ᓂᑲᓪᓗᖓᓂᖅ

ᓂᑲᓪᓗᖓᓂᖅ ᐊᔾᔨᒋᙱᑕᖓ ᓄᒫᓱᖕᓂᐅᑉ. ᑭᓇᑭᐊᖅ ᓂᑲᓪᓗᖓᔾᔪᑎᓕᒃ ᐃᒃᐱᖕᓂᐊᓂᓕᒃ ᓄᒫᓱᕐᔪᐊᕐᓂᕐᒥᒃ ᓂᕆᐅᖕᓂᖃᙱᓐᓂᕐᒥᒃᓗ ᐊᑯᓂᐅᔪᒃᑯᑦ. ᓇᐅᒃᑯᑐᐃᓐᓇᖅ ᐃᓅᓯᕐᒥ ᐊᒃᑐᖅᑕᐅᓯᒪᓐᓇᖅᑐᖅ: ᐃᒃᐱᖕᓂᐊᓃᑦ, ᑎᒥᒃᑯᑦ ᖃᓄᐃᙱᑦᑎᐊᕐᓂᖅ, ᖃᓂᒋᔭᖃᕐᓃᑦ, ᐃᖅᑲᓇᐃᔮᕐᓗ. ᓂᑲᓪᓗᖓᓪᓗᓂ ᐱᓪᓚᑦᑖᖑᔪᖅ. ᐊᒃᑐᐃᓲᖅ ᐃᓄᖕᓂᒃ ᖃᓄᓕᒫᓄᑦ ᐅᑭᐅᓕᖕᓄᑦ, ᑭᓲᓂᕐᓄᑦ, ᐱᓕᕆᔨᒻᒪᕆᓄᑦ, ᓇᑭᙶᕈᑎᓄᑦ, ᐃᓕᖅᑯᓯᑐᖃᓄᓪᓗ.

ᐅᕝᕙᐅᑯᐊ ᐃᓚᖏᑦ ᓇᓗᓇᐃᒃᑯᑕᑦ ᖃᐅᔨᒪᓇᕈᑎᓪᓗ ᓇᐅᑦᑎᖅᓱᕆᐊᓕᑦ:

  • ᐊᓯᔾᔨᕐᓂᖅ ᓂᕆᓂᕆᕙᒃᑕᒧᑦ
  • ᓴᓗᒃᑎᑉᐸᓪᓕᐊᓂᖅ ᖁᐃᒃᑎᑉᐸᓪᓕᐊᓂᕐᓘᓐᓃᑦ ᐱᔾᔪᑎᖃᙱᓪᓗᓂ
  • ᐊᐅᓚᔪᓐᓇᐅᑎᖃᑦᑎᐊᙱᓐᓂᖅ, ᑕᖃᖓᕐᔪᐊᖏᓐᓇᐅᔭᕐᓂᖅ
  • ᐅᔾᔨᖅᓱᑦᑎᐊᕈᓐᓇᙱᓐᓂᖅ, ᐃᖅᑲᐅᒪᔪᓐᓇᕐᓂᖅ, ᐋᖅᑭᒃᓯᓇᓱᖕᓂᕐᓘᓐᓃᑦ
  • ᐃᒃᐱᖕᓂᐊᓗᓂ ᓂᕆᐅᖕᓂᖃᙱᓐᓂᕐᒥᒃ ᐊᑑᑎᖃᙱᓐᓂᕐᒥᒃᓗ
  • ᐱᔪᒪᓂᖃᕈᓐᓃᕐᓂᖅ ᐊᑐᖅᐸᓚᐅᕋᓗᐊᖅᑕᒥᓂᒃ ᖁᕕᐊᒋᓗᒍ
  • ᐸᓯᔭᒃᓴᐅᖅᑰᔨᓂᖅ ᐱᔾᔪᑎᖃᙱᑦᑐᒧᑦ
  • ᐊᑲᐅᙱᓕᐅᕐᓂᖅ ᓯᓂᒐᓱᒃᓗᓂ; ᓯᓂᓗᐊᖃᑦᑕᕐᓂᖅ;ᓯᓂᖕᓂᑭᓗᐊᖃᑦᑕᕐᓂᖅ
  • ᐸᒃᕕᓴᕋᐃᓐᓂᖅ
  • ᐃᓱᒪᖃᑦᑕᕐᓂᖅ ᐃᖕᒥᓃᕐᓂᕐᒧᑦ ᑐᖁᒥᒃᓘᓐᓃᑦ

ᑕᐃᒪᐃᑦᑐᖃᕈᕕᑦ ᐃᓚᖏᓐᓂ ᑖᒃᑯᐊ ᖃᐅᔨᒪᓇᕈᑎᑦ ᖃᐅᑕᒫᑦ ᒪᕐᕉᖕᓄ ᐱᓇᓱᐊᕈᓰᖕᓄᑦ ᐅᖓᑖᓄᓪᓘᓐᓃᑦ, ᐋᓐᓂᐊᕕᓕᐊᕐᓗᑎᑦ ᐅᖃᖃᑎᖃᕐᓗᑎᓪᓗ ᐃᓱᒪᓕᕆᔨᒻᒪᕿᖕᒥᒃ. ᖃᐅᔨᒪᔭᐅᖏᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖃᓗᒍᓐᓇᖅᐳᑎᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᖕᒧᑦ ᐅᕗᖓ 1-800-265-3333.

ᑭᓇᒥᑭᐊᖅ ᐊᑦᑕᕐᓇᖅᑐᒦᓐᓇᓱᒋᓐᓈᒍᕕᑦ ᐋᓐᓂᕐᓂᐊᕆᐊᒃᓴᖏᓐᓂᒃ ᐃᖕᒥᖕᓂᒃ ᐊᓯᖏᓐᓂᒃᓘᓐᓃᑦ, ᐋᓐᓂᐊᕕᓕᐊᕈᑎᓗᒋᑦ ᐃᕐᖐᓐᓇᖅ ᐸᓖᓯᒃᑯᓐᓄᓪᓘᓐᓃᑦ ᐅᖃᓗᒃᓗᑎᑦ.

ᐱᑎᑦᑎᔾᔪᑎᑦ ᓂᑲᓪᓗᖓᓂᕐᒧᑦ

ᓂᑲᓪᓗᖓᓂᖅ ᐋᓐᓂᐊᖑᔪᖅ. ᐱᑎᑕᐅᙱᑦᑐᖅ ᓇᖕᒥᓂᖅ ᓴᙶᓐᓂᕐᒧᑦ. ᓂᑲᓪᓗᖓᓂᖃᕈᕕᑦ, ᐃᓚᐅᕈᑎᒃᓴᑦ ᖃᕋᓴᕐᓂ ᑕᐃᔭᐅᔪᑦ (ᓂᐅᑐᑐᕌᓐᔅᒥᑐᔅ) ᖃᕋᓴᕐᒥ ᐃᓱᒪᔾᔪᑎᑦ ᐊᐅᓚᖃᑦᑕᖅᑐᑦ ᐃᖏᕐᕋᓂᖏᑦ ᓇᓕᒨᑎᙱᒻᒪᑕ. ᐃᓚᖏᑦ ᐱᔾᔪᑎᑦ ᑕᐃᒪᐃᑎᑦᑎᔪᓐᓇᓲᑦ ᐃᓄᖕᒥᒃ ᐊᑐᕐᓗᑎᒃ ᓂᑲᓪᓗᖓᓂᕐᒥᒃ: ᖃᑕᙳᑎᒌᑦ ᐊᑐᕐᓂᑯᕕᓂᖏᑦ ᓂᑲᓪᓗᖓᓂᕐᒧᑦ, ᑎᒥᒥᒍᑦ ᖃᓄᐃᙱᑦᑎᐊᕈᑎᑦ, ᐃᓕᖅᑯᓯᑦ ᑕᖃᓇᖅᑐᒥᒃᓘᓐᓃᑦ ᐃᓅᓯᕐᒥ ᐊᑐᕐᓂᑯᑦ. ᖃᑕᙳᑎᒋᔭᖅ ᓂᑲᓪᓗᖓᓐᓇᖅᑐᖃᖅᐸᑦ ᐊᑐᖅᓯᒪᓗᑎᓪᓘᓐᓃᖅ ᑕᖃᓇᖅᑐᓂᒃ ᐃᓅᓯᕐᒥ ᐊᑐᕐᓂᑯᓂᒃ, ᑐᑭᒋᙱᑕᖓ ᓂᑲᓪᓗᖓᓐᓇᖅᑐᖅᑖᕐᓂᐊᖅᑐᑎᑦ.

ᐊᓯᖏᑦ ᓂᑲᓪᓗᖓᓐᓇᖅᑐᑦ

  • ᐃᕐᓂᓵᕐᓂᑰᓗᓂ ᓂᑲᓪᓗᖓᓂᖅ ᐃᓛᓐᓂᒃᑯᑦ ᐊᑐᓲᖅ ᐊᕐᓇᖅ ᐃᕐᓂᓚᐅᖅᑎᓪᓗᒍ ᐱᔾᔪᑎᖃᕐᓗᓂ ᐊᔾᔨᒌᖏᑦᑑᔪᓐᓇᖅᑐᒃᑯᑦ ᐱᔾᔪᑎᒃᑯᑦ. ᐃᓕᑦᑎᒃᑲᓐᓂᕈᒪᒍᕕᑦ ᐃᕐᓂᓵᕐᓗᓂ ᓂᑲᓪᓗᖓᓂᕐᒥ ᓄᑕᕋᓛᖅᑖᓵᕐᓂᕐᒧᓪᓗ ᓂᑲᓪᓗᖓᓂᖅ, ᓇᕿᓪᓗᒍ ᐅᓇ: [ᐅᓇ:[ᑲᓲᑎᔾᔪᑎ ᐊᓈᓇᐅᑉ ᐃᓱᒪᖓᒍᑦ ᐋᓐᓂᐊᖃᖅᑕᐃᓕᒪᓂᕐᒥᒃ ᐱᑕᓕᒃ]
  • ᑖᖏᓐᓇᐅᔭᕈᔪᖕᓂᖓ ᐅᑭᐅᒃᑯᑦ ᑐᕌᖅᑎᑦᑎᔪᓐᓇᖅᑐᖅ ᓂᑲᓪᓗᖓᓐᓇᐅᔪᒧᑦ ᑕᐃᔭᖅ ᐊᕐᕌᒍ ᐃᓗᐊᓂ ᓯᒪ ᐊᓯᔾᔨᖃᑦᑕᕐᓂᖓᓄᑦ ᐊᒃᑐᖅᑕᐅᓂᕐᒧᑦ ᐊᔪᕈᑎ

ᐊᑐᒐᒃᓴᑦ ᐊᐅᒪᓪᓗᒍ ᒪᒥᓴᕐᓗᒍᓗ ᓂᑲᓪᓗᖓᓐᓇᖅ

ᐅᓄᖅᑐᑦ ᐃᓄᐃᑦ ᓇᓂᓯᖃᑦᑕᖅᑐᑦ ᐊᑐᒐᒃᓴᓂᒃ ᐊᐅᓚᓪᓗᒍ ᓂᑲᓪᓗᖓᓐᓇᖅ, ᒥᒃᖠᒋᐊᕐᓗᒋᑦ ᖃᐅᔨᒪᓇᕈᑎᖏᑦ, ᐃᓅᑯᑖᓕᕐᓗᑎᒃᓗ ᖃᓄᐃᙱᑦᑎᐊᕐᓗᑎᒃᓗ.

  • ᐅᐸᒍᑎᓗᑎᑦ ᐋᓐᓂᐊᕕᕐᒥ ᐃᖅᑲᓇᐃᔭᖅᑎᒧᑦ ᒪᒥᓴᖅᑕᐅᕝᕕᒃᓴᓕᐅᕐᓗᑎᓪᓗ.

ᐊᔾᔨᒌᖏᑦᑐᓂᒃ ᐱᑕᖃᖅᑐᖅ ᒪᒥᓴᕐᓗᒍ ᖁᒃᓴᓱᖃᑦᑕᕐᓂᖅ, ᓇᓂᓯᔪᓐᓇᕐᖢᑎᓪᓗ ᐱᕙᒌᔭᐅᒻᒥᒃ ᐃᓕᖕᓄᑦ ᐊᑑᑎᖃᖅᑐᒥᒃ. ᒪᒥᓴᕐᓂᕐᒧᑦ ᐱᕕᒃᓴᑦ ᐃᓚᐅᑎᑦᑎᔪᑦ ᐃᓅᓯᓕᕆᔭᐅᓂᕐᒥᒃ, ᓴᐃᓕᔮᕐᓇᖅᑐᓕᕆᔭᐅᓂᕐᒥᒃ, ᐊᒻᒪᓘᓐᓃᑦ ᓂᑲᓪᓗᖓᔪᖅᓯᐅᑎᑦ ᐃᓅᓕᓴᐅᑎᑐᕐᓂᕐᓂ.

  • ᓇᓂᓗᒍ ᖃᓄᐃᓕᖓᓂᕆᔭᑦ. ᐃᒃᐱᖕᓂᐊᒍᕕᑦ ᖃᐅᔨᒪᓇᕈᑎᓂᒃ ᓂᑲᓪᓗᖓᓐᓇᒧᑦ, ᖃᐅᔨᒋᐊᕐᓗᑎᑦ ᒪᓕᒃᑎᒌᒃᑐᓂᒃ. ᐊᑐᕐᓗᒍ ᑖᓐᓇ ᖃᐅᔨᒪᓂᖅ ᑐᑭᓯᑦᑎᐊᒃᑲᓐᓂᕐᓗᒍ ᑭᓱᒧᑦ ᖁᒃᓴᓱᓕᖃᑦᑕᕐᒪᖔᖅᐱᑦ.
  • ᐃᓕᑦᑎᓗᑎᑦ ᐊᑐᕋᓱᒃᐸᒃᓗᑎᓪᓗ ᑎᒥᒃᑯᑦ ᐃᓱᒪᒃᑯᑦ ᓴᐃᓕᓂᕐᒥᒃ ᐊᓂᖅᓵᖅᑐᕐᓗᓂᓗ ᖃᓄᐃᑦᑐᓐᓃᕋᓲᑎᓂᒃ.

ᐃᑲᔫᑎ: ᔫᑑᑉ−ᑯᑦ ᑕᑯᒋᐊᕈᓐᓇᖅᑐᑎᑦ ᐊᔾᔨᒌᖏᑦᑐᓂᒃ ᓴᐃᓕᔾᔫᒥᔾᔪᑎᓕᕆᔪᓂᒃ ᐊᓂᖅᓵᕐᓂᒃᑯᓪᓗ ᐊᔪᕈᓐᓃᖅᓴᐅᑎᓂᒃ ᓇᓂᓯᓇᓱᒃᓗᑎᑦ ᐃᓕᖕᓄᑦ ᐊᑑᑎᓕᖕᒥᒃ!

  • ᐃᓅᓯᕐᒥ ᐊᓯᔾᔩᓃᑦ ᐃᑲᔪᕈᓐᓇᕐᒥᔪᑦ: ᐃᖃᐃᓕᓴᒃᑲᓐᓂᖃᑦᑕᕐᓗᓂ, ᓂᕿᑦᑎᐊᕙᓂᒃ ᓂᕆᖃᑦᑕᕐᓗᓂ, ᐊᒻᒪ ᐃᓚᐅᖃᑕᐅᕙᒃᓗᓂ ᖃᓄᐃᓕᐅᕈᑕᐅᔪᓂᒃ ᐊᓕᐊᓇᐃᒋᔭᕐᓂᒃ.
  • ᐃᓚᐅᖃᑕᐅᓗᑎᑦ ᐃᑲᔪᖅᓱᐃᔨᓂᒃ (ᑕᐅᑐᒃᓗᒍ ᖃᕆᑕᐅᔭᒃᑯᓪᓘᓐᓃᑦ) ᐱᕕᒃᓴᒧᑦ ᐊᒥᖅᑳᖃᑎᒌᖕᓂᕐᒥᒃ ᐊᑐᕐᓂᑯᓂᑦ ᕿᓄᐃᓵᕈᑎᓂᒃᓗ ᒪᓕᒃᑕᐅᕙᒃᑐᓂᒃ.
  • ᐅᐸᒃᓗᒍ ᐃᑲᔪᕐᓂᖅ ᐃᑲᔪᖅᓱᕐᓂᕐᓗ  ᒪᒃᐱᒐᖓ ᖃᐅᔨᓇᓱᒃᓗᑎᒃ ᐱᑕᖃᖅᑐᓂᒃ ᐊᑐᐃᓐᓇᐅᔪᓂᒃ. 

ᐃᓚᖏᑦ ᐃᓄᐃᑦ ᖃᑕᙳᑎᒌᓪᓗ ᑲᙳᓱᑐᐃᓐᓇᕆᐊᓕᑦ ᑕᒃᑯᕐᖠᖓᓗᑎᒃᓘᓐᓃᑦ ᓂᑲᓪᓗᖓᓐᓇᕐᓂᖃᕐᓂᕐᒥᓂᒃ. ᑖᒃᑯᐊ ᐃᒃᐱᖕᓂᐊᓃᑦ ᐊᒡᕕᐊᕈᑕᐅᓪᓗᐊᙱᑦᑐᑦ ᐃᑲᔪᖅᑕᐅᓇᓱᒃᓗᓂ. ᒪᒥᓴᕐᓂᖅ ᐊᔪᙱᑦᑐᖅ, ᕿᓚᒻᒥᐅᓂᖅᓴᒃᑯᓪᓗ ᐃᓄᒃ ᒪᒥᓴᖅᐸᑦ, ᕿᓚᒻᒥᐅᓂᖅᓴᒃᑯᑦ ᐊᑲᐅᓯᕚᓪᓕᕐᓂᖅᓴᐅᔪᓐᓇᖅᑐᑦ.

ᐃᓄᒃ ᐊᑐᕈᓐᓇᖅᑐᖅ ᐊᑕᐅᙳᐅᙱᑦᑐᒥᒃ ᖃᓄᐃᑦᑑᓂᖓᓂᒃ ᒪᒥᓴᕐᓂᖅ. ᐋᓐᓂᐊᕕᖕᒥ ᐃᖅᑲᓇᐃᔭᖅᑎ ᐃᑲᔪᖃᑦᑕᖅᑐᖅ ᓇᓂᓯᓇᓱᒃᓗᓂ ᐱᐅᓛᒥᒃ ᒪᒥᓴᐅᑎᒥᒃ. ᒪᒥᓴᐅᑎ ᐊᑑᑎᖃᙱᑉᐸᑦ, ᐱᒻᒪᕆᐅᔪᖅ ᐋᓐᓂᐊᕕᖕᒥ ᐃᖅᑲᓇᐃᔭᖅᑏᑦ ᖃᐅᔨᑎᓪᓗᒍ. ᐱᒋᐊᒐᓚᒍᓐᓇᖅᑐᖅ ᐊᒥᓱᐃᙱᓪᓗᓂ ᐃᓄᒃ ᐊᑲᐅᓯᕚᓪᓕᕋᓱᖕᓂᖓᓄᑦ. ᐅᓄᖅᑐᓄᑦ ᐱᓇᓱᐊᕈᓯᕐᓅᕈᓐᓇᖅᑐᖅ ᐃᓅᓕᓴᐅᑎ ᐊᑐᓕᕋᓱᒃᓗᓂ. ᐋᓐᓂᐊᕐᓇᙱᑦᑐᑦ ᐃᓕᖅᑯᓯᑦ ᓲᕐᓗ ᐃᖃᐃᓕᓴᕐᓂᖅ, ᓂᕿᑦᑎᐊᕙᖕᓂᒃ ᓂᕆᖃᑦᑕᕐᓂᖅ ᐱᓕᕇᓐᓇᐅᔭᕐᓂᕐᓗ ᐱᐅᒋᓛᕆᔭᕐᓂᒃ ᖃᓄᐃᓕᐅᕈᑎᓄᑦ ᐃᑲᔪᖅᑐᑦ ᑲᔪᓯᑦᑎᐊᕐᓗᓂ ᒪᒥᓴᕐᓂᕐᒧᑦ.

ᓂᑲᓪᓗᖓᓐᓇᖅ ᐃᓛᓐᓂᒃᑯᑦ ᐅᑎᕈᓐᓇᖅᑐᖅ. ᐃᓅᓕᓴᐅᑎ ᐊᓯᖏᓪᓗ ᖃᓄᐃᓕᖓᓂᐅᔪᑦ ᓴᐃᓕᑦᑎᕋᓱᖕᓂᕐᒧᑦ ᐃᑲᔪᕈᓐᓇᖅᑐᑦ ᐊᑐᓕᖅᑎᒃᑲᓐᓂᖏᓐᓂᕐᒧᑦ. ᐃᓚᖏᑦ ᐃᓄᐃᑦ ᐃᓅᓕᓴᐅᑎᑐᖃᑦᑕᖅᑐᑦ ᐃᓅᓯᓕᒫᖏᑎᒍᑦ ᐃᓅᑦᑎᐊᖅᐸᒃᖢᑎᒃᓗ, ᖃᓄᐃᙱᑦᑎᐊᕐᖢᑎᒃ.

ᐃᑲᔪᕐᓂᖅ ᐃᑲᔪᖅᓱᐃᓂᕐᓗ ᐊᓯᒥᓂᒃ

ᐃᓱᒪᒍᕕᑦ ᑭᓇᑭᐊᖅ ᓂᑲᓪᓗᖓᖕᒪᖔᑦ, ᐃᑲᔪᕆᐊᖃᑦᑕᒃᑭᑦ. ᐅᕝᕙᐅᑯᐊ ᐃᓚᖏᑦ ᐊᑐᕋᓱᒍᓐᓇᖅᑕᑎᑦ:

  • ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑏᑦ ᐅᖃᖃᑎᒋᒃᑭᑦ.
  • ᑎᓕᐅᕆᓗᒍ ᐃᓄᒃ ᒪᒥᓴᖅᑕᐅᖁᓗᒍ, ᒪᒥᓴᖅᑕᐅᙱᓐᓇᖁᓗᒋᓪᓘᓐᓃᑦ ᐱᖏᐊᖅᓯᒫᓂᒃᐸᑕ.
  • ᐃᓕᑦᑎᓗᑎᑦ ᓂᑲᓪᓗᖓᓐᓇᒥᒃ ᐱᑎᑦᑎᔪᓐᓇᕐᓂᐊᕋᕕᑦ ᐃᑲᔪᖅᑕᐅᔾᔪᑎᒋᔭᕆᐊᖃᖅᑕᖏᓐᓂᒃ.
  • ᐅᖃᖃᑎᒋᓗᒍ ᐃᓄᒃ ᖃᓄᖅ ᐃᒃᐱᒋᖕᒪᖔᑕ. ᓲᖑᙱᑦᑐᒃᑯᑦ ᑎᓕᐅᕆᓗᒋᑦ ᐅᑎᖁᓗᒋᑦ ᖃᓄᐃᓕᐅᕈᑎᒧᑦ ᖁᕕᐊᒋᓚᐅᖅᑕᖏᓐᓄᑦ, ᑕᑯᖃᑦᑕᕐᓗᑎᒃᓗ ᖃᓂᒋᔭᖏᓐᓂ ᐱᖃᓐᓇᕆᔭᖏᓐᓂᒃ ᖃᑕᙳᑎᖏᓐᓂᒃᓗ.
  • ᐅᐃᒪᖃᑎᒋᖏᓪᓗᒍ ᐃᓄᒃ−ᓂᙵᙱᓪᓗᑎᑦ. ᐃᓕᖅᑯᓯᖅ ᑕᑯᔭᑦ ᐋᓐᓂᐊᕈᑎᒥᙶᖅᑐᖅ.
  • ᐅᐸᒃᓗᒍ ᐃᑲᔪᕐᓂᖅ ᐃᑲᔪᖅᓱᕐᓂᕐᓗ ᒪᒃᐱᒐᖓ ᖃᐅᔨᓇᓱᒃᓗᑎᒃ ᐱᑕᖃᖅᑐᓂᒃ ᐊᑐᐃᓐᓇᐅᔪᓂᒃ. 

ᑭᓇᒥᑭᐊᖅ ᐊᑦᑕᕐᓇᖅᑐᒦᓐᓇᓱᒋᓐᓈᒍᕕᑦ ᐋᓐᓂᕐᓂᐊᕆᐊᒃᓴᖏᓐᓂᒃ ᐃᖕᒥᖕᓂᒃ ᐊᓯᖏᓐᓂᒃᓘᓐᓃᑦ, ᐋᓐᓂᐊᕕᓕᐊᕈᑎᓗᒋᑦ ᐃᕐᖐᓐᓇᖅ ᐸᓖᓯᒃᑯᓐᓄᓪᓘᓐᓃᑦ ᐅᖃᓗᒃᓗᑎᑦ.

ᖃᐅᔨᒪᔭᐅᖏᓪᓗᑎᑦ ᐃᑲᔪᖅᑕᐅᔪᒪᒍᕕᑦ, ᐅᖃᓗᒍᓐᓇᖅᐳᑎᑦ ᑲᒪᑦᓯᐊᖅᑐᑦ ᐃᑲᔪᖅᑕᐅᕝᕕᖕᒧᑦ ᐅᕗᖓ 1-800-265-3333.