Bullying

ᓲᖑᓴᑲᑕᓲᑦ ᐱᔪᓐᓇᕐᓂᕐᒥᓂᒃ ᐊᑐᕐᓂᕐᓗᖕᓂᒃᑯᑦ ᐊᓯᒥᓂᒃ ᐋᓐᓂᖅᓯᕆᓲᑦ ᐊᒻᒪ ᑲᙳᓵᕆᓲᖑᓪᓗᑎᒃ. ᑭᓇᑐᐃᓐᓇᕐᒧᑦ ᓄᖅᑲᖅᑎᑕᐅᖏᒃᑯᓂ ᓲᖑᔪᖅ, ᓲᖑᓴᐃᓐᓇᐅᔭᕐᓂᐊᖅᑐᖅ ᖃᖓᓕᒫᖅ.

ᐅᖃᐅᓯᒃᑯᑦ ᓲᖑᓴᒃᑐᑦ ᐅᖃᒃᑯᑦ ᐊᒻᒪ ᑎᑎᕋᕐᓂᒃᑰᔪᓐᓇᕐᒥᔪᖅ ᐱᐅᙱᑦᑐᓂᒃ ᑭᓇᒧᑦ ᑐᕌᖅᑎᓪᓗᒋᑦ.  ᐅᑯᓂᖓ ᐃᓚᖃᖅᑐᖅ:

  • ᑕᐸᓱᖕᓂᖅ
  • ᐊᑦᑎᖅᓱᐃᑲᑕᖕᓂᖅ​​​​​​​
  • ᓈᒻᒪᙱᑦᑐᓂᒃ ᐱᖃᑎᖃᕈᒪᓂᕐᒧᑦ ᓂᓪᓕᐅᑎᖃᑲᑕᖕᓂᖅ
  • ᓂᙵᒃᓴᐃᓂᖅ​​​​​​​
  • ᐋᓐᓂᖅᓯᓂᐊᕐᓂᕋᕐᓂᖅ​​​​​​​

ᐃᓅᓯᕆᔭᐅᔪᒥᒃ ᓲᖑᓴᐅᑎᖃᕐᓂᖅ ᓱᕋᐃᓲᖑᔪᖅ ᐊᐃᑉᐸᕇᖕᓂᒃ/ᐃᓚᒌᓂᒃ.  ᐃᒪᓐᓇᐅᔪᓐᓇᖅᑐᖅ:

  • ᐃᓚᒋᔭᐅᑎᑦᑎᑦᑕᐃᓕᒪᓂᖅ (ᐱᔮᖅᓱᕐᓂᒃᑯᑦ ᒥᓂᑦᑎᓂᖅ)
  • ᐃᓅᖃᓐᓂᐊᕐᓂᖅ ᐅᕝᕙᓘᓃᑦ ᐅᖃᐅᓯᖃᕐᓂᒃᑯᑦ ᑭᓇᒥᒃ ᐱᐅᒃᓴᕈᓐᓃᖅᑎᑦᑎᓇᓱᖕᓂᖅ
  • ᐅᖃᐅᓯᖃᕐᓂᖅ ᐃᓅᖃᑎᒥᒃ
  • ᑲᙳᑦᑎᑎᑎᓂᖅ ᐃᓄᒋᐊᓃᓪᓗᓂ

ᑎᒥᒃᑯᑦ ᓲᖑᓴᖕᓂᖅ ᑭᓇᒥᒃ ᐋᓐᓂᖅᓯᓂᐅᔪᖅ ᐱᖁᑎᖏᓐᓂᒡᓘᓃᑦ ᐃᒪᓐᓇᐅᒋᕗᖅ:

  • ᑎᒡᓗᒃᓯᓂᖅ, ᐊᕿᓯᓂᖅ, ᑑᖅᓯᓂᖅ, ᑮᓯᓂᖅ
  • ᑎᕝᕗᐊᕐᓂᖅ​​​​​​​
  • ᓈᑎᑦᑎᓂᖅ, ᐊᔭᐅᕐᓂᖅ
  • ᑎᒍᓯᓂᖅ ᐱᒋᔭᐅᔪᒥᒃ ᓱᕋᒃᓯᓂᕐᓘᓃᑦ ᐊᓐᓂᕆᔭᐅᔪᒥᒃ
  • ᐆᒃᑐᕋᕐᓂᒃᑯᑦ (ᐊᒡᒐᑎᑦ) ᐱᐅᙱᑦᑐᓂᒃ ᑭᓇᒧᑦ ᑐᕌᖅᑎᖦᖢᒋᑦ

ᖃᕋᓴᐅᔭᒃᑯᑦ ᓲᖑᓴᖕᓂᕐᓕ ᕖᔅᐳᒃ−ᑰᒐᔪᒃᐳᖅ, ᐃᓐᓴᒍᐊᒻ, ᔅᓈᑉᓵᑦ, ᑐᕕᑐ, ᐅᕝᕙᓘᓃᑦ ᔫᑑᑉ−ᑯᑦ. ᖃᕋᓴᐅᔭᒃᑯᑦ ᓲᖑᓴᒃᑐᑦ ᑭᓇᐅᖕᒪᖔᑕ ᓇᓗᓇᒐᔪᖕᒪᑦ ᓇᓂᔭᒃᓴᐅᓗᐊᖏᑦᑐᑦ.

ᖃᕋᓴᐅᔭᒃᑯᑦ ᓲᖑᓴᒃᑐᑦ ᐃᒪᓐᓇᐅᓲᑦ:

  • ᓲᖑᓴᒃᓯᒪᔪᓂᒃ ᑎᑎᕋᑲᑕᖕᓂᖅ
  • ᓴᒡᓗᓯᒪᔪᓂᒃ ᑎᑎᖅᑲᓂᒃ ᖃᖓᑦᑕᖅᑎᑦᑎᖃᑦᑕᕐᓂᖅ
  • ᑲᙳᓵᕆᓂᖅ ᐊᓯᒥᒃ ᓱᓕᙱᑦᑐᓂᒃ ᐊᔾᔨᖑᐊᓂᒃ ᓱᓕᔪᓂᒡᓘᓃᑦ, ᑕᕐᕆᔮᒃᓴᓂᒃ, ᐊᓯᖏᓐᓂᒡᓗ.

ᐸᓴᒍᓱᒃᑯᕕᑦ ᓄᑕᖅᑲᒥᒃ ᓲᖑᓴᒃᑕᐅᔪᖃᕐᒪᖔᓐ, ᐊᐱᕆᓗᒍ ᐱᑦᑎᐊᖅᑕᐅᙱᒻᒪᖔᖅ. ᐊᖏᖅᐸᑦ, ᐅᓇ ᖃᕋᓴᐅᔭᒃᑯᑦ ᐊᖅᑯᑎᐅᔪᖅ ᑐᑭᓯᒋᐊᕐᕕᒃ ᖃᓄᖅ ᐃᑲᔪᕈᓐᓇᕐᒪᖔᖅᐱᑦ.

ᐱᖓᓱᑦ ᐆᒃᑐᕌᐅᑏᑦ ᓲᖑᓴᒍᓯᕐᓂᒃ, ᖃᕋᓴᐅᔭᒃᑯᑦ, ᑎᒥᒃᑯᑦ ᐊᒻᒪ ᐃᓅᓯᕆᔭᐅᔪᒥ ᓲᖑᓴᖕᓂᖅ.

ᑖᓐᓇ ᑎᔅᓯᓈᕿᓂᐅᙱᑦᑐᖅ https://www.youtube.com/watch?v=dX3mDsVixxk

 

ᓲᖑᓴᒃᑕᐅᖃᑦᑕᖅᑐᓂᒃ ᐃᑲᔪᕐᓂᖅ

ᖃᐅᔨᒪᔭᖃᕈᕕᑦ ᓲᖑᓴᒃᑕᐅᖃᑦᑕᖅᑐᒥᒃ:

  • ᖃᐅᔨᑎᓪᓗᒍ ᐃᑲᔪᕋᓱᖕᓂᕐᓂ ᖃᓄᑐᐃᓐᓇᕐᓗ ᐅᓗᕆᐊᓱᒍᓐᓃᖅᑎᓐᓇᓱᒡᓗᒍ.
  • ᐅᖃᐅᑎᓗᒋᑦ ᓲᖑᓴᒃᑕᐅᓂᕆᔭᖓᓂᒃ ᐱᒃᑲᖅᑎᙱᓪᓗᒍ ᐱᒋᐊᖅᑎᑦᑎᖏᒻᒪᓐ.
  • ᐃᑲᔪᖅᑕᐅᔪᒪᖁᓗᒋᑦ ᐅᖃᐅᑎᓗᒍ ᓄᖅᑲᐅᑎᙱᓪᓗᓂᐅᒡᓗ ᐃᑲᔪᖅᑕᐅᓕᓚᐅᖏᓐᓂᕐᒥᓂ.

ᑐᓴᖅᑎᑦᑎᖃᑦᑕᕐᓂᖅ​​​​​​​

ᐃᓅᖃᑎᑎᑦ ᑐᙵᓱᒃᑎᓪᓗᒋᑦ ᐃᓕᖕᓄᑦ ᐅᖃᕈᓐᓇᕐᓂᐊᕐᒪᑕ ᐃᒃᐱᒋᔭᒥᖕᓂᒃ ᐃᓱᒪᒋᔭᒥᖕᓂᓗ. ᑐᑭᓯᓇᑲᐅᑎᒋᔾᔮᖏᑦᑐᒃᓴᐅᔪᖅ ᓲᖑᓴᒃᑕᐅᖃᑦᑕᕋᓗᐊᕐᒪᖔᕐᒥ ᑭᓯᐊᓂ ᑐᙵᓱᑦᑎᐊᓕᕈᓂ ᓇᓗᓇᐃᓕᑕᐃᓐᓇᕋᔭᖅᑐᖅ ᖃᓄᖅ ᓲᖑᓴᒃᑕᐅᖃᑦᑕᕐᒪᖔᒥ ᐅᖃᓕᑕᐃᓐᓇᕐᓗᓂ.

ᐱᓕᕆᖃᑎᒌᒡᓗᓯ​​​​​​​

ᐃᓕᓐᓂᐊᕐᕖᑦ ᓄᑕᖅᑲᐃᓪᓗ ᐊᖓᔪᖅᑳᖏᑦ ᑲᑐᔾᔨᓗᑎᒃ ᓄᖅᑲᖅᑎᑦᑎᓇᓱᒋᐊᖃᕐᒪᑕ ᓲᖑᓴᖃᑦᑕᕐᓂᕐᒥᒃ. ᓄᑕᖅᑲᐃᑦ ᐊᖓᔪᖅᑳᖏᑦ ᐃᓕᓐᓂᐊᕐᕕᖕᒥ ᑐᓴᖅᑎᑦᑎᑲᐅᑎᒋᔭᕆᐊᓖᑦ ᕿᑐᕐᖓᖓ ᓲᖑᓴᒃᑕᐅᖃᑦᑕᖅᑐᖅ ᖃᐅᔨᒍᑎᒃ. ᐃᓕᓐᓂᐊᕐᕖᑦ ᐋᖅᑭᒃᓯᔭᕆᐊᖃᕐᒪᑕ ᖃᓄᖅ ᑲᒪᒋᔭᖃᖃᑦᑕᕐᓂᐊᕐᒪᖔᕐᒥ ᓲᖑᓴᖃᑦᑕᕐᓂᕐᒥᒃ ᖃᓄᕐᓗ ᓄᖅᑲᖅᑎᑦᑎᓇᓱᒍᓐᓇᕐᒪᖔᕐᒥ ᖃᐅᔨᒪᔭᕆᐊᓖᑦ. ᑐᙵᒋᔭᐅᓂᕐᒥᓂᒃ ᐃᓕᓐᓂᐊᕐᕖᑦ ᓴᐳᑎᓯᒪᔭᕆᐊᖃᖅᑐᑦ ᐃᓕᓐᓂᐊᖅᑎᐅᔪᑦ ᐅᓗᕆᐊᓱᖃᑦᑕᕐᓂᐊᖏᒻᒪᑕ ᐃᒃᐱᒋᔭᐅᓂᖏᓐᓂᒡᓗ ᖃᐅᔨᒪᓂᐊᕐᒪᑕ. ᐃᓕᓐᓂᐊᖅᑎᐅᔪᑦ ᖃᐅᔨᒪᔭᕆᐊᖃᕐᒪᑕ ᓇᑭᑦ ᐃᑲᔪᖅᑕᐅᔪᓐᓇᕐᒪᖔᕐᒥ.

ᖁᐊᖅᓵᕐᓇᖅᑕᐃᓕᒪᓂᕐᒧᑦ ᑐᕌᒐᖃᕋᓱᐊᕐᓗᓂ

ᐃᓕᓐᓂᐊᕆᐊᖅᐸᓪᓕᐊᑎᓪᓗᒋᑦ ᓲᖑᓴᒃᑕᐅᔪᖃᖃᑦᑕᖅᐸᓪᓕ, ᐊᖓᔪᖅᑳᖑᔪᑦ ᖃᐅᔨᒪᔭᕆᐊᓖᑦ ᐊᖓᔪᒃᖠᕐᓂ ᐱᖃᑎᒋᔭᐅᔭᕆᐊᖃᕐᓂᖓᓂᒃ ᓄᑕᕋᖅ, ᓲᖑᓴᒃᑕᐅᓂᐊᖏᒻᒪᓐ. ᐊᖓᔪᖅᑳᖑᔪᑦ ᕿᑐᕐᖓᒥᖕᓂᒃ ᐃᓕᓐᓂᐊᕐᕕᖕᒧᑦ ᐊᒡᔭᖅᓯᖃᑦᑕᕈᓐᓇᖅᑐᑦ ᓲᖑᓴᖃᑦᑕᕐᓂᖅ ᓄᖅᑲᓚᐅᙱᓐᓂᖓᓂ. ᓄᑕᕋᖅ ᐅᖃᓪᓚᖃᑎᒋᓗᒍ ᖃᓄᐃᓕᐅᖅᑎᐅᔪᓄᑦ ᐃᓚᒋᔭᐅᓕᕈᓐᓇᕐᒪᖔᖅ, ᐃᖅᑲᐃᑎᓪᓗᒍᓗ ᐃᓄᑑᙱᓐᓂᖓᓂᒃ.

ᐃᒻᒥᓂᒃ ᐅᒃᐱᕆᓂᕐᒥᒃ ᓇᖕᒥᓂᕐᓗ ᒪᑭᑕᔪᓐᓇᕐᓂᖓᓂᒃ ᖃᐅᔨᒪᑎᓪᓗᒋᑦ.

ᓲᖑᓴᓲᖑᔪᑦ ᓄᑕᖅᑲᐃᑦ ᓲᖑᓴᒐᓱᐊᓲᑦ ᓄᑕᕋᐅᖃᑎᒥᓂᒃ ᐃᓄᑑᔪᓂᒃ. ᓄᑕᖅᑲᐃᑦ ᐃᑲᔪᖅᖢᒋᑦ ᖃᓄᖅ ᐃᓅᓯᖏᓐᓂ ᐃᓕᖅᑯᓯᖃᖃᑦᑕᓪᓗᐊᕐᒪᖔᑕ ᐊᒃᓱᐊᓗᒃ ᐊᓯᔾᔩᓂᖃᕈᓐᓇᖅᑐᖅ ᓄᑕᕋᕐᒧᑦ. ᐃᑲᔪᖅᓯᖅᐸᒡᓗᒋᑦ ᓄᑕᖅᑲᐃᑦ ᐃᓚᒋᔭᐅᖃᑕᐅᖁᓗᒋᑦ ᐱᓕᕆᖃᑎᒌᒃᐸᒃᑐᓄᑦ, ᐃᖃᐃᓕᓴᕐᓂᒃᑯᑦ ᐱᖅᑯᓴᐅᑎᓲᖑᔪᓄᑦ, ᐊᓯᖏᓐᓄᓪᓘᓃᑦ. ᐱᕕᖃᖅᑎᓐᓇᓱᒃᐸᒡᓗᒋᑦ ᓄᑕᖅᑲᐃᑦ ᐱᓕᕆᑦᑎᐊᕈᓐᓇᖅᑕᖏᓐᓂᒃ ᐱᓕᕆᐊᖃᕐᓂᐊᕐᒪᑕ − ᐊᖅᓴᕐᓂᒃᒥ, ᑭᐱᙳᐃᔭᕈᑎᒥᒃ, ᑭᓱᓕᕆᓗᓂ ᐃᖅᑲᓇᐃᔮᒥᒃ, ᐱᐊᓂᒃᐸᓪᓗ ᓂᖅᑐᕐᓗᒍ ᐊᒃᓱᕈᕐᓂᕆᖅᑲᐅᔭᖓ.

ᑭᐅᔾᔪᑎᒃᓴᓂᒃ ᓂᓪᓕᕈᓐᓇᖅᓯᔭᕆᐅᖅᓴᖃᑎᒋᓗᒋᑦ ᐱᐅᔪᓂᒃ

ᓲᖑᓴᒃᑕᐅᓕᖅᐸᑦ ᖃᓄᖅ ᑭᐅᔪᓐᓇᓛᕐᒪᖔᖅ ᐅᖃᕆᐅᖅᓴᑎᓪᓗᒍ ᓲᖑᓴᒃᑎᒋᔭᖓᓄᑦ. ᓲᕐᓗ, ᓄᑕᕋᖅ ᐅᖃᕈᓐᓇᖅᑐᖅ "ᑕᐃᒪ. ᓈᒻᒪᒋᙱᑕᕋ." ᐅᖄᓂᒃᑯᓂᓗ ᐱᓱᓯᓗᓂ ᕿᒪᒡᓗᒍ.