ᐃᖕᒥᓃᕐᓂᖅ

ᐱᐅᙱᑦᑐᑦ ᐊᑐᕌᖓᑕ ᐅᕝᕙᓘᓐᓃᑦ ᐃᓄᐃᑦ ᓂᑲᓪᓗᖓᓗᐊᓕᕌᖓᑕ, ᐃᓚᖏᑦ ᐃᓱᒪᓲᑦ ᐃᖕᒥᓃᕈᒪᓪᓗᑎᒃ ᐋᓐᓂᐊᕈᓐᓃᕈᒪᓪᓗᑎᒃ, ᑕᑯᕐᖠᕈᒪᓇᑎᒃ, ᓄᒫᓱᓗᐊᕐᓂᕐᓘᓐᓃᑦ ᐃᒃᐱᒋᔭᖏᓐᓂ. ᐅᓄᕐᓂᖅᓴᑦ ᐃᓄᐃᑦ ᐱᓪᓚᑦᑖᕈᒪᓂᖃᕐᖢᑎᒃ ᐃᓱᒪᒋᔭᖃᖅᑐᑦ ᐃᖕᒥᓃᕐᓂᕐᒧᑦ ᑐᖁᔪᒪᖃᑦᑕᙱᑦᑐᑦ−ᑕᑯᓪᓗᓂᔾᔪᒃ ᐃᖕᒥᓃᕐᓂᖅ ᐋᖅᑭᒃᓯᔾᔪᑎᐅᓂᖓᓂᒃ ᐊᑲᐅᙱᓕᐅᕈᑎᒧᑦ ᐊᖅᑯᑕᐅᓪᓗᓂᓗ ᐃᓱᓕᑎᓪᓗᒍ ᐋᓐᓂᐊᕆᔭᖏᑦ.

ᐅᓄᖅᑐᓂᒃ ᐱᔾᔪᑎᑕᓕᒃ ᖃᓄᐃᒻᒪᑦ ᐃᓄᑦ ᐃᓱᒪᒋᔭᖃᖃᑦᑕᕐᒪᖔᑦ ᐃᖕᒥᓃᕐᓂᕐᒥᒃ:

  • ᐃᓄᑑᕐᑰᔨᓗᐊᕐᓂᖅ ᐃᓄᑑᓗᐊᕐᓂᕐᓘᓐᓃᑦ
  • ᐊᑐᕐᓂᑰᓗᓂ ᑎᒥᒃᑯᑦ, ᓄᓕᐊᕐᓂᒃᑯᑦ, ᐃᒃᐱᖕᓂᐊᓂᒃᑯᓪᓘᓐᓃᑦ ᐱᓂᕐᓗᒃᑕᐅᓂᕐᒥᒃ
  • ᖃᓄᖓᓴᖅᑕᐅᓂᖅ ᐋᓐᓂᖅᓯᑕᐅᓂᕐᓘᓐᓃᑦ
  • ᐱᔪᓐᓃᕈᓐᓇᙱᑦᑐᒥᒃ ᐋᓐᓂᐊᖃᓕᕐᓂᖅ
  • ᐃᓅᓯᖃᕐᕕᖃᕐᓗᓂ ᒪᓗᖕᓇᖅᑐᖅᔪᐊᕐᒥᒃ ᐊᑐᖅᓯᒪᔪᒥᒃ
  • ᐃᓅᔪᓐᓃᖅᑐᖃᕐᓗᓂ ᓇᒡᓕᒋᔭᕐᒥ ᖃᓂᒋᔭᖓᓂᒃᓘᓐᓃᑦ ᐱᖃᓐᓇᕆᔭᕐᒥᒃ
  • ᐱᓪᓚᕆᒃᑐᒥᒃ ᖃᓂᒋᔭᖃᕐᓂᕐᒧᑦ ᐊᑲᐅᙱᓕᐅᕈᑎᖃᖅᐸᒃᓗᓂ ᐊᕕᓪᓗᑎᒃᓘᓐᓃᑦ
  • ᐃᒃᐱᖕᓂᐊᓂᖅ ᓂᕆᐅᖕᓂᖃᙱᓪᓗᓂ, ᐃᑲᔪᕈᓐᓇᙱᓗᐊᕐᓗᓂ, ᑭᓲᒋᙱᓗᐊᕐᓗᓂᓗ−ᐅᖓᑕᐅᔾᔨᓗᓂ ᐃᖕᒥᓄᑦ ᐊᑐᕈᒪᔭᖏᓐᓂ ᐊᑐᙱᓗᐊᕐᓂᕐᓂ
  • ᐅᒃᐱᕈᓱᒃᓗᓂ ᐋᖅᑭᒃᓯᔪᖃᕈᓐᓇᙱᑦᑐᖅ ᐊᑲᐅᙱᓕᐅᕈᑎᓐᓂᒃ

ᐅᓄᕐᓂᖅᓴᑦ ᐃᓄᐃᑦ ᐱᓪᓚᕆᒍᒪᓗᑎᒃ ᐃᓱᒪᒋᔭᖃᕐᓗᑎᒃ ᐃᖕᒥᓃᕐᓂᕐᒥᒃ ᐱᖃᖅᑐᑦ ᐊᑕᐅᓯᕐᒥᒃ ᐅᖓᑖᓄᓪᓘᓐᓃᑦ ᐊᑖᓃᑦᑐᓂᒃ ᐊᑦᑕᕐᓇᖅᑐᒦᓐᓂᕐᓂᒃ:

  • ᓇᖕᒥᓂᖅ ᖃᑕᙳᑎᒥᓪᓘᓐᓃᑦ ᐊᑐᕐᓂᑰᓗᓂ ᐃᖕᒥᓃᕋᓱᖕᓂᕐᒥᒃ ᐃᖕᒥᓃᖅᑐᒥᒃᓘᓐᓃᑦ
  • ᓇᖕᒥᓂᖅ ᖃᑕᙳᑎᒥᓪᓘᓐᓃᑦ ᐊᑐᕐᓂᑰᓗᓂ ᐱᓗᐊᖅᑐᒥᒃ ᖁᒃᓴᓱᖕᓂᕐᒥᒃ, ᓂᑲᓪᓗᖓᓂᕐᒥᒃ, ᐊᓯᖏᓐᓂᒃᓘᓐᓃᑦ ᐃᓱᒪᒃᑯᑦ ᐋᓐᓂᐊᕐᓇᖅᑐᓄᑦ ᐊᑲᐅᙱᓕᐅᕈᑎᓄᑦ ᓲᕐᓗ ᒪᕐᕈᐃᓕᖓᒧᒥᒃ ᐃᓅᓯᖃᕐᓂᖅ ᐃᓱᒪᑦᑎᐊᕈᓐᓇᙱᓪᓗᓂᓘᓐᓃᑦ
  • ᐃᒥᐊᓗᖕᒥᒃ ᓱᓐᓂᕐᓇᖅᑐᒧᓪᓘᓐᓃᑦ ᐅᐃᕆᓯᒪᔭᖃᕐᓗᓂ
  • ᐱᕐᔪᐊᖅᑐᒥᒃ ᐊᑐᕐᓂᑰᓗᓂ ᖃᓄᖓᓴᖅᑕᐅᓂᕐᒥᒃ−ᓇᓕᐊᒃᑯᑐᐃᓐᓇᖅ ᖃᓄᖓᓴᖅᑕᐅᕙᒃᓗᓂ ᐃᖕᒥᓂᒃᓘᓐᓃᑦ ᖃᓄᖓᓴᖅᐸᒃᓗᓂ

ᐊᑐᑐᐃᓐᓇᕆᐊᖃᕈᓐᓇᕐᓂᖓ ᐃᖕᒥᓃᕐᓂᖅ ᐱᕐᔪᐊᓛᖑᔪᖅ ᐃᓄᒃ:

  • ᐱᕕᖃᖅᐸᑦ ᐊᑐᕐᓗᓂᐅᒃ−ᓲᕐᓗ ᓱᒋᐊᕈᑎ ᐄᔭᒃᑲᓪᓘᓐᓃᑦ
  • ᐋᖅᑭᒃᓯᓯᒪᓗᓂ ᖃᖓ ᓇᓂᓗ ᑕᐃᒪᐃᓐᓂᐊᕐᓂᕐᒥᓂᒃ.
  • ᐃᓱᒪᓗᓂ ᓇᐅᒃᑰᕈᓐᓇᐃᓪᓕᓂᕐᒥᓂᒃ ᐋᖅᑭᒃᓗᒍ ᐊᑲᐅᙱᑦᑐᖅ ᐃᓱᓕᑎᓪᓗᒍᓘᓐᓃᑦ ᐋᓐᓂᐊᕆᔭᖅ.

ᐃᓚᖏᑦ ᖃᐅᔨᒪᓇᕈᑎᑦ ᑕᑯᓇᓱᒋᐊᓕᒃᓴᑦ

ᐅᔾᔨᖅᓱᕆᐊᖃᓕᕐᓂᕐᒥᒃ ᖃᐅᔨᒪᓇᖅᑐᖃᒐᔪᙱᑦᑐᖅ ᐃᓄᒃ ᐃᓱᒪᓕᕐᓂᖓᓂᒃ ᐃᖕᒥᓃᕈᒪᓂᕐᒥᒃ. ᐃᓛᓐᓂᒃᑯᑦ ᐃᓄᒃ ᐅᖃᑐᐃᓐᓇᕆᐊᓕᒃ ᖃᓄᐃᓕᐅᕐᓗᓂᓘᓐᓃᑦ ᖃᐅᔨᒪᓇᕈᑎᐅᓗᓂ ᐃᓱᒪᓂᖏᓐᓂᒃ ᐃᖕᒥᓃᕐᓂᕐᒥᒃ. ᐱᓪᓚᕆᐅᔪᖅ ᐅᔾᔨᖅᓱᕐᓗᒋᑦ ᑖᒃᑯᐊ ᖃᐅᔨᒪᓇᕈᑎᑦ ᓱᖁᑎᒋᙱᑐᐃᓐᓇᙱᓪᓗᒋᓪᓗ.

  • ᐅᖃᕐᓂᖅ ᑐᖁᓕᕆᓗᓂ ᐃᖕᒥᓃᓕᕆᓗᓂᓘᓐᓃᑦ ᓲᕐᓗ, "ᑐᖁᔪᒪᓕᖅᑐᖓ."
  • ᐅᖃᐅᓯᖃᕐᓗᓂ ᐃᖕᒥᓃᕐᓂᕐᒥᒃ ᐃᓅᔪᓐᓃᕈᒪᓂᕐᒥᒃᓘᓐᓃᑦ ᐱᑕᖃᕈᓐᓃᕈᒪᓗᓂᓘᓐᓃᑦ−ᐱᓚᑦᑖᕐᑰᔨᙱᒃᑲᓗᐊᕐᓗᓂ
  • ᐃᓱᒪᔪᑦ ᐊᓯᖏᑦ ᐊᑲᐅᓂᖅᓴᒃᑰᕋᔭᕐᓂᖏᓐᓂᒃ ᐱᑕᖃᙱᑉᐸᑕ
  • ᐃᒥᐊᓗᖃᑦᑕᓗᐊᓕᕐᓂᖅ ᓱᓐᓂᕐᓇᖅᑐᒥᒃᓘᓐᓃᑦ
  • ᐊᑦᑕᕐᓇᖅᑐᓂᒃ ᐃᓕᖅᑯᓯᖃᓕᒃᑲᓐᓂᕐᓃᑦ ᐅᓗᕆᐊᓇᖅᑐᓂᒃᓘᓐᓃᑦ ᖃᓄᐃᓕᐅᕈᑎᓂᒃ
  • ᐱᔪᒪᓂᖃᕐᓂᖅ ᑐᓂᓯᓂᕐᓂᒃ ᐱᒻᒪᕆᐅᔪᒥᓂᒃ ᐱᖁᑎᖏᓐᓂ
  • ᐱᔪᒪᓂᖃᕈᓐᓃᕐᓂᖅ ᖁᕕᐊᒋᔭᖏᓐᓂ ᖃᓄᐃᓕᐅᕈᑎᓂᒃ
  • ᐱᔪᒪᓂᖃᕈᓐᓃᕐᓂᖅ ᐱᖃᑎᖃᕆᐊᒃᓴᖅ ᐃᓄᖕᓂᒃ ᐃᒃᐱᒋᑦᑎᐊᖅᑕᖏᓐᓂᒃ
  • ᐊᒃᓱᕉᑎᖃᕐᓂᖅ ᑲᒪᒋᔭᖃᕆᐊᒃᓴᖅ ᐊᑲᐅᙱᓕᐅᕈᑎᓂᒃ ᐃᖅᑲᓇᐃᔮᒥ ᐊᖏᕐᕋᒥᒃᓘᓐᓃᑦ
  • ᖁᒃᓴᓱᓕᒃᑲᓐᓂᕐᓗᓂ, ᓄᖅᑲᖓᔪᓐᓇᐃᓪᓕᓂᖅ, ᐸᒃᕕᒍᓱᒃᓴᕋᐃᓐᓂᕐᓗ
  • ᐱᔭᕇᖅᑎᑦᑎᓇᓱᖕᓂᖅ ᐃᖕᒥᓃᕐᓂᕐᒥᒃ (ᐃᖕᒥᓃᕋᓱᒃᑐᖅ)

ᐃᓱᒪᒍᕕᑦ ᐃᓄᒃ ᐃᖕᒥᓃᕈᒪᓂᕐᒥᒃ ᐃᓱᒪᓂᖓᓂᒃ, ᐋᓐᓂᕐᓇᙱᑦᑐᖅ ᐊᐱᕆᓗᓂ "ᐃᓱᒪᒐᕖᑦ ᐃᖕᒥᓃᕈᒪᓂᕐᒥᒃ?" ᐅᕝᕙᓘᓐᓃᑦ "ᐃᓱᒪᑲᑕᒃᑲᕖᑦ ᐃᖕᒥᓃᕈᒪᓂᕐᒥᒃ?" ᐊᖏᖅᐸᑦ:

  • ᐊᐱᕆᓗᒋᑦ ᐅᖃᓪᓚᒍᒪᖕᒪᖔᑕ.  ᐱᕕᖃᖅᑎᓪᓗᒋᑦ ᓈᓚᖕᓂᕐᒧᑦ.  ᐃᓕᖕᓄᑦ ᐅᖃᓪᓚᒍᒪᖏᒃᑯᑎ, ᐊᐱᕆᓗᒋᑦ ᐊᓯᐊᓄᑦ ᐅᖃᓪᓚᖃᑎᖃᕈᒪᖕᒪᖔᑕ, ᐊᒻᒪᓗ ᐅᖃᓪᓚᖃᑎᒋᔪᒪᔭᖓᓐᓄᐊᕐᓗᒍ.  ᐱᕕᓴᖃᖏᓗᐊᕈᕕᑦ ᐅᕝᕙᓘᓐᓃᑦ ᓈᓚᒍᓐᓇᖏᓗᐊᕈᕕᑦ, ᐱᕕᒃᓴᖃᖅᑐᒧᑦ ᓈᓚᒍᓐᓇᖅᑐᒧᐊᕐᓗᒍ.
  • ᐅᖃᕐᕕᒋᓗᒍ ᐃᓄᒃ ᑎᓕᐅᕆᓗᒍᓗ ᐃᑲᔪᖅᑕᐅᓇᓱᖁᓗᒍ. ᐅᖃᕐᓗᑎᑦ ᐃᒪᐃᑦᑐᓂᒃ, "ᒪᒥᐊᓇᖅ", "ᐊᑦᑕᕐᓇᖅᑐᒦᑎᙱᓚᐅᓪᓚᑦᑎᒋᑦ", ᐅᕝᕙᓘᓐᓃᑦ "ᖃᓄᖅ ᐃᑲᔪᕈᓐᓇᖅᐸᒋᑦ?"
  • ᑐᓂᓗᒋᑦ ᐅᖃᓘᑎᒃᑯᑦ ᐃᑲᔪᖅᑕᐅᕝᕕᖕᓄᑦ ᑐᐊᕕᕐᓇᖅᑐᓄᓪᓘᓐᓃᑦ ᓈᓴᐅᑎᒥᒃ.
  • ᑎᑎᕋᕐᓗᖏᑦ ᐊᓯᖏᑦ ᐃᑲᔪᕐᓂᕐᒧᑦ ᐊᑐᐃᓐᓇᐅᔪᑦ ᓄᓇᓕᔅᓯᓐᓂ.
  • ᑕᐃᑲᓃᓪᓗᑎᑦ ᓈᓚᒍᓐᓇᕐᓂᕐᒧᑦ; ᓇᒡᓕᒍᓱᖕᓂᕐᒥᒃ ᑕᑯᑎᓪᓗᒋᑦ ᐋᓐᓂᐊᓗᐊᕈᓐᓃᕐᑎᓐᓇᓱᒃᓗᒋᑦ.
  • ᐃᓄᑑᑎᑦᑎᕙᖏᓪᓗᑕ ᐃᒻᒥᓃᕐᓂᕐᒥᑦ ᐃᓱᒪᔪᓂ. ᐃᑲᔪᕈᓐᓇᖅᑐᓂ ᖃᐅᔨᒋᐊᒃᑲᓐᓂᕐᓗᑕ.

ᐊᐱᕆᖃᑦᑕᕐᓗᓂ ᐃᓱᒪᖃᑦᑕᕐᒪᖔᑕ ᐃᒻᒥᓃᕐᓂᒥᑦ ᐃᓱᒪᓕᐅᕆᖏᑉᐳᖅ, ᑭᓯᐊᓂ ᐃᑉᐱᒍᓱᑦᑎᐊᕐᓂᕐᒥᑦ ᖃᓄᐃᖏᑦᑎᐊᕐᓂᕐᒧᑦ ᓴᕿᔮᖅᑎᑦᑎᕗᖅ.

ᐃᑲᔪᖅᑕᐅᓇᓱᖕᓂᖅ

ᐃᒥᓃᕈᒪᓂᕐᒥᑦ ᐃᓱᒪᕙᒃᑯᕕᑦ ᐅᕝᕙᓘᓐᓃᑦ ᐃᒻᒥᓃᕐᓂᕐᒥᑦ ᐃᓱᒪᕙᒃᑐᒥᑦ ᖃᐅᔨᒪᒍᕕᑦ, ᐃᓗᐊᖅᓴᐃᔨᒧᑦ ᐅᖃᖅᐸᒡᓗᑎᑦ ᐅᕝᕙᓘᓐᓃᑦ ᐅᐸᒍᑎᓗᒍ ᐃᓗᐊᖅᓴᐃᔨᒧᑦ. ᐊᑦᑕᕐᓇᕐᓂᖓ ᐃᖕᒥᓃᕐᓂᕐᒧᑦ ᑕᕝᕙᐃᓐᓇᐅᒃᐸᑦ, ᐅᖃᓗᒃᕕᒋᓗᒋᑦ ᐸᓖᓯᒃᑯᑦ.

ᐃᓄᒃ ᐃᓱᒪᔪᖅ ᐃᖕᒥᓃᕐᓂᕐᒧᑦ ᓂᕈᐊᕈᓐᓇᖅᑐᖅ ᐅᖃᖃᑎᖃᕐᓗᓂ ᐱᖃᓐᓇᕆᔭᖓᓄᑦ, ᖃᑕᙳᑎᖓᓄᑦ, ᐅᕝᕙᓘᓐᓃᑦ ᑭᓇᒧᑭᐊᖅ

ᐅᒃᐱᕆᔭᒥᓄᑦ−ᐃᓕᓴᐃᔨ, ᐱᙳᐊᖅᑐᓕᕆᓂᕐᒧᑦ ᐃᓕᓴᐃᔨ, ᐃᓕᓐᓂᐊᕐᕕᒃᓯᐅᑎᓕᕆᖃᑎᒋᕙᒃᑕᖓ, ᐃᓅᓯᓕᕆᔨ, ᐃᓐᓇᑐᖃᕐᓘᓐᓃᑦ.

ᐅᖃᖃᑎᖃᕐᓗᑎᑦ ᐃᓄᖕᒥᒃ ᐃᓱᒪᒋᔭᕐᓂᒃ ᐃᓱᒪᓂᖓᓂᒃ ᐱᖏᐊᖅᓯᒪᓂᑯᒥᒃᓘᓐᓃᑦ ᐃᖕᒥᓃᕐᓂᕐᒥᒃ. ᐅᖃᖃᑎᒌᒍᑎᒋᓂᖅ ᑐᕌᖅᑎᑦᑎᙱᑦᑐᖅ ᐃᖕᒥᓃᕐᓂᕐᒧᑦ. ᓈᓚᑐᐊᕈᕕᑦ, ᐃᑲᔪᕈᓐᓇᑐᐃᓐᓇᕆᐊᖃᖅᑐᑎᑦ ᐃᖕᒥᓃᖅᑎᑦᑎᙱᓪᓗᑎᑦ.

ᖃᐅᔨᒪᔭᐅᙱᓪᓗᓂ ᐃᑲᔪᖅᑕᐅᔪᒪᔪᑦ, ᐅᖄᓚᓗᑎᑦ  ᓄᓇᕗᑦ ᑲᒪᑦᑎᐊᖅᑐᖅ ᐅᖄᓚᐅᑖᓄᑦ..

  • ᐊᑐᐃᓐᓇᐅᔪᑦ ᐃᑲᕐᕋᓄᑦ 24−ᓄᑦ ᐅᓪᓗᖕᒥᑦ
  • 867-979-3333 ᐊᑭᖃᙱᑦᑐᒧᓪᓘᓐᓃᑦ 1-800-265-3333

ᖃᐅᔨᒋᐊᕐᓗᑎᑦ ᐃᓴᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᖏᓐᓄᑦ

ᐊᓯᖏ ᐃᑲᔪᖅᑕᐅᔪᒪᓗᓂ ᐅᖄᓚᕖᑦ ᐅᖃᖃᑎᖃᕐᕖᓪᓗ ᐅᑯᐊ:

ᐅᕝᕙᐅᑯᐊ ᒪᕐᕉᒃ ᑕᕐᕆᔮᒃᓵᒃ [ᔫᑑᑉᑰᖅᑐᑦ] ᑎᓕᐅᕆᔪᑦ ᐃᓄᖕᓂᒃ ᐅᖃᐅᓯᕆᓗᒍ ᐃᖕᒥᓃᕐᓂᖅ.

  • ᐊᑕᐅᓯᖅ ᑕᕐᕆᔮᒃᓴᖅ ᐊᓂᑦᑎᔪᖅ ᐅᓄᖅᑐᓂᒃ ᐅᓂᒃᑲᐅᓯᐅᖃᑦᑕᖅᓯᒪᔪᓂᒃ ᖃᓅᓇᓱᒋᔭᐅᔪᓂᒃᓘᓐᓃᑦ ᐊᒃᑐᐊᓂᓕᖕᓂᒃ ᐃᖕᒥᓃᕐᓂᕐᒥᒃ.
  • ᐊᓯᐊ ᑕᕐᕆᔮᒃᓴᖅ ᑕᑯᑎᑦᑎᔪᖅ ᐱᒻᒪᕆᐅᓂᖓᓂᒃ ᐅᖃᓪᓚᖕᓂᖅ−ᐃᓅᓗᓂᐅᙱᑦᑐᖅ ᐅᖃᕈᓐᓇᙱᓪᓗᓂ.  ᓴᖅᑭᑎᑦᑎᔪᖅ ᐊᑕᐅᓯᖅ ᐃᓄᒃ ᐊᔾᔨᓯᔭᖃᕐᖢᓂ ᖃᓄᖅ ᐃᖕᒥᓃᕐᓂᖅ ᐊᒃᑐᖅᓯᒪᖕᒪᖔᒍ−ᖃᓄᖅ ᐊᔾᔨᒌᖏᑎᑦᑎᔪᓐᓇᕐᒪᖔᑦᑎᓐᓂᒃ ᐅᖃᖃᑎᖃᕈᑦᑕ ᓈᓚᒃᓗᑕᓗ ᐊᓯᑦᑎᓐᓂᒃ.