖅᐸᙱᓐᓂᖅ ᐊᕙᑎᒥ ᑐᑭᖃᖅᑐᖅ ᓱᐴᖅᑐᖅᑐᖃᖅᐸᖏᑦᑐᖅ ᐅᕝᕙᓘᓃᑦ ᓱᐴᖅᑐᒐᑐᖃᖅᐸᖏᑦᑐᖅ (ᐅᔭᕋᖕᒥᒃ). ᑐᑭᓯᒋᐊᒃᑲᓂᕈᒪᒍᕕᑦ, ᑕᑯᒋᐊᕐᓗᒍ  [Tobacco Reduction Program] ᐅᕝᕙᓘᓃᑦ  [Cannabis] ᖃᕋᓴᐅᔭᐅᑉ ᐃᑭᐊᖅᑭᕕᖓᑎᒍᑦ.

ᐃᒥᐊᓗᖃᑦᑕᖏᓐᓂᖅ ᓄᑕᕋᓛᒃᓴᖃᕐᓗᓂ

ᐊᑦᑕᕐᓇᙱᑦᑑᕗᖅ ᐋᖓᔮᕐᓇᖅᑐᓂᒃ ᐊᑐᖅᐸᙱᓪᓗᓂ ᐃᒥᐊᓗᖕᒥᒡᓘᓃᑦ ᐃᒥᖅᐸᖏᓪᓗᓂ ᓄᑕᕋᓛᒃᓴᖃᕐᓗᓂ. ᐃᑲᔪᖅᑕᐅᔭᕆᐊᖃᕈᕕᑦ ᐊᐱᖅᑯᑎᒃᓴᖃᕈᕕᓪᓘᓃᑦ ᖃᓄᖅ ᐃᒥᐊᓗᒃᑐᖃᑦᑕᙱᑦᑐᓐᓇᕐᒪᖔᖅ ᓄᑕᕋᓛᒃᓴᖃᕐᓂᕐᓂ, ᐋᓐᓂᐊᓯᐅᖅᑎᒧᑦ ᐅᖃᓪᓚᖃᑎᖃᕈᓐᓇᖅᐳᑎᑦ, ᐅᕝᕙᓘᓃᑦ ᑲᙳᒋᖏᑕᕐᓄᑦ ᐅᖃᓪᓚᒍᓐᓇᕆᕗᑎᑦ. ᐃᑲᔪᖅᑕᐅᔪᓗᑎᑦ ᑐᓴᖅᑎᓐᓂᐊᖅᐸᑎᑦ ᐊᑐᓗᐊᖅᑕᐃᓕᒪᓂᕐᒥᒃ.

ᐃᑲᔪᖅᓯᖅᑐᐃᓐᓇᐅᓚᐅᖅᑕ ᐃᒥᐊᓗᖕᒧᑦ ᐊᒃᑐᖅᑕᐅᓂᖃᙱᑦᑐᒥᒃ ᓄᑕᕋᓛᒃᓴᓕᖕᓂᒃ. ᐊᐃᑉᐸᕆᔭᐅᔪᑦ ᐱᖃᓐᓇᕆᔭᐅᔪᓪᓗ: ᐃᑲᔪᕈᓐᓇᖅᐳᓯ!

  • 'ᓄᖅᑲᖓᓚᐅᑲᒡᓗᑎᑦ' ᐃᒥᐊᓗᖕᒥᒃ ᐋᖓᔮᕐᓇᖅᑐᓂᒡᓗ
  • ᐊᓈᓇᒃᓴᐅᔪᖅ ᐃᒥᐊᓗᖃᙱᑦᑐᓂᒃ ᓂᐅᖅᑲᒐᒃᓴᖅᑖᖅᑎᑉᐸᒡᓗᒍ
  • ᖃᓄᑐᐃᓐᓇᖅ ᐱᓕᕆᖃᑎᒋᕙᒡᓗᒍ ᐃᒥᐊᓗᖃᙱᑦᑐᒥ ᐋᖓᔮᕐᓇᖅᑐᖃᙱᑦᑐᒥᓗ
  • ᐃᓅᓯᖓᓂ ᐊᒃᓱᕈᕐᓇᖅᑐᑦ ᐸᓚᖅᑎᓐᓇᓱᒡᓗᒋᑦ − ᖃᓅᔪᓐᓇᕐᒪᖔᖅᐱᑦ ᓄᑕᕋᓛᒃᓴᓕᒃ ᐊᐱᕆᓗᒍ!

ᐃᒥᐊᓗᒃᑐᖃᑦᑕᕐᓂᖅ ᓄᑕᕋᓛᒃᓴᖃᕐᓗᓂ ᐊᒃᑐᐃᓂᖃᓲᖅ ᓄᑕᕋᓛᑉ ᐱᕈᖅᓴᓂᖓᓄᑦ. ᓄᑕᕋᓛᒃᓴᐅᑎᓪᓗᒍ ᐃᒥᐊᓗᖕᒧᑦ ᐃᓕᖅᑯᓯᖅᓱᕈᓐᓃᕐᓂᖅ (ᐃᒡᓕᐊᕐᒥᐅᑕᐅᑎᓪᓗᒍ ᓱᓕ) ᐊᓈᓇᒃᓴᐅᔪᖅ ᐃᒥᐊᓗᖃᑦᑕᕐᓂᕌᖓᑦ ᐱᕈᖅᐸᓪᓕᐊᑎᓪᓗᒍ ᐊᒃᑐᖅᑕᐅᓂᖃᓲᖅ ᐊᖏᒡᓕᕙᓪᓕᐊᓂᖓᓄᑦ. 

ᐃᒥᐊᓗᖕᒧᑦ ᐊᒃᑐᖅᑕᐅᓯᒪᔪᑦ ᐊᔪᕈᑎᖃᓕᓲᑦ ᖃᓄᓕᒫᑦᑎᐊᖅ ᐃᓅᓯᓕᒫᖏᓐᓂ. ᐃᓄᐃᑦ ᕿᑐᕐᖓᒃᓴᕆᔭᐅᑎᓪᓗᒋᑦ ᐃᒥᐊᓗᖕᒧᑦ ᐊᒃᑐᖅᑕᐅᓂᖃᖅᑐᑦ ᐃᓕᑦᑐᓇᖃᑦᑕᖏᑦᑐᑦ, ᐆᒻᒪᑎᓪᓗᒃᐸᒃᖢᑎᒃ, ᐃᓱᒪᒃᑯᑦ ᐋᓐᓂᐊᕈᑎᖃᖅᖢᑎᒃ, ᐅᐸᓗᔭᑦᑐᑦ, ᐊᓯᖏᓐᓂᒡᓗ ᐊᔪᕐᓇᖅᑐᖅᓯᐅᕈᑎᖃᓲᑦ. ᐃᑲᔪᖅᑕᐅᓐᓇᖅᑐᖅ − ᐃᖢᐊᖅᓴᐃᔩᑦ ᓘᒃᑖᕆᔭᐅᓪᓘᓃᑦ ᐅᖃᓪᓚᖃᑎᒋᓗᒋᑦ ᖃᓄᖅ ᐃᒥᐊᓗᖕᒧᑦ ᐊᒃᑐᖅᑕᐅᓯᒪᓂᖃᖅᑐᑦ ᐱᔪᓐᓇᕐᒪᖔᑕ ᓄᓇᕗᒻᒥᐅᑦ.

ᐊᐱᖅᑯᑕᐅᒐᔪᒃᑐᑦ ᐃᒥᐊᓗᖕᒧᑦ ᐊᒃᑐᖅᑕᐅᓯᒪᓂᐅᑉ ᒥᒃᓵᓄᑦ

ᖃᓄᑎᒋ ᐃᒥᖅᑎᒋᔪᓐᓇᖅᐳᖓ ᖁᐊᖅᓵᕐᓇᖅᑐᒧᐊᖅᓯᖏᓪᓗᖓ ᓄᑕᕋᓛᒃᓴᖃᕐᓂᓐᓂ?

ᖁᐊᖅᓵᕐᓇᙱᓛᖑᕗᖅ ᐃᒥᖅᐸᙱᑦᑎᐊᒻᒪᕆᒡᓗᓂ ᓄᑕᕋᓛᖅ ᐃᓅᓚᐅᙱᓐᓂᖓᓂ. ᐱᐊ, ᕙᐃᓂ, ᓴᙱᔪᐃᓪᓗ ᐃᒥᐊᓗᐃᑦ ᐊᑕᐅᓯᕐᒥᒃ ᐊᒃᑐᐃᓂᖃᕐᒪᑕ ᓄᑕᕋᓛᒃᓴᒧᑦ. ᐃᒥᖅᐸᙱᓐᓂᖅᓴᐅᓗᓂ ᐊᑲᐅᔪᖅ ᓄᑕᕋᓛᒃᓴᒧᑦ, ᐱᖃᑦᑕᙱᑦᑎᐊᒻᒪᕆᖕᓂᖅ ᐱᐅᓛᖑᓪᓗᓂ. ᐃᓱᒪᒃᓴᖅᓯᐅᖅᑎᓪᓗᑎᑦ ᐃᒥᐊᓗᒃᑐᙱᑉᐹᓪᓕᕋᓱᖕᓂᕐᒥᒃ, ᐋᓐᓂᐊᖅᓯᐅᑎᒧᑦ ᐅᖃᓪᓚᖃᑎᖃᕐᓗᑎᑦ ᖃᓄᕐᓗ ᐃᑲᔪᖅᑕᐅᒃᑲᓂᕈᓐᓇᕐᒪᖔᖅᐱᑦ ᐊᐱᖅᓱᕐᓗᑎᑦ.

ᓄᑕᕋᓛᒃᓴᖃᕐᓗᓂ ᖃᖓᒃᑯᑦ ᖁᐊᖅᓵᕐᓇᙱᓚᖅ ᐃᒥᕆᐊᒃᓴᖅ?

ᖃᐅᔨᒪᔭᐅᙱᑦᑐᖅ ᖃᖓᒃᑯᑦ ᓈᒻᒪᖕᒪᖔᑦ ᓄᑕᕋᓛᒃᓴᖃᕐᓗᓂ ᐃᒥᕆᐊᒃᓴᖅ. ᓄᑕᕋᓛᒃᓴᐅᑉ ᖃᕋᓴᖓ ᐱᕈᖅᓴᐃᓐᓇᓲᖑᖕᒪᑦ ᑕᖅᑭᓄᑦ 9−ᓄᑦ. ᐱᖓᓱᑦ ᑕᖅᑮᑦ ᓯᕗᓪᓖᑦ (ᓄᑕᕋᓛᒃᓴᖃᓕᕐᓗᓂ) ᐱᒻᒪᕆᐊᓘᔪᖅ, ᐃᓕᖕᓂᒃ ᑲᒪᒋᑦᑎᐊᕆᑦ ᐊᒻᒪ ᐃᑲᔪᖅᑎᑖᕐᓗᑎᑦ ᐃᒥᐊᓗᖃᙱᑦᑐᒥ ᓄᑕᕋᓛᒃᓴᖃᕐᓂᐊᕋᕕᑦ ᐃᑲᔪᖅᑕᐅᔭᕆᐊᖃᕈᕕᑦ.

ᖃᓄᕐᓕ ᓄᑕᕋᓛᒃᓴᖃᕐᓂᓐᓂ ᖃᐅᔨᒪᖏᓪᓗᖓ ᐃᒥᐊᓗᖕᒥᒃ ᐃᒥᕐᓂᕈᒪ?

ᐃᒥᐊᓗᒃᑐᖃᑦᑕᕈᓐᓃᑲᐅᑎᒋᓗᑎᑦ ᖃᐅᔨᒍᕕᑦ ᓄᑕᕋᓛᒃᓴᖃᕐᓂᕐᓂ. ᓄᖃᕐᓗᓂ ᐃᒥᐊᓗᖕᒥᒃ ᖃᖓᑐᐃᓐᓇ ᐊᑑᑎᖃᑦᑎᐊᖅᐳᖅ, ᓲᖃᐃᒻᒪ ᓄᑕᕋᓛᒃᓴᐅᑉ ᖃᕋᓴᖓ ᐱᕈᖅᐸᓪᓕᐊᖏᓐᓇᖃᑦᑕᕐᒪᑦ. ᓄᑕᕋᓛᒃᓴᕆᔭᐃᑦ ᖃᓄᐃᓐᓇᓱᒋᒍᕕᐅᒃ, ᐋᓐᓂᐊᓯᐅᖅᑎᒥᒃ ᐅᖃᓪᓚᖃᑎᖃᕐᓗᑎᑦ.

ᖃᐅᔨᒪᓕᖅᐹᓪᓕᕈᒪᒍᕕᑦ ᐃᒥᐊᓗᖕᒧᑦ ᐊᒃᑐᖅᑕᐅᓯᒪᓂᐅᑉ ᒥᒃᓵᓄᑦ, ᐋᓐᓂᐊᓯᐅᖅᑎᒧᑦ ᐅᖃᓪᓚᒡᓗᑎᑦ ᓄᓇᒋᔭᕐᓂ ᐋᓐᓂᐊᕐᕕᖕᒥᓘᓃᑦ.