ᐃᓅᑉ ᐃᓱᒪᒃᑯᑦ ᐋᓐᓂᐊᖅᑐᓕᕆᓂᕐᒧᑦ ᐊᒃᑐᖅᑕᐅᔪᓐᓇᖅᐳᖅ ᐊᒥᓱᓄᑦ ᐊᔾᔨᒌᙱᑦᑐᓄᑦ ᖃᓄᕐᓗ ᐊᖏᑎᒋᓂᖏᓐᓄᑦ ᐃᓱᒪᒃᑯᑦ ᐋᓐᓂᐊᖅᑐᓕᕆᓂᒧᑦ ᐊᑲᐅᙱᓕᐅᕈᑕᐅᕙᒃᑐᑦ ᐋᓐᓂᐊᕆᔭᐅᕙᒃᑐᓪᓗ ᐊᔾᔨᒌᙱᓐᓂᖃᕐᔪᐊᖅᐸᒃᐳᑦ. ᐊᒥᓱᑦ ᐃᓄᐃᑦ ᖃᑕᙳᑎᒌᓪᓗ ᐊᒃᑐᖅᑕᐅᕙᒃᐳᑦ ᐃᓱᒪᒃᑯᑦ ᐋᓐᓂᐊᖅᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᕙᒃᑐᓄᑦ ᐋᓐᓂᐊᕆᔭᐅᕙᒃᑐᓄᓪᓗ. ᑲᓇᑕᒥ, ᐊᑕᐅᓯᖅ ᐃᓄᖕᓂᑦ 5−ᓂ ᐃᓱᒪᒃᑯᑦ ᐋᓐᓂᐊᕐᓂᖃᓕᕐᓂᐊᖅᒍᐳᖅ ᐃᓅᓯᖓᑕ ᐃᓚᖓᓂ. ᐃᓱᒪᒃᑯᑦ ᐋᓐᓂᐊᕐᓂᖅ ᐊᒃᑐᖅᓯᕙᒃᐳᖅ ᐃᓄᖕᓂᑦ ᖃᓄᖅ ᐊᕐᕌᒎᖃᕋᓗᐊᖅᐸᑕ, ᐊᕐᓇᐅᒐᓗᐊᖅᐸᑕ/ᐊᖑᑕᐅᒐᓗᐊᖅᐸᑕ, ᖃᓄᖅ ᐃᓕᖅᑯᓯᖃᕋᓗᐊᖅᐸᑕ, ᖃᓄᕐᓗ ᐃᓕᓐᓂᐊᖅᓯᒪᑎᒋᖕᒪᖔᑕ ᖃᓄᕐᓗ ᑮᓇᐅᔾᔭᒃᓴᕐᓂᖃᖅᑎᒋᒐᓗᐊᖅᐸᑕ. ᐃᓱᒪᒃᑯᑦ ᐋᓐᓂᐊᕐᓂᖅ ᐊᒃᑐᖅᓯᓂᖃᖅᐸᒃᐳᖅ ᑕᒪᐃᓐᓂᒃ ᑲᓇᑕᒥᐅᓂᒃᐃᓅᓯᖏᑕ ᐃᓚᖓᓂ ᖃᑕᙳᑎᒥᑎᒍᑦ, ᐱᖃᓐᓇᕆᔭᒥᓂᑎᒍᑦ, ᐃᖅᑲᓇᐃᔭᖃᑎᒋᔭᒥᑎᒍᓪᓘᓐᓃᑦ.
ᐃᓱᒪᒃᑯᑦ ᐋᓐᓂᐊᕐᓂᖅ ᐊᒃᑐᖅᓯᕙᒃᐳᖅ ᐃᓱᒪᒥᒃ, ᐃᒃᐱᒋᔭᐅᔪᓂᒃ, ᑎᒥᒥᒡᓗ. ᑕᒪᓐᓇ ᐊᔪᕐᓇᖅᑎᑦᑎᕙᒃᐳᖅ ᐃᓱᒪᑦᑎᐊᕆᐊᒃᓴᖅ, ᑲᒪᒋᔭᖃᕐᓂᐊᕐᓗᓂ ᖃᓄᖅ ᐃᒃᐱᒋᔭᖃᕐᒪᖔᑕ, ᖃᓄᕐᓗ ᐊᑐᖅᓯᓕᖅᐸᖕᒪᖔᑕ ᖃᐅᑕᒫᑦ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ. ᓲᕐᓗ ᑎᒥᒃᑯᑦ ᐊᓐᓂᐊᑉᓂᕆᔭᐅᕙᑦᑐᑎᒍᑦ, ᐃᓱᒪᒃᑯᑦ ᐋᓐᓂᐊᕐᓂᖅ ᐊᔾᔨᒌᙱᕈᓘᔭᖅᑐᑎᒎᕈᓐᓇᖅᐳᖅ. ᑖᓐᓇ ᐊᔾᔨᖃᙱᓚᖅ ᑎᒥᒃᑯᑦ ᐋᓐᓂᐊᕆᔭᐅᔪᒥᑦ ᐃᒪᐃᓐᓂᖓᓄᑦ, ᐊᒥᓱᐃᑦ ᐃᓄᐃᑦ ᑐᑭᓯᓂᕐᓗᒃᐸᒃᐳᑦ ᐃᓄᖕᓂᒃ ᐃᓅᓯᖃᖅᑐᓂᒃ ᐃᓱᒪᒃᑯᑦ ᐋᓐᓂᐊᕐᓂᖃᖅᖢᑎᒃ ᐃᒪᐃᓐᓂᖓᓄᑦ, ᑕᒪᒃᑯᐊ ᖃᐅᔨᔾᔪᑕᐅᔪᓐᓴᖅᑐᑦ ᑎᒥᒥᓗ ᖃᓄᐃᓐᓂᕆᔭᐅᔪᑦ ᑕᑯᒃᓴᐅᙱᓇᐅᔭᖅᐸᙱᒻᒪᑕ. ᑕᐃᒪᐃᓐᓂᖓᓄᑦ ᐃᓄᐃᑦ ᐃᓱᒪᒥᒍᑦ ᐋᓐᓂᐊᓖᑦ ᑲᙳᓱᒐᔪᒃᐸᒃᐳᑦ ᐅᕝᕙᓘᓐᓃᑦ ᐃᒻᒥᓂᒃ ᐸᓯᔭᒃᓴᐅᑎᓕᖅᐸᒃᐳᑦ.
ᐃᓄᐃᑦ ᐃᓅᓯᓖᑦ ᐃᓱᒪᒃᑯᑦ ᐋᓐᓂᐊᖃᖅᖢᑎᒃ ᐊᑐᕈᓐᓇᕆᕗᑦᑕᐅᖅ ᐱᐅᙱᓐᓇᓱᒋᔭᐅᓂᕐᒥᒃ− ᐱᐅᙱᑦᑐᓂᒃ ᐃᓱᒪᒋᔭᐅᔪᓂᒃ ᐃᓕᖅᑯᓯᕆᔭᐅᔪᓂᒡᓗ ᐊᓯᖏᑕ ᐅᖃᐅᓯᕆᕙᒃᑕᖏᑦ ᐃᓄᖕᓄᑦ ᐃᓱᒪᒥᒍᑦ ᐊᓐᓂᐊᕈᑎᖃᕐᓂᕐᒧᑦ ᐊᑲᐅᙱᓕᐅᕈᑎᓕᖕᓄᑦ.
ᐱᑕᖃᖅᐳᖅ ᐊᑐᖅᑕᐅᔪᓐᓇᖅᑐᓂᒃ ᒥᑭᒡᓕᒋᐊᖅᑎᑦᑎᓂᐊᕐᓗᓂ ᐱᐅᙱᓐᓇᓱᒋᕙᖕᓂᕐᒥᒃ:
- ᖃᐅᔨᒪᓗᒋᑦ ᓱᓕᔪᑦ ᐃᓕᑦᑎᒃᑲᓐᓂᖅᑐᖃᕐᓗᓂ ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᐊᑲᐅᙱᓕᐅᕈᑕᐅᕙᒃᑐᓂᒃ−ᓱᓕᔪᓂᒃ, ᐃᒪᓐᓇᐅᓇᓱᒋᓐᓈᙱᖔᖅᑐᓂᒃ.
- ᐅᔾᔨᕈᓱᑦᑎᐊᕆᑦ ᐃᓕᖅᑯᓯᕆᕙᒃᑕᕐᓂᒃ ᑕᑯᓗᒋᑦ ᐃᓄᐃᑦ ᐊᔾᔨᖃᙱᖦᖢᑎᒃ ᐃᓅᓂᖏᓐᓂᒃ, ᐃᒪᓐᓇᐅᓇᓱᒋᔭᐅᙱᖔᕐᓂᖏᓐᓂᒃ.
- ᓂᕈᐊᕆᓗᒋᑦ ᐅᖃᐅᓯᕆᓂᐊᖅᑕᑎᑦ ᐅᔾᔨᖅᓱᑦᑎᐊᕐᓗᑎᑦ ᐅᖃᐅᓯᖃᓕᕌᖓᕕᑦ ᐅᖃᖃᑎᖃᓕᕌᖓᕕᓪᓗ ᐃᓄᖕᓂᒃ ᐃᓱᒪᒥᒍᑦ ᐊᓐᓂᐊᖃᕐᓂᕐᒧᑦ ᐊᑲᐅᙱᓕᐅᕈᑎᓕᖕᓂᒃ.
- ᐊᓯᑎᑦ ᐃᓕᑎᓪᓗᒋᑦ. ᐅᖃᐅᓯᕆᕙᒡᓗᒋᑦ ᓱᓕᔪᑦ ᐃᓕᖅᑯᓯᑦᑎᐊᕙᒋᔭᐅᔪᓐᓇᖅᑐᓪᓗ ᐱᔾᔪᑎᓖᑦ ᐃᓄᖕᓂᒃ ᐃᓱᒪᒥᒍᑦ ᐋᓐᓂᐊᖃᕐᓂᕐᒧᑦ ᐊᑲᐅᙱᓕᐅᕈᑎᓕᖕᓂᒃ.
- ᑕᐅᑐᒐᖃᓪᓗᐊᑕᕐᕕᒋᓗᒍ ᐱᐅᔪᖅ. ᑭᒃᑯᑐᐃᓐᓇᖅᑎᑐᑦᑕᐅᖅ, ᑕᒪᒃᑯᐊ ᐃᓄᐃᑦ ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᐊᑲᐅᙱᓕᐅᕈᑎᓖᑦ ᐃᑲᔪᖅᐸᒃᑭᕗᑦ ᐃᓅᖃᑎᒌᒃᐸᒃᑐᓄᑦ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᕙᒃᑐᑦ ᐃᓚᒋᔭᐅᑐᐃᓐᓇᖅᐳᑦ ᑭᓇᐅᓂᑦᑎᓐᓄᑦ.
- ᐃᑲᔪᖅᑐᖅᐸᒡᓗᒋᑦ ᐃᓄᐃᑦ. ᑲᒪᒋᔭᖃᕐᕕᒋᕙᒡᓗᒋᑦ ᐃᓄᐃᑦ ᐃᓱᒪᒋᑦᑎᐊᕐᓗᒋᑦ ᐃᒃᐱᒋᑦᑎᐊᕐᓗᒋᓪᓗ. ᐃᑲᔪᖅᑐᖅᐸᒡᓗᒋᑦ ᓂᕈᐊᕆᔭᖏᑦ ᑎᓕᐅᕐᓗᒋᓪᓗᑦ ᑲᔪᓯᓂᖃᑦᑎᐊᖁᓗᒋᑦ ᐱᓇᔪᖕᓂᕆᔭᖏᓐᓂᒃ ᖃᓄᐃᑦᑐᓃᕈᒪᓂᕐᒥᒃ.
- ᐃᓚᐅᑎᑉᐸᒡᓗᒋᑦ ᑕᒪᕐᒥᑦᑎᐊᖅ. ᐃᓄᐃᑦ ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᐊᑲᐅᙱᓕᐅᕈᑎᓖᑦ ᐱᔪᓐᓇᐅᑎᖃᖅᐳᑦ ᓇᓕᒧᒃᓱᖅᑐᒥᒃ ᐃᓚᐅᔪᓐᓇᕐᓂᕐᒥᒃ ᐃᓅᖃᑎᒌᓂ.
