ᖁᒃᓴᓱᖕᓂᖅ ᐊᒻᒪ ᖁᒃᓴᓱᖕᓂᕐᒧᑦ ᐊᔪᕈᑎᓕᒃ

ᖁᒃᓴᓱᖕᓂᖅ ᐊᔾᔨᒌᖏᑦᑐᓂᒃ ᐃᒃᐱᖕᓂᐊᓂᐅᔪᓐᓇᖅᑐᖅ ᖁᓱᓗᓂ, ᐱᖏᒐᒃᓗᓂ, ᑲᑉᐱᐊᓱᒃᓗᓂ, ᐃᖢᕐᕆᙱᓪᓗᓂᓗ ᖃᓄᐃᓕᐅᕐᓇᐅᓂᐊᖅᑐᒧᑦ ᐊᑐᖅᑐᒧᓪᓘᓐᓃᑦ−ᐊᑐᓪᓚᑦᑖᖅᑐᒧᑦ ᐃᓱᒪᒋᑐᐃᓐᓇᖅᑕᒧᓪᓘᓐᓃᑦ. ᑭᒃᑯᓕᒫᑦ ᖁᒃᓴᓱᓲᑦ ᖃᖓᐅᓕᕌᖓᑦ, ᑭᓯᐊᓂ ᐃᓚᖏᑦ ᐃᓄᐃᑦ ᖁᒃᓴᓱᒐᔪᒃᑐᑦ ᐊᐅᓚᑦᑎᖔᓕᖅᐸᒃᖢᑎᒃ ᐃᓅᓯᖏᓐᓂ.

ᑐᑭᓕᐅᕆᓗᒍ, ᐃᓄᒃ ᖁᒃᓴᓱᒍᓐᓇᖅᑐᖅ ᑭᒍᑎᓕᕆᔨᓕᐊᕐᓂᐊᓕᕈᓂ ᐃᖅᑲᓇᐃᔮᒃᓴᒧᓪᓘᓐᓃᑦ ᐊᐱᖅᓱᖅᑕᐅᓂᕐᒧᑦ. ᐃᓄᒃ ᖁᒃᓴᓱᖕᓂᕐᒧᑦ ᐊᔪᕈᑎᓕᒃ ᖁᒃᓴᓱᒍᓐᓇᖅᑐᑦ ᐊᖏᕐᕋᖏᓐᓂ ᐊᓂᑐᐊᕌᖓᑕ ᐊᒃᑑᑎᕙᒃᖢᓂᓗ ᐱᔪᓐᓇᕐᓂᖏᓐᓂ ᐃᓅᖃᑎᖃᕐᓂᕐᒥᒃ ᐊᓯᒥᖕᓂᒃ ᐱᔭᕇᖅᓯᖃᑦᑕᕐᓂᕐᓂᒃᓗ ᖃᐅᑕᒫᑦ ᖃᓄᐃᓕᐅᕈᑎᓂᒃ.

ᐊᔪᕐᓇᙲᓐᓇᐅᔭᒋᑦᑐᖅ ᖃᐅᔨᓗᓂ ᑕᐃᒪᐃᒻᒪᖔᑦ ᖃᖓᓘᓐᓃᑦ ᖃᐅᑕᒫᑦ ᖁᒃᓴᓱᖕᓂᖅ ᐅᖓᑕᐅᔾᔨᒃᐸᑦ ᐊᔪᓕᕈᑎᖃᕐᓂᕐᒧᑦ.  ᐃᑲᔪᖅᑕᐅᔪᒪᓗᑎᑦ ᐋᓐᓂᐊᕕᖕᒧᑦ ᖁᒃᓴᓱᖕᓂᕐᒧᑦ ᐊᔪᕈᑎᖃᕋᓱᒋᒍᕕᑦ. ᖃᐅᔨᒪᔭᐅᖏᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖃᓗᒍᓐᓇᖅᐳᑎᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᖕᒧᑦ ᐅᕗᖓ 1-800-265-3333.

ᑭᓇᒥᑭᐊᖅ ᐊᑦᑕᕐᓇᖅᑐᒦᓐᓇᓱᒋᓐᓈᒍᕕᑦ ᐋᓐᓂᕐᓂᐊᕆᐊᒃᓴᖏᓐᓂᒃ ᐃᖕᒥᖕᓂᒃ ᐊᓯᖏᓐᓂᒃᓘᓐᓃᑦ, ᐋᓐᓂᐊᕕᓕᐊᕈᑎᓗᒋᑦ ᐃᕐᖐᓐᓇᖅ ᐸᓖᓯᒃᑯᓐᓄᓪᓘᓐᓃᑦ ᐅᖃᓗᒃᓗᑎᑦ.

ᖃᓄᐃᑦᑑᓂᖏᑦ ᖁᒃᓴᓱᖕᓂᕐᒧᑦ ᐊᔪᕈᑏᑦ

ᐱᖏᒍᓱᓗᐊᕐᓂᖅ

ᐃᓄᒃ ᐱᖏᒍᓱᖃᑦᑕᓗᐊᖅᐸᑦ ᖃᐅᑕᒫᖅᓯᐅᑎᓂᒃ−ᐊᖏᔪᓄᑦ ᒥᑭᑦᑐᓄᓪᓘᓐᓃᑦ−ᐊᑐᕈᑎᖃᑐᐃᓐᓇᕆᐊᖃᖅᑐᑦ ᐊᑐᒐᔪᒃᑐᒥᒃ ᖁᒃᓴᓱᖕᓂᕐᒧᑦ ᐊᔪᕈᑎᓂᒃ, ᐊᖏᓛᖑᓪᓗᓂ ᖃᓄᐃᑦᑑᓂᖓ. ᖃᓄᑎᒋ ᐱᓗᐊᓕᕋᔭᖅᐸ ᐱᖏᒍᓱᖕᓂᕐᒥᒃ?

  • ᖁᒃᓴᓱᐃᓐᓇᐅᔭᕐᓗᓂ ᐃᓱᒪᖃᖃᑦᑕᕐᓂᕐᒥᒃ ᐊᒥᓲᓂᖅᓴᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ, ᑕᖅᑭᓗᑦ ᐊᕐᕕᓂᓕᖕᓄᑦ ᐅᖓᑖᓄᓪᓘᓐᓃᑦ.
  • ᖁᒃᓴᓱᖕᓂᖅ ᐊᒃᕕᐊᓕᖅᐸᒃᓗᓂ ᖃᐅᑕᒫᑦ ᐃᓅᓯᕐᒥ ᖃᐅᑕᒫᖅᓯᐅᑎᓂᒃᓗ ᖃᓄᐃᓕᐅᕈᑎᓄᑦ.
  • ᖃᐅᔨᒪᓇᖅᑐᓂᒃ ᖃᐅᔨᔾᔪᑕᐅᔪᓐᓇᖅᑐᖃᕐᓗᓂ, ᓲᕐᓗ ᓄᑭᑭᓪᓗᓂ, ᓄᑭᒃᑯᑦ ᓱᑲᖓᓗᐊᕐᓗᓂ, ᓯᓂᑦᑎᐊᖃᑦᑕᙱᓪᓗᓂᓗ.
  • ᐃᒃᐱᖕᓂᐊᓃᑦ ᐱᑎᑦᑎᓗᑎᒃ ᐊᒃᓱᕈᖅᑎᑦᑎᓗᐊᕐᓂᕐᒥᒃ ᐊᐅᓚᑦᑎᐊᙱᓐᓂᕐᒥᒃᓗ.

ᓯᓂᖕᓂᕐᒧᑦ ᐊᑲᐅᙱᓕᐅᕈᑎᑦ

ᓯᓂᓕᕈᓐᓇᐃᓪᓕᖃᑦᑕᕐᓂᖅ ᓯᓃᓐᓇᕈᓐᓇᙱᓐᓂᕐᓗ ᐃᓚᒋᔭᐅᔪᖅ ᐅᓄᖅᑐᓄᑦ ᐃᓱᒪᒃᑯᑦ ᐋᓐᓂᐊᕈᑎᖃᕐᓂᕐᓄᑦ. ᐊᑐᒐᔪᒃᑐᖅ ᐃᓄᒃ ᐊᐅᓚᑲᑕᒃᓗᓂ ᓯᓂᖕᓇᒥ ᐱᒻᒪᕆᐅᔪᒧᑦ ᐊᑐᕐᓂᐊᖅᑐᖃᖅᑎᓪᓗᒍ, ᑭᓯᐊᓂ ᐃᓄᒃ ᐃᖅᑯᒪᐃᓐᓇᐅᔭᕐᓗᓂ ᐱᖏᒍᓱᒃᐸᒃᓗᓂᓗ−ᑭᓱᒧᒃᑭᐊᖅ ᐊᑲᐅᙱᓕᐅᕈᑎᒧᑦ ᑭᓲᖏᑦᑐᕐᒧᓪᓘᓐᓃᑦ−ᖁᒃᓴᓱᖕᓂᕐᒧᑦ ᐊᔪᕈᑎᖃᑐᐃᓐᓇᕆᐊᓕᒃ.

ᐱᔾᔪᑎᖃᑦᑎᐊᙱᓪᓗᓂ ᑲᑉᐱᐊᓱᑲᑕᖕᓃᑦ ᑭᓱᒧᓪᓘᓐᓃᑦ ᑲᑉᐱᐊᓲᑎᓕᒃ

ᐃᓚᖏᑦ ᖁᒃᓴᓱᖕᓇᑦ ᐊᒃᑐᐊᓂᖃᖅᑐᑦ ᑭᓱᒧᑭᐊᖅ ᐊᑐᖅᑐᓄᓪᓘᓐᓃᑦ−ᓲᕐᓗ ᐃᓄᒋᐊᒃᑐᓂ, ᖃᖓᑕᓂᕐᒥ, ᖁᑦᑎᓗᐊᖅᑐᒦᑦᑕᕆᐊᒃᓴᕐᓘᓐᓃᑦ. ᐃᓅᑉ ᑲᑉᐱᐊᓱᖕᓂᖓ ᓴᙱᓂᖃᓗᐊᖅᐸᑦ, ᑭᓱᒧᑦ ᑲᑉᐱᐊᓲᑎᐅᔪᓐᓇᖅᑐᖅ−ᐊᔾᔨᕐᓚᖓ ᖁᒃᓴᓱᖕᓇᖅ ᐊᔪᕈᑎ. ᐃᓚᖏᑦ ᑭᓱᒧᑦ ᑲᑉᐱᐊᓲᑎᑦ ᓇᓗᓇᖅᑰᔨᔪᑦ. ᐃᓄᒃ ᐊᕐᕌᒍᒐᓴᖕᓅᔪᓐᓇᖅᑐᖅ ᑲᒪᒋᔭᕆᐊᖃᙱᓪᓗᓂᐅᒃ. ᑐᑭᓕᐅᕆᓗᒍ, ᖃᖓᑕᔭᕆᐊᒃᓴᖅ ᑲᑉᐱᐊᓱᖃᑦᑕᕈᕕᑦ, ᑭᓯᐊᓂ ᖃᖓᑕᓲᒧᐊᓚᐅᖅᓯᒪᙱᓪᓗᑎᑦ. ᐃᓚᖏᑦ ᐃᓄᐃᑦ ᑲᒪᒋᔭᕋᕆᐊᖃᓲᑦ ᑭᓱᒧᑦ ᑲᑉᐱᐊᒋᔭᖃᕐᓂᕐᒥᒃ ᖃᐅᑕᒫᑦ.

ᐊᓇᕈᓱᖕᓇᖅᑐᒃᑰᖏᓐᓇᐅᔭᖅᑐᖅ

ᖁᒃᓴᓱᖕᓂᖅ ᐱᒋᐊᕈᓐᓇᖅᑐᖅ ᐃᓱᒪᒃᑯᑦ, ᑭᓯᐊᓂ ᖃᐅᔨᒪᓇᕈᑎᑦ ᓴᖅᑭᒐᔪᒃᑐᑦ ᑎᒥᒥ. ᐸᒃᕕᓇᖅᑐᖅ ᐊᓇᖃᑦᑕᕐᓂᕐᒨᖓᔪᒃᑯᑦ ᐃᓚᐅᑎᑦᑎᔪᖅ ᓈᖑᓂᕐᓂ, ᕿᓗᔨᓂᖅ, ᐳᓪᓚᒃᓯᒪᓂᖅ, ᓂᓪᓚᔭᖕᓂᖅ, ᐊᓇᕈᓐᓇᐃᓪᓕᓂᖅ, ᐊᒻᒪᓘᓐᓃᑦ ᐊᕿᑦᑐᖅᓱᕐᓂᖅ. ᐸᒃᕕᓇᖅᑐᖅ ᐊᓇᖃᑦᑕᕐᓂᕐᒨᖓᔪᒃᑯᑦ ᐊᒃᑐᐊᓂᖃᐃᓐᓇᖃᑦᑕᙱᑦᑐᖅ ᖁᒃᓴᓱᖕᓂᕐᒥᒃ, ᑭᓯᐊᓂ ᑖᒃᑯᐊ ᒪᕐᕉᒃ ᐊᑐᕈᓐᓇᖅᑐᑦ ᐊᑕᐅᑦᑎᒃᑯᑦ ᐱᓗᐊᖅᑎᑦᑎᒃᑲᓐᓂᕐᓂᖅᓴᐅᓗᑎᒃᓗ. 

ᐃᓅᖃᑎᒌᖕᓂᕐᒥᒃ ᖁᒃᓴᓱᖕᓂᖅ

ᐊᑐᖅᑕᐅᒐᔪᒃᑐᖅ ᓇᖕᒥᓂᕐᒧᑦ ᐅᔾᔨᖅᓲᑎᓗᓂ ᖃᐅᔨᒪᙱᑕᖏᓐᓂᒃ ᑕᑯᓕᓵᕌᖓᒥᒃ ᐅᖃᓪᓚᒋᐊᖅᑐᖅᓯᒪᓗᓂᓘᓐᓃᑦ.  ᐃᓄᖕᓄᑦ ᐃᓅᖃᑎᒌᖕᓂᕐᒥᒃ ᖁᒃᓴᓱᖕᓂᕐᒥᒃ ᐊᔪᕈᑎᓕᖕᓄᑦ, ᑖᓐᓇ ᖁᒃᓴᓱᖕᓇᖅ ᐱᓗᐊᖅᑐᐊᓗᒃ ᐱᑕᖃᖅᐸᒃᖢᓂᓗ ᖃᐅᑕᒫᑦ ᐊᑐᖅᑐᒃᑯᑦ ᓲᕐᓗ ᑕᐅᑐᖃᑦᑕᐅᑎᓗᑎᒃ ᐃᓄᑑᔫᒃ ᐅᖃᖃᑎᒌᖕᓂᕐᓂ. ᐃᓄᐃᑦ ᐃᓅᖃᑎᒌᖕᓂᕐᒧᑦ ᖁᒃᓴᓱᖕᓂᕐᒥ ᐊᔪᕈᑎᓖᑦ ᐃᓄᓕᒫᓄᑦ ᑕᐅᑐᒃᑕᐅᓇᓱᒋᓲᑦ. ᐊᐅᐸᓪᓕᕈᓐᓇᖅᑐᑦ, ᓴᔪᒃᐱᓪᓚᒃᓗᑎᒃ, ᒥᕆᐊᙳᖅᑰᔨᓗᑎᒃ, ᐅᖅᑰᓂᕐᒧᑦ ᖃᐅᓯᒐᔪᒃᓗᑎᒃ, ᐅᖃᓪᓚᑦᑎᐊᕈᓐᓇᙱᓪᓗᑎᒃᓗ. ᖃᐅᔨᒪᓇᕈᑎᑦ ᐊᔪᕐᓇᓗᐊᕈᓐᓇᕐᓂᖏᓐᓄᑦ ᐊᒃᓱᕈᕐᓇᕆᔭᖏᑦ ᖃᐅᔨᒪᙱᑕᖏᓐᓂᒃ ᐃᓄᖕᓂᒃ ᑲᑎᖃᑎᖃᕆᐊᒃᓴᖅ, ᖃᓂᒋᔭᖃᕆᐊᒃᓴᖅ ᐃᓄᖕᒥᒃ, ᐱᓕᕆᑦᑎᐊᕈᓐᓇᕐᓂᕐᒥᒃ ᐃᖅᑲᓇᐃᔮᒥ ᐃᓕᓐᓂᐊᕐᕕᖕᒥᒃᓘᓐᓃᑦ.

ᐅᐃᒻᒪᖕᓂᖅ

ᐅᐃᒻᒪᖕᓂᖅ ᐃᑳᓪᓚᒃᓗᓂ ᐃᒃᐱᒍᓱᖕᓂᐅᔪᖅ ᑲᑉᐱᐊᓱᖕᓂᕐᒥᒃ ᖃᔅᓯᑲᓪᓚᒃᑯᑦ ᑎᑦᑕᑯᓗᒃᑎᒎᕈᓐᓇᖅᑐᖅ. ᐃᓚᖏᑦ ᐃᓄᐃᑦ ᐆᒻᒪᑎᖏᑦ ᓱᒃᑲᓕᓕᕈᓐᓇᖅᑐᑦ, ᐊᓂᖅᑎᕆᑦᑎᐊᕈᓐᓃᕐᓗᑎᒃ, ᑲᐱᒐᓛᖕᓂᖅ ᐃᒃᐱᖕᓂᐊᔪᓐᓃᕐᓂᕐᓘᓐᓃᑦ ᐊᒡᒐᒃᑯᑦ, ᖃᐅᓯᕐᔪᐊᕐᓗᑎᒃ, ᓈᒃᑯᓪᓗ ᓴᒡᕕᒃᑯᓪᓗ ᐋᓐᓂᕐᓂᖃᕐᓗᑎᒃ. ᐃᓄᐃᑦ ᐊᑐᒐᔪᒃᑐᑦ ᐅᐃᒻᒪᖕᓂᕐᒥᒃ ᖁᒃᓴᓱᖕᓂᕐᒧᑦ ᐊᔪᕈᑎᖃᑐᐃᓐᓇᕆᐊᓕᑦ.

ᐃᖅᑲᐃᓯᕐᓘᑎᔾᔪᑎᑦ

ᐊᑐᒃᑲᓐᓂᕐᓂᖅ ᐅᓚᕕᓐᓇᖅᑐᒥᒃ ᐊᒃᓱᕈᓗᐊᕐᓇᖅᑐᒥᒃᓘᓐᓃᑦ ᐊᑐᕐᓂᑯᒥᑦ ᐊᑐᖅᑕᐅᒐᔪᒃᑐᖅ ᐃᓄᖕᓄᑦ ᐊᒃᓱᕈᕐᓇᖅᑐᒃᑰᓚᐅᖅᓯᒪᔪᓄᑦ ᑕᖃᓂᕐᒥᒃ ᐊᔪᕈᑎᓕᑦ. ᐃᖅᑲᐃᓯᕐᓘᑎᔾᔪᑎᑦ ᐊᑐᓕᕈᓐᓇᖅᑐᑦ ᐊᓯᖏᓐᓂᒃ ᖃᓄᐃᓕᖓᓂᕐᓄᑦ ᖁᒃᓴᓱᖕᓂᕐᒥ ᐊᔪᕈᑎᓂᑦᑕᐅᖅ.

ᐊᑐᐃᓐᓇᖃᑦᑕᕈᑎᑦ ᐃᓕᖅᑯᓯᖏᓐᓂᒃ

ᐃᓄᒃ ᐱᔪᒪᓂᖃᕐᓗᓂ ᐊᑐᐃᓐᓇᖃᑦᑕᕈᑎ ᐊᔪᕈᑎᓕᒃ ᐅᑎᖅᑕᐃᓐᓇᖅᑐᓂᒃ, ᐃᓱᒪᒋᔪᒪᙱᑕᕐᓂᒃ ᐃᓱᒪᖃᑦᑕᕐᓂᕐᓂ ᐃᒃᐱᒍᓱᒃᑎᓪᓗᓂᔾᔪᒃ ᖃᓄᐃᓕᐅᕆᐊᖃᕐᓂᕐᒥᒃ ᐊᑐᐃᓐᓇᖃᑦᑕᖅᑕᖏᓐᓂᒃ. ᑖᓐᓇ ᑕᐃᔭᐅᔪᖅ ᐊᑐᐃᓐᓇᖃᑦᑕᕈᑎᑦ ᐃᓕᖅᑯᓯᖏᓐᓂᒃ. ᐃᓕᖅᑯᓯᖅ ᐃᓱᒪᒃᑰᕈᓐᓇᖅᑐᖅ (ᐃᓕᖕᓂᒃ ᐅᖃᐅᑎᓗᑎᑦ "ᖃᓄᐃᔾᔮᙱᑦᑐᖅ" ᐅᑎᖅᑕᕐᕕᒌᓐᓇᕐᓗᒍ) ᑎᒥᒃᑯᓪᓘᓐᓃᑦ (ᐊᒡᒐᑦ ᐅᐊᓴᑲᑕᒃᓗᒋᑦ, ᐱᖁᑎᓂᒃ ᐋᖅᑭᒃᓱᐃᑦᑎᐊᕐᓂᖅ, ᓈᓴᐅᓂᖅ, ᖃᐅᔨᒋᐊᒃᑲᓐᓂᑲᑕᖕᓂᖅ ᑭᓱᒥᑭᐊᖅ ᐱᔭᕇᖅᑲᐅᔭᕐᓂᒃ).

ᐊᑐᒐᒃᓴᑦ ᐊᐅᓚᑦᑎᐊᕆᐊᕐᓗᒍ ᖁᒃᓴᓱᙱᔾᔫᒥᒋᐊᕐᓗᓂᓗ

ᖁᒃᓴᓱᖕᓂᖅ ᐃᓚᒋᔭᐅᔪᖅ ᐊᑐᖅᑕᐅᒐᔪᒃᑐᒥᒃ ᐃᓱᒪᒃᑯᑦ ᐋᓐᓂᐊᕈᑎᓕᖕᓄᑦ ᐊᑲᐅᙱᓕᐅᕈᑎᑦ ᓄᓇᕐᔪᐊᒥ. ᐃᓄᖓᓴᐃᑦ ᐊᑑᑎᖃᖅᑐᓂᒃ ᐊᑐᒐᒃᓴᓯᐊᖃᑦᑕᖅᑐᑦ ᐊᐅᓚᑦᑎᓗᑎᒃ ᖁᒃᓴᓱᓗᐊᕈᓐᓃᕐᓗᑎᒃᓗ. ᐅᑯᐊ ᖃᔅᓯᐊᕐᔪᐃᑦ ᐆᒃᑑᑎᑦ:

  • ᓇᓂᓗᒍ ᖃᓄᐃᓕᖓᓂᕆᔭᑦ. ᖁᒃᓴᓱᓕᕈᕕᑦ, ᖃᐅᔨᒋᐊᕐᓗᑎᑦ ᐋᖅᑭᒃᓯᒪᓂᖃᕐᒪᖔᑦ ᐊᖅᑯᑎᒃᓴᓂᒃᓗ ᖃᐅᔨᓇᓱᒃᓗᒋᑦ ᑭᓱᒃᑭᐊᖅ ᐃᓚᓯᓲᑦ ᖁᒃᓴᓱᖕᓂᕐᓄᑦ. ᐊᑐᕐᓗᒍ ᑖᓐᓇ ᖃᐅᔨᒪᓂᖅ ᑐᑭᓯᑦᑎᐊᒃᑲᓐᓂᕐᓗᒍ ᑭᓱᒧᑦ ᖁᒃᓴᓱᓕᖃᑦᑕᕐᒪᖔᖅᐱᑦ.
  • ᐃᓕᑦᑎᓗᑎᑦ ᐊᑐᕋᓱᒃᐸᒃᓗᑎᓪᓗ ᑎᒥᒃᑯᑦ ᐃᓱᒪᒃᑯᑦ ᓴᐃᓕᓂᕐᒥᒃ ᐊᓂᖅᓵᖅᑐᕐᓗᓂᓗ ᖃᓄᐃᑦᑐᓐᓃᕋᓲᑎᓂᒃ.
    • *ᐃᑲᔫᑎ: ᔫᑑᑉ−ᑯᑦ ᑕᑯᒋᐊᕈᓐᓇᖅᑐᑎᑦ ᐊᔾᔨᒌᖏᑦᑐᓂᒃ ᓴᐃᓕᔾᔫᒥᔾᔪᑎᓕᕆᔪᓂᒃ ᐊᓂᖅᓵᕐᓂᒃᑯᓪᓗ ᐊᔪᕈᓐᓃᖅᓴᐅᑎᓂᒃ ᓇᓂᓯᓇᓱᒃᓗᑎᑦ ᐃᓕᖕᓄᑦ ᐊᑑᑎᓕᖕᒥᒃ!
  • ᐃᓚᐅᖃᑕᐅᓗᑎᑦ ᐃᑲᔪᖅᓱᐃᔨᓂᒃ (ᑕᐅᑐᒃᓗᒍ ᖃᕆᑕᐅᔭᒃᑯᓪᓘᓐᓃᑦ) ᐱᕕᒃᓴᒧᑦ ᐊᒥᖅᑳᖃᑎᒌᖕᓂᕐᒥᒃ ᐊᑐᕐᓂᑯᓂᑦ ᕿᓄᐃᓵᕈᑎᓂᒃᓗ ᒪᓕᒃᑕᐅᕙᒃᑐᓂᒃ.
  • ᐱᑦᑕᐃᓕᓗᒍ ᐃᒥᐊᓗᒃ ᑳᐱᓘᓐᓃᑦ ᖁᒃᓴᓱᒃᑎᑦᑎᔭᑉᐸᑕ ᖃᐅᔨᒪᓇᖅᑐᓂᒃ.
  • ᐅᐸᒍᑎᓗᑎᑦ ᐋᓐᓂᐊᕕᕐᒥ ᐃᖅᑲᓇᐃᔭᖅᑎᒧᑦ ᒪᒥᓴᖅᑕᐅᕝᕕᒃᓴᓕᐅᕐᓗᑎᓪᓗ. ᐊᔾᔨᒌᖏᑦᑐᓂᒃ ᐱᑕᖃᖅᑐᖅ ᒪᒥᓴᕐᓗᒍ ᖁᒃᓴᓱᖃᑦᑕᕐᓂᖅ, ᓇᓂᓯᔪᓐᓇᕐᖢᑎᓪᓗ ᐱᕙᒌᔭᐅᒻᒥᒃ ᐃᓕᖕᓄᑦ ᐊᑑᑎᖃᖅᑐᒥᒃ.

ᐅᓄᖅᑐᑦ ᐃᓄᐃᑦ ᖁᒃᓴᓱᖕᓂᕐᒧᑦ ᐊᔪᕈᑎᖃᖅᑐᑦ ᖃᐅᔨᒪᙱᑦᑐᑦ ᒪᒥᓴᒐᒃᓴᐅᔪᒥᒃ ᐃᓱᒪᒥᒍᑦ ᐋᓐᓂᐊᕈᑎᖃᕐᓂᕐᒥᓂᒃ. ᐅᖃᓲᑦ ᖁᓱᖃᑦᑕᖅᑐᑦ ᖁᒃᓴᓱᒃᐸᒃᖢᑎᒃᓗ ᐃᓅᓯᓕᒫᖏᓐᓂ. ᑖᓐᓇ ᐊᑲᐅᙱᓕᐅᕈᑎ ᐊᑐᓕᕈᓐᓇᖅᑐᖅ ᖃᓄᑐᐃᓐᓇᖅ ᐅᑭᐅᖃᓕᕐᓗᓂ. ᐃᓄᒃ ᑕᒪᒃᑭᖅᑐᒥᒃ ᐋᓐᓂᐊᖃᕐᒪᖔᑦ ᖃᐅᔨᓴᖅᑕᐅᔭᕆᐊᖃᑐᐃᓐᓇᕆᐊᓕᒃ ᓘᒃᑖᖅ ᖃᐅᔨᓚᐅᙱᑎᓪᓗᒍ ᒪᒥᓴᐃᓗᓂᓗ ᖁᒃᓴᓱᖕᓂᕐᒧᑦ ᐊᔪᕈᙱᓕᖕᒥᒃ. ᐱᔾᔪᑎ ᖃᐅᔨᔭᐅᙲᓐᓇᒐᔪᒃᑐᖅ.

ᐃᓄᒃ ᖁᒃᓴᓱᖕᓂᕐᒧᑦ ᐊᔪᕈᑎᓕᒃ ᐊᓯᖏᓐᓂᒃ ᐊᑲᐅᙱᓕᐅᕈᑎᖃᑐᐃᓐᓇᕆᐊᓕᒃ ᓲᕐᓗ ᓄᒫᓱᖕᓂᕐᒥᒃ ᐊᒻᒪᓘᓐᓃᑦ ᐊᑲᐅᙱᓕᐅᕈᑎᒋᕙᒃᓗᒍ ᓱᕐᕋᖕᓇᖅᑐᖅᑐᖃᑦᑕᕐᓂᕐᒧᑦ/ᐃᒥᐊᓗᖃᑦᑕᕐᓂᕐᒧᑦ ᐅᐃᕆᓯᒪᔭᖃᕐᓂᕐᒧᓪᓘᓐᓃᑦ. ᑖᒃᑯᐊ ᐊᑦᑕᕐᓇᖅᑑᔪᓐᓇᖅᑐᑦ ᓱᓕᓗᑎᒃ ᐃᖕᒥᓃᓐᓂᕐᒧᑦ. ᓄᑕᖅᑲᑦ ᐊᒃᓱᓪᓘᓐᓃᑦ ᐊᑕᐅᓯᖅ ᐊᖓᔪᖅᑳᖃᕐᓗᑎᒃ ᓄᒫᓱᒃᑐᒥᒃ ᒪᕐᕈᐃᕐᓱᕐᓗᒍ ᐱᖃᕈᓐᓇᖅᑐᑦ ᖁᒃᓴᓱᖕᓂᕐᒧᑦ ᐊᔪᕈᑎᖃᕐᓂᕐᒥᒃ. ᐊᕐᓇᐃᑦ ᒪᕐᕈᐃᕐᓱᕐᓗᒍ ᐱᖃᕈᓐᓇᖅᑐᑦ ᐊᖑᑎᓂᒃ ᐊᑲᐅᙱᓕᐅᕈᑎᖃᕐᓗᑎᒃ ᖁᒃᓴᓱᖕᓂᕐᒧᑦ ᐊᔪᕈᑎᒥᒃ.

ᐃᑲᔪᖅᑕᐅᔪᒪᓗᑎᑦ ᐋᓐᓂᐊᕕᖕᒧᑦ ᖁᒃᓴᓱᖕᓂᕐᒧᑦ ᐊᔪᕈᑎᖃᕋᓱᒋᒍᕕᑦ. ᖃᐅᔨᒪᔭᐅᖏᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖃᓗᒍᓐᓇᖅᐳᑎᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᖕᒧᑦ ᐅᕗᖓ 1-800-265-3333.

ᑭᓇᒥᑭᐊᖅ ᐊᑦᑕᕐᓇᖅᑐᒦᓐᓇᓱᒋᓐᓈᒍᕕᑦ ᐋᓐᓂᕐᓂᐊᕆᐊᒃᓴᖏᓐᓂᒃ ᐃᖕᒥᖕᓂᒃ ᐊᓯᖏᓐᓂᒃᓘᓐᓃᑦ, ᐋᓐᓂᐊᕕᓕᐊᕈᑎᓗᒋᑦ ᐃᕐᖐᓐᓇᖅ ᐸᓖᓯᒃᑯᓐᓄᓪᓘᓐᓃᑦ ᐅᖃᓗᒃᓗᑎᑦ.

 ᐃᑲᔪᖅᑕᐅᓂᖅ ᐃᓱᒪᒃᑯᑦ ᐋᓐᓂᐊᓗᓂ