ᐊᐃᑉᐸᕇᑦᑎᐊᖕᓂᖅ

ᐊᐃᑉᐸᕇᑦᑎᐊᖕᓂᖅ ᐃᓚᒋᔭᐅᕗᖅ ᐃᓱᒪᖃᑦᑎᐊᖕᓂᖕᒥᑦ. ᐊᐃᑉᐸᕇᓕᑦᑎᐊᕈᓐᓇᖅᑐᒍᑦ ᑭᒃᑯᓕᒫᓂᑦ − ᐃᓚᕗᑦ, ᐱᖃᓐᓇᕆᔭᕗᑦ, ᐊᐃᑉᐸᕇᓕᓵᖕᓂᖅ ᐊᐃᑉᐸᖃᖕᓂᖕᒥᓪᓗ. ᐱᕕᖃᕆᐊᖃᖕᓇᖅᐳᑦ, ᖃᓄᐃᓕᐅᖃᑎᒋᕙᒡᓗᒍ ᐃᒃᐱᒋᑦᑎᐊᖃᑎᒌᒃᓗᓂᓗ ᐊᐃᑉᐸᖃᑦᑎᐊᖕᓂᐊᕐᓗᓂ.

 ᐊᐃᑉᐸᖃᑦᑎᐊᖅᖢᓂ, ᐃᓄᐃᑦ ᐊᔾᔨᒌᐸᓗᓲᖑᔪᑦ.

  • ᑕᑎᒌᒃᖢᑎᒃ
  • ᓱᓕᖃᑦᑕᐅᑎᕙᒃᖢᑎᒃ
  • ᓈᓚᖃᑦᑕᐅᑎᕙᒃᖢᑎᒃ
  • ᐊᖏᖃᑎᒌᒍᓐᓇᖅᖢᑎᒃ ᐱᔭᕆᐊᖃᕌᖓᒥᒃ
  • ᐃᒃᐱᒋᑦᑎᐊᖃᑦᑕᐅᑎᓪᓗᑎᒃ−ᑭᒡᓕᖃᖅᖢᑎᒃ, ᑎᒥᒥᒍᑦ, ᐃᓱᒪᒥᒍᑦ, ᐱᖃᓐᓇᕆᔭᓂᑦ, ᐃᓚᓂᑦ, ᐱᖁᑎᓂᒡᓗ
  • ᓈᒻᒪᒋᖃᑦᑕᐅᑎᓪᓗᑎᑦ ᑭᓇᐅᓂᖕᒥᓂᒃ
  • ᓱᓕᔪᓐᓇᖅᑐᑦ ᐃᒻᒥᓄᒃ
  • ᐃᑲᔪᖅᑎᒌᓲᑦ ᑐᕌᕋᓱᐊᖅᑕᖏᓐᓂᑦ ᐱᔪᒪᔭᖏᓐᓂᒡᓗ
  • ᑲᔪᖏᖅᓴᐃᖃᑎᒌᖃᑦᑕᖅᑐᑦ ᐊᔪᙱᓛᒥᓂᒃ ᐱᐅᓛᒥᓂᒡᓗ

ᐊᐃᑉᐸᖃᑦᑎᐊᖕᓃᑦ

ᐊᐃᑉᐊᕇᑦᑎᐊᓕᓵᖕᓂᑦ ᐱᒋᐊᖅᐸᒃᐳᖅ ᐊᔾᔨᒌᑐᑦ ᐊᐃᑉᐸᖃᑦᑎᐊᖕᓂᖕᒥᑦ. ᑎᒥᒃᑰᕈᓐᓇᖕᒥᔪᑦ − ᑕᓯᐅᕐᓗᑎᒃ, ᐃᕿᑉᐸᒡᓗᑎᒃ, ᑯᓂᒃᐸᒡᓗᑎᒃ, ᐃᓐᓇᖓᖃᑎᒌᖕᓂᕐᓗ. ᑭᒃᑯᓕᒫᑦᑎᐊᑦ ᓇᓪᓕᒋᔭᐅᔭᕆᐊᓖᑦ ᐊᑦᑕᖕᓇᙱᑦᑐᒦᓪᓗᑎᒡᓗ ᐅᓗᕆᐊᓇᙱᑦᑐᒥᒡᓗ.

ᓯᕗᓪᓕᖕᒥᑦ, ᐊᐃᑉᐸᕇᓕᓵᖅᑑᒃ ᐃᓄᑑᔪᒪᑐᐃᓐᓇᕆᐊᖃᓲᑦ ᑕᐃᒪᙵᑕᒫᑦ. ᐱᒻᒪᕆᐅᔪᖅ ᐊᐃᑉᐸᕇᑦ ᑲᑎᙵᖏᓚᐅᑲᒃᐸᒃᑯᑎᒃ ᐊᐃᑉᐸᕇᑦᑎᐊᖏᓐᓇᖕᓂᐊᕐᓗᑎᒃ ᐊᓯᒥᖕᓂᓪᓗ ᐃᓅᖃᑎᖃᖃᑦᑕᕐᓗᑎᒃ.

ᐊᑑᑎᖃᖅᑐᖅ ᑐᑭᓯᐅᒪᓗᓂ ᐊᐃᑉᐸᕇᖕᓃᑦ ᐊᔾᔨᒌᒃᐸᙱᒻᒪᑕ ᐱᐅᔪᒥᑦ ᐱᐅᙱᑦᑐᒧᑦ. ᐊᒥᓱᑦ ᐊᐃᑉᐸᕇᑦ ᕿᑎᐸᓗᐊᓃᑦᑐᑦ; ᐊᒥᓱᑦ ᑕᒪᒃᑮᔪᑦ. ᐃᓄᑐᐃᓐᓇᖅᑎᑐᑦ, ᐊᐃᑉᐸᕇᖕᓃᑦ ᓴᙱᓂᖃᖅᐳᑦ ᓴᙲᓐᓂᖃᖅᖢᑎᒡᓗ.

ᐊᐃᑉᐸᕇᑦᑎᐊᙱᓐᓂᖅ

ᐊᐃᑉᐸᕇᑦᑎᐊᖏᑦᑐᑦ, ᐃᓄᒃ ᖁᕕᐊᓱᒐᔭᙱᑦᑐᖅ, ᐊᑦᑕᖕᓇᖅᑐᒦᓪᓗ ᑲᑉᐱᐊᓱᒡᓗᓂᓘᓐᓃᑦ.

ᐊᐃᑉᐸᕇᑦᑎᐊᙱᓐᓂᖅ ᐊᑕᐅᓯᖕᒥᑦ ᐊᒥᓱᓂᒡᓘᓐᓃᑦ ᐃᓕᖅᑯᓯᖃᖅᐳᑦ:

  • ᑲᑉᐱᐊᓵᕆᕙᒃᖢᑎᒃ ᐊᐅᓚᑦᑎᓇᓱᒃᖢᑎᒃ ᖃᓄᖅ ᐊᐃᑉᐹ ᐅᖃᓪᓚᒋᐊᖃᖕᒪᖔᑦ, ᖃᓄᐃᓕᐅᕆᐊᖃᖕᒪᖔᑦ, ᐃᓱᒪᔭᕆᐊᖃᖕᒪᖔᓪᓗ
  • ᐋᓐᓂᖅᑎᕆᕙᒃᖢᑎᒃ ᑎᒥᒃᑯᑦ ᐃᓱᒪᒃᑯᓪᓗ ᐊᐅᓚᑦᑎᓇᓱᒃᖢᑎᒃ
  • ᐋᓐᓂᖅᑎᕆᓲᑦ ᑎᒥᒃᑯᑦ, ᐃᓱᒪᒃᑯᑦ, ᐅᖃᐅᓯᒃᑯᑦ, ᑮᓇᐅᔭᑎᒍᑦ, ᖁᓄᔪᖕᓂᐊᖕᓂᕐᓘᓐᓃᑦ
  • ᐸᓯᒃᓰᕙᒃᖢᑎᒃ ᐊᐅᓚᑦᑎᓇᓱᒃᖢᑎᒃ ᖃᓄᖅ ᐅᖃᓪᓚᒋᐊᖃᖕᒪᖔᑦ, ᖃᓄᐃᓕᐅᕆᐊᖃᖕᒪᖔᑦ ᐃᓱᒪᖕᒪᖔᓪᓘᓐᓃᑦ

ᐃᓚᖏᓐᓂᑦ ᐊᐃᑉᐸᕇᑦᑎᐊᙱᓐᓂᖕᒥᑦ, ᐊᔪᓇᑐᐃᓐᓇᕆᐊᓕᒃ ᐊᔪᕐᓇᕐᓗᓂᓘᓐᓃᑦ ᐊᓯᔾᔨᕆᐊᒃᓴᖅ ᐱᐅᓯᕚᓪᓕᕆᐊᒃᓴᕐᓗ. ᐊᓯᖏᓐᓂᑦ ᐊᐃᑉᐸᕇᑦᑎᐊᙱᑦᑐᑦ, ᑐᓴᐅᒪᖃᑎᒌᑦᑎᐊᖕᓂᖅ ᐊᓯᔾᔨᕈᒪᑦᑎᐊᖕᓂᕐᓗ ᐃᑲᔪᑐᐃᓐᓇᕆᐊᓕᒃ ᐊᑲᐅᓯᕚᓪᓕᕈᑎᒧᑦ.

ᐃᑲᔪᖅᑕᐅᓂᖅ

ᐃᑲᔪᖅᑕᐅᔪᓐᓇᖅᑐᑦ ᐃᓄᐃᑦ ᐊᐃᑉᐸᕇᑦᑎᐊᖏᓐᓂᖕᒦᑦᑐᑦ ᐱᑦᑎᐊᖃᑦᑕᙱᑦᑐᒥᓪᓗ. ᑖᓐᓇᓴᐃᓕᕕᒃᓴᐳᔾᔨᓲᑦ ᐃᑲᔪᖅᐸᒃᖢᑎᒡᓗ ᐃᓚᒌᓂᑦ ᐋᓐᓂᖅᑎᕆᔭᐅᓂᖕᒥᑦ. ᐃᓄᓕᕆᔩᑦ ᐃᑲᔪᕈᓐᓇᖅᑐᑦ ᐊᕐᓇᓂᑦ ᓄᑕᖅᑲᓂᒡᓗ ᕿᒫᑎᑦᑎᓂᖕᒥᑦ. ᖃᓄᐃᓕᖓᓂᖏᑦ ᒪᓕᒡᓗᒋᑦ, ᐃᓚᒌᑦ ᐊᑦᑕᖕᓇᙱᑦᑐᒧᐊᖅᑕᐅᓲᑦ−ᕿᒫᕕᖕᒧᑦ ᐊᖏᕐᕋᒧᓪᓘᓐᓃᑦ ᐊᑦᑕᖕᓇᙱᑦᑐᒧᑦ.

ᓄᓇᕗᑦ ᐃᓚᒌᓄᑦ ᕿᒫᕕᖃᖅᑐᑦ ᐅᑯᓇᓂ ᓄᓇᓕᖕᓂᑦ: 

  • ᐃᖃᓗᑦᑑᑦᑎᐊᒥ − ᓴᐃᓐᑦ ᒪᐃᑯ ᑐᐊᕕᖕᓇᖅᑐᒃᑯᕕᒃ: (867) 983-5232
  • ᐃᖃᓗᐃᑦ, ᕿᒫᕕᒃ: (867) 979-4500
  • ᑰᒑᕈᒃ ᐃᓚᒌᓄᑦ ᕿᒫᕕᒃ (867) 769-6100
  • ᖁᕐᓗᖅᑐᖅ ᐊᕐᓇᐃᑦ ᕿᒫᕕᖓ  (867) 982-3210
  • ᑲᖏᖅᖠᓂᖅ, ᑲᑕᐅᔭᖅ ᑲᑐᔾᔨᖃᑎᒌᑦ ᕿᒫᕕᒃ: (867) 645-2214

ᐃᓚᒌᓄᑦ ᕿᒫᕕᖃᙱᑉᐸᑦ ᓄᓇᒋᔭᖕᓂᑦ, ᐸᓖᓯᒃᑯᑦ ᓄᓇᓕᔅᓯᓘᓐᓃᑦ ᐃᓄᓕᕆᔨᐊ ᓄᓇᓕᖕᓂᓪᓘᓐᓃᑦ ᐃᖅᑲᖅᑐᐃᕕᓕᕆᔨᒃᑯᖏᑦ ᖃᓂᓛᒧᐊᖅᓯᔪᓐᓇᖅᑐᑦ ᕿᒫᕕᖕᒥᑦ ᐃᓂᒃᓴᒥᓪᓘᓐᓃᑦ ᐊᑦᑕᖕᓇᙱᑦᑐᒥᑦ.  ᓇᓂᓯᔪᓐᓇᖅᐳᑎᑦ ᓇᒧᑦ ᖃᐅᔨᒋᐊᕈᓐᓇᖕᒪᖔᑦ ᓄᓇᓕᓕᒫᓂᑦ ᓄᓇᕗᑦ ᒐᕙᒪᒃᑯᖏᑦᑕ ᐃᑭᐊᖅᑭᕕᐊᓂᑦ  ᐅᕙᓂ.

ᑐᐊᕕᖕᓇᖅᑐᖃᖅᐸᑦ, ᐸᓖᓯᒃᑯᓐᓄᑦ ᐅᖃᓗᒡᓗᑎᒃ. ᓄᑕᕋᖅᑕᖃᖅᐸᑦ ᐃᒡᓗᒥᑦ, ᐸᓖᓯᒃᑯᑦ ᐃᓄᓕᕆᔨᒧᑦ ᑐᓴᖅᑎᑦᑎᓇᔭᖅᑐᑦ.  ᐅᖄᓚᔪᓐᓇᖕᒥᔪᑦ ᓄᓇᕗᒻᒥᑦ ᐱᓂᕐᓗᒃᑕᐅᔪᓄᑦ ᐱᔨᑦᑎᕋᕐᕕᐊᓄᑦ ᑐᐊᕕᖕᓇᖅᑐᖃᖅᑎᓪᓗᒍ ᐃᑲᔪᖅᑕᐅᔪᒪᒍᕕᓪᓘᓐᓃᑦ ᐅᕗᖓ 1-866-456-5216.