ᐊᒃᓱᕈᖕᓂᖅ ᑎᒥᐅᑉ, ᐃᓱᒪᐅᑉ, ᐃᒃᐱᒋᔭᓪᓗ ᐊᑐᖅᑕᐅᕙᒃᐳᑦ ᐃᓅᓯᖕᒧᑦ. ᐊᑲᐅᙱᓕᐅᕈᑎᑕᖃᓕᕌᖓᑦ, ᑎᒦᑦ ᖃᓄᐃᑕᐅᓂᐊᕋᓱᒋᓕᖃᑦᑕᖅᑐᖅ ᐅᓗᕆᐊᓇᖅᑐᒦᓐᓇᓱᒋᓗᓂᓘᓐᓃᑦ. ᐊᑲᐅᙱᓕᐅᕈᑎᔪᖅ ᐊᖏᔪᓐᓇᖅᑐᖅ ᒥᑭᔪᓐᓇᖅᖢᓂᓗ, ᑭᓯᐊᓂ ᓱᓕ ᐊᒃᓱᕈᖕᓇᖅᑐᖅ.
ᐊᒃᓱᕈᖕᓇᖅᑐᒃᑰᓕᕌᖓᕕᑦ, ᑎᒦᑦ ᐃᓚᐅᕈᑎᓂᑦ ᐊᓂᐊᑎᑦᑎᕙᒃᐳᖅ ᐅᔾᔨᖅᓱᖕᓂᕐᓴᐅᓕᖅᖢᑎᑦ, ᓱᑲᖓᓕᖅᖢᑎᑦ, ᖃᓄᐃᓕᐅᓕᒑᓕᖅᖢᑎᓪᓗ. ᐅᑯᐊ ᑕᒡᕙ ᐊᒃᓱᕈᓕᖅᖢᓂ ᐃᒃᐱᒋᓐᓇᖅᑐᑦ:
- ᐆᒻᒪᑏᑦ ᓱᒃᑲᓕᓕᖅᖢᓂ, ᐊᐅᖕᓂᑦ ᓄᑭᖕᓄᐊᖅᑎᕆᓂᕐᓴᐅᓕᖅᖢᓂ ᖃᕆᓴᖕᓄᓪᓗ
- ᐊᐅᑦ ᖁᕝᕙᓯᓕᖅᖢᓂ
- ᐊᓂᖅᓵᖅᑐᖅᑕᑦ ᓱᒃᑲᓐᓂᕐᓴᐅᓕᕐᖢᓂ
- ᓂᕆᓯᒪᔭᑦ ᓱᒃᑲᐃᓕᕐᖢᑎ ᐃᕐᕋᕕᒃᑯᑦ
- ᐊᐅᒪᔮᖕᓂᕐᓴᐅᓕᖅᖢᑎᑦ
- ᓄᒃᑭᒃᑐᒻᒪᕆᐅᓪᓗᑎᑦ
- ᐃᔨᕕᑦ ᕿᕐᓂᖕᓂᖓ ᐊᖏᒡᓕᕚᓪᓕᖅᖢᑎᒃ, ᖃᐅᒪᒥᑦ ᐃᔨᖕᓄᐊᕐᑎᕆᓂᕐᓴᐅᓪᓗᓂ
ᑖᒃᑯᐊ ᐊᓯᔾᔨᖕᓂᐅᔪ ᑎᒥᖕᓂᑦ ᖃᓄᐃᓕᐅᓕᒑᓕᖅᑎᑦᑎᕙᒃᐳᑦ. ᑕᒪᓐᓇ ᐊᑑᑎᖃᒻᒪᕆᒃᑐᖅ ᑲᑉᐱᐊᓇᖅᑐᒦᓕᖅᑎᓪᓗᑎᑦ, ᓲᕐᓗ ᓇᓄᖅᓯᒍᕕᑦ ᓄᓇᐃᓐᓇᒥᑦ.
ᐊᒃᓱᕈᓕᖅᑎᑦᑎᔪᖅ (ᓲᕐᓗ ᓇᓄᖅ) ᕿᒫᒃᐸᑦ, ᖃᕆᓴᐃᑦ ᐊᒃᓱᕈᖕᓇᖅᑐᓂᑦ ᐃᓚᐅᕈᑎᓂᑦ ᓴᓇᔪᓐᓃᓲᖑᕗ. ᐃᓛᓐᓂᒃᑯᑦ ᖃᕆᓴᐃᑦ ᐊᒃᓱᕈᖕᓇᖅᑐᓂᑦ ᐃᓚᐅᕈᑎᓂᑦ ᐊᓂᐊᑎᑦᑏᓐᓇᓕᓲᖑᕗᖅ ᐊᒃᓱᕈᐃᓐᓇᐅᔭᖅᑰᔨᓕᖅᖢᑎᑦ. ᐃᓛᓐᓂᒃᑯᑦ, ᓄᑖᒥᑦ ᐊᑲᐅᙱᓕᐅᕈᑎᑖᖅᐸᒃᖢᑎᑦ ᑎᒦᑦ ᑕᖃᐃᖅᓯᕐᕕᖃᓚᐅᕋᓂ. ᑕᐃᒪᐃᒃᑯᓂ, ᑕᖃᐃᕐᓯᙱᓚᑎᑦ ᐊᒃᓱᕈᖕᓇᖅᑐᒥᑦ.
ᑕᖃᐃᖅᓯᖅᐸᙱᖦᖢᓂ, ᕿᓄᓂᕐᓴᐅᔪᓐᓇᖅᐳᑎᑦ, ᓂᙵᒡᓗᑎᑦ, ᖃᓄᐃᓕᐅᕈᓐᓇᐃᓪᓕᓗᑎᑦ ᐊᑲᐅᙱᓕᐅᕈᑎᐊᕐᔪᑯᓗᖕᓄᓪᓘᓐᓃᑦ. ᖁᒃᓴᓪᓚᒃᓴᕋᐃᓪᓗᑎᑦ ᑕᖃᓯᒪᐃᓐᓇᐅᔭᖅᑰᔨᓗᑎᓪᓘᓐᓃᑦ, ᐃᓱᒪᔪᓐᓇᑦᑎᐊᖏᓪᓗᑎᓪᓗ. ᐊᓯᖏᑦ ᐊᒃᓱᕈᖅᖢᓂ ᐊᑐᕐᓇᖅᑐᑦ:
- ᓂᐊᖁᙳᓂᖅ, ᖁᖓᓰᑦ ᓱᑲᖓᓗᓂ, ᑐᓄᕐᓗᒡᓗᑎᓪᓘᓐᓃᑦ
- ᐃᑎᒪᑎ ᓴᕋᓪᓗᑎᒃ
- ᓈᖑᓗᑎᑦ
ᐊᓂᒍᐃᓇᓱᑭᖢᑎᒃ ᐊᒃᓱᕈᓗᐊᕈᓐᓃᕋᓱᒃᖢᑎᒡᓘᓐᓃᑦ, ᐃᓚᖏᑦ ᓱᐴᖅᑐᓲᑦ, ᐃᒥᐊᓗᓲᑦ, ᓂᕆᓗᐊᓲᑦ, ᐋᖓᔮᖕᓇᖅᑐᖅᑐᓲᑦ, ᖃᓄᐃᓕᐅᔮᕈᓐᓃᕐᓗᑎᒡᓘᓐᓃᑦ. ᐃᓚᖏᑦ ᐊᓯᒥᓄᑦ ᓵᑉᐸᒃᑐᑦ ᐋᓐᓂᖅᑎᕆᓕᖅᐸᒃᖢᑎᒃ ᓲᖑᓴᓕᖅᖢᑎᒡᓘᓐᓃᑦ. ᑖᒃᑯᐊ ᖃᓄᐃᓕᐅᕐᓂᕐᓗᖕᓂᐅᔪᑦ ᐊᒃᓱᕈᓕᒃᑲᓐᓂᕈᑕᐅᔪᓐᓇᖅᑐᑦ ᐅᓗᕆᐊᓇᑐᐃᓐᓇᕆᐊᖃᖅᖢᓂᓗ ᑎᒥᖕᓄᑦ ᐃᓱᒪᖕᓄᓪᓗ.
ᐅᑯᐊ ᑕᒡᕙ ᐆᒃᑐᒐᒃᓴᑦ ᐊᒃᓱᕈᓗᐊᕈᓐᓃᕋᓱᒡᓗᑎᑦ ᐃᓅᓯᖕᓂᑦ.
- ᐅᖃᐅᓯᕆᓗᒍ ᐊᒃᓱᕉᑎᒋᔭᑦ ᑕᑎᒋᔭᖕᓄᑦ. ᐅᖃᐅᓯᕆᓪᓗᒋᑦ ᐊᑲᐅᙱᓕᐅᕈᑕᐅᔪᑦ ᐊᑲᐅᔪᖅ ᖃᓱᔾᔫᒥᓐᓇᖅᑐᖅ ᐊᒃᓱᕈᓗᐊᕈᓐᓃᖅᖢᓂᓗ.
- ᕿᐊᓂᖅ. ᕿᐊᓂᖅ ᐊᒃᓱᕈᓗᐊᕈᓐᓃᖕᓇᖅᑐᖅ ᐱᒻᒪᕆᐅᓪᓗᓂᓗ ᐃᓚᐅᒋᔭᐅᔪᖅ ᒪᒥᓴᖅᖢᓂ.
- ᕿᖃᙱᓪᓗᑎᑦ. ᐊᐅᓚᖃᑦᑕᕆᑦ − ᐱᓱᖃᑦᑕᕐᓗᑎᑦ ᐱᓱᕋᔭᒡᓗᑎᓪᓘᓐᓃᑦ ᐊᒃᓱᕈᓗᐊᕈᓐᓃᖁᓪᓗᑎᑦ.
- ᑎᒦᑦ ᐃᓱᒪᐃᓪᓗ ᑲᒪᒋᑦᑎᐊᕐᓗᒋᑦ. ᓯᓂᑦᑎᐊᖃᑦᑕᕐᓗᑎᑦ, ᓂᕆᑦᑎᐊᕐᐸᒡᓗᑎᑦ, ᖁᕕᐊᒋᔭᖕᓂᓪᓗ ᐊᑐᖅᐸᒡᓗᑎᑦ.
- ᐃᓕᑦᑎᓗᑎᑦ ᐊᑐᕐᐸᒡᓗᒋᓪᓗ ᖃᓱᓴᖕᓂᖕᒥᑦ. ᐊᓂᖅᓵᑯᑖᖃᑦᑕᖕᓂᖅ ᓄᑮᓪᓗ ᖃᓱᓴᖕᓃᑦ ᐱᐅᔪᑦ ᐊᒃᓱᕈᓗᐊᕈᓐᓃᖕᓂᖕᒧᑦ. ᐃᓕᑦᑎᒍᕕᒋᑦ, ᐊᑐᕐᐸᒡᓗᒋᑦ ᐱᖓᓱᐃᕐᓱᕐᓗᑎᑦ ᑕᓪᓕᒪᓄᑦ.
- ᐃᑲᔪᖅᑕᐅᓇᓱᒋᑦ. ᐃᑲᔪᖅᑕᐅᔭᕆᐊᖃᕋᓱᒋᒍᕕᑦ ᐊᒃᓱᕉᑎᒋᔭᖕᓄᑦ, ᐃᓱᒪᒃᓴᖅᓯᐅᕆᑦ ᐊᑐᐃᓐᓇᐅᔪᓂᑦ ᐃᑲᔫᑎᒃᓴᓂᑦ ᓄᓇᕗᒻᒥᐅᓄᑦ. ᑕᑯᒋᐊᕈᖅ ᐃᑲᔪᖅᑏᑦ ᐃᑲᔪᖅᑐᐃᓃᓪᓗ ᒪᒃᐱᒐᔭ ᑐᑭᓯᒋᐊᒃᑲᓐᓂᕈᒪᒍᕕᑦ.
