ᓂᙵᐅᒪᓂᖅ
ᓂᙵᐅᒪᓂᖅ ᐃᓅᑉ ᐃᒃᐱᖕᓂᐊᓂᕆᕙᐅᒃ. ᑭᓇᑐᐃᓐᓇᖅ ᓂᙵᐅᒪᓲᖅ ᐃᓛᓐᓂᒃᑯᑦ ᖃᓄᐃᙱᖦᖢᓂᓗ. ᐅᑯᐊ ᑕᒡᕙ ᐃᓚᖏᑦ ᓂᙵᒍᑕᐅᓲᑦ ᐃᓄᖕᓄᑦ:
- ᐃᖅᑲᓇᐃᔭᖃᑏᑦ, ᐃᓚᐃᑦ, ᐱᖃᓐᓇᕆᔭᑦ, ᖃᐅᔨᒪᙱᑕᐃᓪᓘᓐᓃᑦ ᖃᓄᐃᓕᒑᖓᒥ ᖃᓄᐃᓕᐅᕌᖓᒥᒡᓘᓐᓃᑦ ᓂᙵᖕᓇᖅᑐᒥᑦ.
- ᐃᓄᒃ ᐱᖏᒐᐃᓐᓇᐅᔭᖅᐸᑦ ᐊᑲᐅᙱᓕᐅᕈᑎᒥᒃ ᐃᓱᒪᓗᐊᖃᑦᑕᖅᐸᓪᓘᓐᓃᑦ ᓈᒻᒪᙱᑦᑐᓂᑦ ᐊᑐᓚᐅᖅᓯᒪᔭᖏᓐᓂᑦ.
- ᐃᓄᒃ ᐊᑐᕐᓯᒪᒍᓂ ᖁᕕᐊᓇᙱᑦᑐᒻᒪᕆᖕᒥᑦ, ᓲᕐᓗ ᐃᓅᔪᓐᓃᖅᑐᖃᖅᓯᒪᒃᐸᑦ ᖃᓂᒋᔭᒥᓂᒃ.
ᐃᓕᕋᓵᖕᓂᖅ ᐅᒋᐊᙳᓂᕐᓗ
ᐃᓕᕋᓵᕆᕙᒃᑐᑦ ᐅᓇᑕᓕᒑᖏᓐᓇᐅᔭᖅᐳᑦ. ᐃᓕᕋᓵᕆᓲᑦ ᐅᖃᐅᑎᔭᖕᓂᙱᑦᑐᑦ, ᕿᓄᐃᓵᕈᓐᓇᙱᑦᑐᑦ, ᓂᙵᒃᓴᕋᐃᑦᑐᑦ, ᐃᓱᒪᑦᑎᐊᕈᓐᓇᙱᑦᑐᓪᓘᓐᓃᑦ. ᐅᓇᑕᒐᔪᒃᑐᑦ ᐅᖃᓲᓪᓘᓐᓃᑦ ᑎᒡᓗᒃᓯᔪᒪᓪᓗᑎᒃ ᑭᓱᒥᑦ ᐃᓄᖕᒥᓪᓘᓐᓃᑦ. ᐃᓕᕋᓵᕆᕙᖕᓂᖅ ᐃᓚᓐᓇᕆᔭᖃᕈᓐᓃᖕᓇᖅᐳᖅ.
ᐅᒋᐊᙳᓂᖅ ᐱᒋᐊᖅᑳᓲᖅ ᐅᖃᐅᓯᒃᑯᑦ ᐱᒋᐊᖅᓯᓂᐊᕐᓂᕋᖅᖢᑎᒃ ᖃᓄᐃᓕᐅᕌᕐᔪᒃᐸᓕᕐᓗᑎᒡᓘᓐᓃᑦ, ᑭᓯᐊᓂ ᖃᖓᐅᓕᕌᖓᑦ, ᑎᒥᒧᑦ ᖃᓄᐃᓕᓯᔪᓐᓇᕐᓯᓲᑦ. ᐋᓐᓂᖅᑎᕆᓂᖅ ᐅᓗᕆᐊᓇᖅᑐᖅ ᐊᕕᔾᔪᑕᐅᕙᒃᖢᓂᓗ. ᐅᒋᐊᙳᓂᖅ ᐃᓄᖕᓂᑦ ᐊᑲᐅᙱᓕᐅᕈᑕᐅᓕᕈᓐᓇᖅᐳᖅ ᒪᓕᒐᓄᑦ.
ᐃᓄᐃᑦ ᓂᙵᐅᒪᓂᖕᒥᓂᒃ ᖃᓄᐃᓕᐅᕈᑎᖃᓲᑦ ᐊᔾᔨᒌᙱᑦᑑᑎᒃᑯᑦ. ᐃᓚᖏᑦ ᐱᐅᓂᕐᓴᐅᔪᑦ ᐊᓯᖏᓐᓂᑦ.
- ᐊᑲᐅᔪᒃᑯᑦ ᓂᙵᐅᒪᓂᖅ ᓴᖅᑭᑦᑎᓂᒃᑯᑦ ᓂᙵᐅᒪᓂᐅᔪᓂᑦ ᐅᖃᓪᓚᙱᓪᓗᑎᒃ ᐱᐅᙱᑦᑐᓂᑦ ᐋᓐᓂᕈᑕᐅᔪᓐᓇᖅᑐᓂᒡᓘᓐᓃᑦ ᐊᑐᙱᓪᓗᑎᒃ. ᐅᖃᐅᓯᕆᕙᒡᓗᒋᑦ ᐃᒃᐱᖕᓂᐊᒋᔭᑎᑦ ᐊᔭᐅᖅᑐᐃᙱᓪᓗᑎᑦ ᓲᖑᓴᙱᓪᓗᑎᓪᓘᓐᓃᑦ. ᐅᖃᑦᑎᐊᕐᓗᑎᑦ ᐃᒃᐱᒋᔭᖕᓂᑦ ᐅᐃᒪᔮᙱᓪᓗᑎᑦ ᐃᒃᐱᒍᓱᑦᑎᐊᖕᓂᒃᑯᓪᓗ.
- ᐱᐅᙱᑦᑐᓪᓕ ᓂᙵᐅᒪᔭᑦ ᐃᓗᐊᓃᑎᑐᐃᓐᓇᕐᓗᒍ, ᑎᒍᒥᐊᕐᓗᑎᒡᓗ ᓂᙵᐅᒪᓐᓇᕆᔭᖕᓂᑦ. ᐃᓛᓐᓂᒃᑯᑦ ᓂᙵᐅᒪᓂᖅ ᐊᖏᒡᓕᕙᓪᓕᐊᕙᒃᐳᖅ ᐅᐊᑲᓪᓚᓗᐊᖑᓕᖅᐸᒃᖢᓂᓗ. ᑕᒪᓐᓇ ᓂᙵᐅᒪᓂᖅ ᐊᒃᑐᐃᔪᓐᓇᖅᑐᖅ ᐊᐃᑉᐸᕇᖕᓂᖕᒥᑦ, ᖃᐅᑕᒫᑦ ᖃᓄᐃᓕᐅᒐᒃᓴᓂᑦ, ᑎᒥᒧᓪᓗ ᖃᓄᐃᙱᑦᑎᐊᖕᓂᖕᒧᓪᓗ.
ᐃᓚᖓᑦ ᓂᙵᐅᒪᓂᓕᕆᓂᖅ ᐃᓕᓴᖅᓯᔪᓐᓇᖕᓂᖅ ᐃᒃᐱᖕᓂᐊᔭᒥᑦ. ᑕᐃᒪᓕ ᓱᒃᑲᐃᒡᓕᒋᐊᕐᓗᒋᑦ ᑭᓱᓕᒫᑦ, ᐊᐅᓚᑦᑎᐊᕐᓗᑎᑦ ᖃᓄᐃᓐᓂᕆᔭᖕᓂᑦ, ᓈᓚᒡᓗᑎᓪᓗ ᖃᓄᐃᓕᐅᓕᖕᒪᖔᑦ ᑎᒦᑦ. ᐱᒋᐊᕐᓗᑎᑦ, ᐱᖓᓱᐃᕐᓗᑎᑦ ᓂᐅᕐᔪᐊᕐᓗᑎᑦ. ᓇᐃᓴᐃᕋᔮᓕᕐᓗᑎᒡᓗ 10−ᒧᑦ ᐅᖃᓪᓚᙱᓪᓗᑎᑦ ᖃᓄᐃᓕᐅᙱᓪᓗᑎᓪᓘᓐᓃᑦ. ᑕᐃᒪᙵᓕᒫᖅ, ᐆᒻᒪᑎᕕᑦ ᑎᒡᓕᖕᓂᐊ ᓱᒃᑲᐃᒡᓕᕙᒃᐳᖅ, ᓴᐃᓕᓂᕐᓴᐅᓕᕐᓗᑎᓪᓗ, ᐃᒻᒥᒥᒡᓗ ᐊᐅᓚᔪᓐᓇᖕᓂᕐᓴᐅᓕᕐᓗᑎᒡᓗ. ᓂᙵᐅᒪᓃᑦ ᐃᓕᖕᓂᑦ ᐊᐅᓚᑦᑎᙱᓚᖅ. ᓴᐃᓕᓕᕈᕕᑦ, ᐊᑲᐅᑦᑎᐊᖅᑐᖅ ᐅᖃᐅᓯᕆᔭᕆᐊᒃᓴᖅ ᐃᒃᐱᒋᔭᑎᑦ.
ᐱᒻᒪᕆᐅᔪᒥᑦ ᐅᖃᐅᓯᒃᓴᖃᕈᕕᑦ, ᐅᖃᓪᓚᒋᐊᕆᑦ ᓴᐃᓕᓕᕈᕕᑦ ᐅᓚᕕᓴᖅᓴᕋᐃᑦᑐᓐᓃᕈᕕᓪᓗ. ᑐᑭᓯᒋᐊᒃᑲᓐᓂᕈᒪᒍᕕᑦ, ᒪᒃᐱᖅᑐᒐᒧᐊᕐᓗᑎᑦ ᒥᒃᓵᓄᑦ ᐊᐃᑉᐸᕇᖕᓂᑦ..