ᓂᐅᖁᖅᓯᐅᑎ

ᑭᓲᖕᒪᑦ ᓂᐊᖁᖅᓯᐅᑎ

ᓂᐊᖁᖅᓯᐅᑎ (ᐊᓰᑕᒥᓄᐱᓐ) ᐊᑐᖅᑕᐅᒐᔪᒃᐳᖅ ᐋᓐᓂᐊᓂᕐᒧᑦ ᐆᓇᕐᓂᕐᒧᓪᓗ. ᓇᓂᔭᐅᓯᒪᔪᑦ 700 ᐅᖓᑖᓂ ᐃᓅᓕᓴᐅᑎᓂᒃ, ᓲᕐᓗ ᑕᐃᓚᓈᓪ, ᒪᐃᑕᓪ, ᓂᐅᓯᑦᕋᓐ, ᓇᐃᑯᐃᓪ ᐊᓯᖏᓐᓂᒡᓗ.

ᐊᑦᑕᖕᓇᕈᑎᓪᓕ ᑭᓲᕙᑦ?

ᐊᓰᑕᒥᓄᐱᓐ, ᑕᐃᓚᓈᓪᑎᒧᑦ, ᐊᑲᐅᓯᕚᓪᓕᕐᓇᖅᐳᑦ, ᐊᑐᑦᑎᐊᕐᓗᒍ, ᑭᓯᐊᓂᑦᑕᐅᖅ ᑭᒡᓕᖃᖅᑐᖅ ᖃᔅᓯᓂᒃ ᐱᔪᓐᓇᕐᒪᖔᑦ ᐅᓪᓗᕐᒥᑦ. ᐅᖓᑖᓂᓗᐊᖅ ᐄᔭᒐᖃᑦᑕᕐᓗᓂ ᑎᖑᖕᒧᑦ ᓱᕈᕈᑕᐅᔪᓐᓇᖕᒪᑦ ᑐᖁᔾᔪᑕᐅᓗᓂᓘᓐᓃᑦ.

ᑭᓲᖕᒪ ᐊᓰᑕᒥᓄᐱᓐᒧᑦ ᐄᔭᒐᓗᐊᖅᑐᖅ?

ᐊᓰᑕᒥᓄᐱᓐᓄᑐᓗᐊᕐᓗᓂ ᐱᔮᕆᙱᓪᓗᓂ ᐋᒃᑲᓘᓐᓃᑦ, ᐄᔭᒐᓗᐊᖕᓂᖕᒥᑦ ᑕᐃᔭᐅᕗᖅ. 

ᐄᔭᒐᓗᐊᕈᓐᓇᖅᑐᑦ ᐃᒫᒃ:

  • ᐄᓰᑲᑕᐃᓐᓇᐅᔭᕐᓗᓂ ᐊᒥᓱᓗᐊᕌᓗᖕᓂᓪᓘᓐᓃᑦ ᐄᔭᒐᖅᐸᒡᓗᓂ ᑕᐃᒪᙵᑕᒫᑦ.
  • ᐊᑕᐅᓯᐅᙱᑦᑐᒥᑦ ᐃᓅᓕᓴᐅᑎᑐᕐᓗᓂ ᐊᑕᐅᑦᑎᒃᑯᑦ ᐱᑕᖃᖅᑐᓂᑦ ᐊᓰᑕᒥᓄᐱᓐᒥᑦ.

ᖃᓄᕐᓕ ᐊᓰᑕᒥᓄᐱᓐ ᐊᑐᑦᑎᐊᖅᑕᐅᔪᓐᓇᖅᐸ?

  1. ᐊᒥᓱᓂᑦ ᐊᓰᑕᒥᓄᐱᓐᓕᖕᓂᑦ ᐄᔭᒐᖅᑕᐃᓕᕙᒡᓗᑎᒃ ᐊᑕᐅᑦᑎᒃᑯᑦ.
  2. ᒪᓕᑦᑎᐊᕐᐸᒡᓗᒋᑦ ᒪᓕᒋᐊᓖᑦ ᐋᓐᓂᐊᓯᐅᑎᒥᙶᖅᑐᑦ.  ᐊᐱᖅᓱᖅᐸᒡᓗᑎᒃ ᖃᐅᔨᓇᓱᒡᓗᑎᒡᓗ ᐃᓅᓕᓴᐅᑏᑦ ᐊᓰᑕᒥᓇᒥᓐᖃᖕᒪᖔᑦ.
  3. ᐅᖃᓕᒫᖏᓐᓇᐅᔭᕐᓗᒋᑦ ᒪᓕᒃᐸᒡᓗᒋᓪᓗ ᑎᑎᕋᖅᓯᒪᔪᑦ ᖄᖓᓂ ᐄᔭᒐᖅᑎᑦᑎᓚᐅᙱᓐᓂᖕᓂᑦ ᐃᓅᓕᓴᓚᐅᙱᓐᓂᖕᓂᓪᓘᓐᓃᑦ.
  4. ᐃᓅᓕᓴᐅᑎ ᐴᑐᖃᖓᓃᑎᓪᓗᒍ ᖄᖓ ᐅᖃᓕᒫᕈᓐᓇᖕᓂᐊᕋᕕᐅᒃ, ᐃᖅᑲᐅᒪᓗᒍ ᖃᔅᓯᓂᒃ ᐄᔭᒐᕆᐊᖃᖕᒪᖔᑦ ᑭᓱᒧᓪᓗ ᐊᑐᖕᒪᖔᑦ. ᑐᑭᓯᐅᒪᑦᑎᐊᒻᒪᕆᒋᐊᖃᖅᑐᑎᑦ ᖃᔅᓯᓂᒃ ᐄᓯᓂᐊᖕᒪᖔᑦ, ᖃᖓᒃᑯᓪᓗ, ᖃᖓᓗ ᓄᖅᑲᕋᔭᖕᒪᖔᑦ.
  5. ᖃᐅᔨᒪᒋᐊᕐᓗᑎᑦ ᖃᓄᑎᒋ ᐃᓅᓕᓴᖃᑦᑕᖕᒪᖔ ᖃᖓᓗ ᑭᖑᓪᓕᖅᐹᒥᑦ ᐄᓯᓚᐅᖕᒪᖔᑦ.
  6. ᐃᓅᓕᓴᐅᑏᑦ ᑐᖅᑯᑦᑎᐊᕐᓯᒪᕙᒡᓗᒋᑦ ᑮᖃᖅᑐᒥᑦ ᒪᑐᓕᖕᒧᑦ ᖁᑦᑎᒃᑐᒦᓪᓗᓂᓗ ᓄᑕᕋᖕᒧᑦ ᐃᓄᖅᑕᐅᓗᓂ.
  7. ᐃᓱᓕᓯᒪᔪᓂᑦ ᐊᑐᖅᓯᒪᙱᑦᑐᓂᓪᓘᓐᓃᑦ ᐃᓅᓕᓴᐅᑎᓂᑦ ᐋᓐᓂᐊᕕᓕᐊᕈᑎᓗᒋᑦ ᐊᒃᑕᖅᑕᐅᑦᑎᐊᖁᓪᓗᒋᑦ.
  8. ᑎᖑᒃᑯᑦ ᐋᓐᓂᐊᖃᕈᕕᑦ ᐱᖓᓱᓂᒡᓘᓐᓃᑦ ᐊᒥᓲᓂᕐᓴᓂᒡᓘᓐᓃᑦ ᐃᒥᐊᓗᖃᑦᑕᕈᕕᑦ ᖃᐅᑕᒫᑦ, ᐊᒥᓲᓛᖓ ᐱᔪᓐᓇᕋᔭᖅᑕᐃᑦ ᒥᑭᓐᓂᕐᓴᐅᑐᐃᓐᓇᕆᐊᓕᒃ ᑎᑎᕋᖅᓯᒪᔭᖓᓂᑦ ᕐᑳᖓᓂ.

ᖃᐅᔨᒪᓗᒍ ᐄᔭᒐᕆᐊᓖᑦ!

ᐊᒥᓲᓛᖓᓂᑦ 4000 ᒥᓗᖑᕌᒻᔅ ᐅᖓᑖᓂᑦ ᐄᓯᖃᑦᑕᙱᓪᓗᑎᑦ, ᐊᔾᔨᑐᐃᓐᓇᖓ 8 ᓴᙱᓂᕐᓴᑦ ᐄᔭᒐᑦ 500 ᒥᓗᖑᕌᒻᓂᑦ, 12−ᓂᒡᓘᓐᓃᑦ 325 ᒥᓗᖑᕌᒻᔅᓂᑦ.

ᐊᒥᓲᓛᖓ ᐊᓰᑕᒥᓄᐱᓐᑐᕐᑕᐅᔪᓐᓇᖅᑐᑦ ᐅᓪᓗᖕᒥᑦ ᓄᑕᖅᑲᓄᑦ 12 ᑐᖔᓂ ᐅᑭᐅᓕᖕᓄᑦ. ᐅᖁᒪᐃᓐᓂᖏᑦ−ᐅᑭᐅᖏᑦᑎᒍᓪᓗ ᐄᓅᓕᓴᐅᑎᓕᐅᓲᑦ ᓄᑕᖅᑲᓄᑦ ᐊᓰᑕᒥᓄᐱᓐᓕᖕᓄᑦ.

ᑲᒪᑦᑎᐊᕐᓂᖅ ᑎᒥᖕᓂᒃ ᐃᓱᒪᖕᓂᒃᓗ

ᐃᓚᖏᑦ ᐃᓄᐃᑦ ᐄᔭᒐᓗᐊᓲᖑᖕᒪᑕ ᐃᓱᒪᖏᑎᒍᑦ ᐋᓐᓂᐊᕌᖓᒥᒃ  ᐃᒃᐱᖕᓂᐊᒑᖓᒥᒃᓘᓐᓃᑦ ᑕᖃᖓᓂᕐᒥᒃ ᐅᕝᕙᓘᓐᓃᑦ ᓂᙵᐅᒪᒑᖓᒥᒃ. ᐃᖅᑲᐅᒪᓂᐊᖅᐳᑎᑦ ᐃᓄᑑᖏᓐᓇᕕᑦ. ᐃᓱᒪᒃᑯᑦ ᐊᔪᕈᑎᖃᕈᕕᑦ ᐅᕝᕙᓘᓐᓃᒃ ᖃᐅᔨᒪᔭᖃᕈᕕᑦ ᐊᒃᓱᕉᑎᖃᖅᑐᒥᒃ ᐃᓱᒪᒥᒍᑦ, ᐃᑲᔪᖅᑕᐅᔪᓐᓇᑦᑎᐊᖅᐳᓯ. ᐃᑲᔪᖅᑕᐅᔪᒪᖃᑦᑕᕆᔅᓯ ᐱᖃᓐᓇᕆᔭᔅᓯᓐᓄᑦ, ᓇᓕᐊᖕᓄᑐᐃᓐᓇᖅ ᐃᓚᖕᓄᑦ, ᐃᓕᓴᐃᔨᒧᑦ, ᐃᓕᓐᓂᐊᕐᕕᖕᒥ ᐃᓅᓯᓕᕆᔨᒧᑦ ᐅᕝᕙᓘᓐᓃᑦ ᐃᓐᓇᕐᒧᑦ. ᐅᖃᐅᓯᕆᓗᒋᑦ ᐃᒃᐱᖕᓂᐊᒋᔭᑎᑦ ᖃᓄᐃᓕᖕᒪᖔᖅᐱᓪᓗ. ᐋᓐᓂᐊᕕᓯᓐᓅᕐᓗᑎ ᐃᓱᒪᓕᕆᔨᒥᑦ ᐅᖃᖃᑎᖃᕆᐊᖅᑐᕐᓗᑎᑦ.