ᐃᓄᑑᙳᕐᓂᖅ

ᐃᓄᑑᙳᕐᓂᖅ

ᖃᑯᑎᒃᑯᑦ ᐃᓄᑑᙳᓲᖑᒐᑦᑕ

 

ᖃᑯᑎᒃᑯᑦ ᐃᓄᑑᙳᖅᑐᐃᓐᓇᐅᓲᖑᕗᒍᑦ.  ᐃᓄᑑᔪᕐᔫᔮᓲᖑᓪᓗᑕᓗ ᐱᖃᑎᖃᕋᓗᐊᖅᑐᑕ.  ᑭᓯᐊᓂᓕ ᐃᓚᖏᑦ ᐃᓄᐃᑦ ᐃᓄᑑᙳᐃᓐᓇᖅᑐᒻᒪᕆᐊᓘᓲᑦ.

ᐃᓄᑑᔪᕐᔫᔮᖏᓐᓇᕈᕕᑦ ᖃᖓᓕᒫᒃᑯᑦ ᐊᑦᑐᐃᓂᖃᕈᓐᓇᕐᒪᑦ ᑕᒪᓐᓇ ᓯᓂᖃᑦᑕᓂᕐᓄᑦ ᐋᓐᓂᐊᖃᑦᑕᓕᕐᓗᑎᓪᓗ. 

ᐃᓄᑑᙳᕐᓂᖅ ᐊᔾᔨᒋᙱᓛ ᓄᒫᓱᓐᓂᕐᒥᒃ ᐊᒻᒪᓗ ᐃᓄᑑᖏᓐᓇᖃᑦᑕᕆᐊᑐᙱᓚᑎᑦ ᐃᓄᑑᔪᕐᔫᔮᖃᑦᑕᕐᓗᑎᑦ.  ᐃᓚᖏᑦ ᐃᓄᐃᑦ ᐃᓄᑑᙳᖅᑐᒻᒪᕆᐅᓲᑦ ᐃᑉᐱᓐᓂᐊᓂᖏᓐᓂᒃ ᓴᖅᑭᔮᖅᑎᑦᑎᖃᑦᑕᙱᓐᓂᑯᖏᓐᓄᑦ ᐊᓯᖏᑦ ᐅᕝᕙᓘᓐᓃᑦ ᐊᓯᒥᓄᑦ ᐅᖃᖃᑎᖃᖃᑦᑕᙱᓐᓂᑯᖏᓐᓄᑦ.

ᐅᑯᐊ ᐃᑲᔫᑎᐅᔪᓐᓇᖅᑐᑦ ᐃᓄᑑᙳᕐᓂᐊᙱᒻᒪᑕ ᐃᓄᐃᑦ.

1. ᐃᓅᖃᑎᖃᐃᓐᓇᕆᑦ

ᐃᓄᑑᙳᖅᑎᓪᓗᑎᑦ, ᐊᒃᓱᕈᕐᓇᕐᒪᑦ ᐃᓱᒪᓗᓂ ᐊᓯᖕᓃᒐᓱᐊᕆᐊᖅ ᐅᕝᕙᓘᓐᓃᑦ ᐊᓯᖕᓄᑦ ᐅᖃᖃᑎᖃᕐᓗᓂ.  ᐃᓄᑑᑐᐃᓐᓇᕐᓗᑎᑦ ᐊᒻᒪᓗ ᐊᓯᖕᓃᖃᑦᑕᙱᒃᑯᕕᑦ ᑕᒪᓐᓇ ᐊᑲᐅᙱᓕᐅᕈᑎᐅᔪᖅ ᐊᖏᓪᓕᑲᓐᓂᑐᐃᓐᓇᓂᐊᕐᒪᑦ.

2. ᑭᓱᓕᕆᖃᑎᖃᖃᑦᑕᕆᑦ ᐃᓅᖃᑎᖕᓂᑦ

ᐃᓚᐅᖃᑕᐅᖃᑦᑕᕆᑦ ᑲᑐᔾᔨᔨᐅᔪᓂᑦ ᐃᓄᓐᓂᒃ ᐊᓯᖕᓂᑦ ᖃᐅᔨᒪᓕᕐᓂᐊᕋᕕᑦ.  ᐃᓚᐅᒍᓐᓇᖅᑐᑎᑦ ᑭᓱᓕᕆᕙᒃᑐᓂᑦ ᓲᕐᓗ − ᓂᖅᑎᐅᖃᑕᐅᖃᑦᑕᕐᓗᑎᑦ, ᓱᕈᓯᕐᓂᑦ ᐱᓕᕆᖃᑎᖃᖃᑦᑕᕐᓗᑎᑦ, ᑐᒃᓯᐊᕆᐊᖃᑦᑕᕐᓗᑎᑦ, ᐱᙳᐊᖃᑕᐅᖃᑦᑕᕐᓗᑎᑦ.  ᐃᑲᔪᕋᔭᖅᑐᖅ ᑕᐃᒪᐃᒃᑯᕕᑦ ᐃᓅᖃᑎᖕᓃᖃᑕᐅᖃᑦᑕᕋᕕᑦ ᐊᔾᔨᒌᓂᑦ ᐱᓕᕆᖃᑎᖃᓲᖑᒍᒪᓂᖅᓯᖕᓄᑦ.

3. ᐃᓕᓐᓄᑦ ᐱᑦᑎᐊᕆᑦ

ᐃᓕᓐᓂᒃ ᑲᒪᒋᐊᕐᔫᒥᔭᕆᐊᖃᖅᑐᑎᑦ ᐊᓯᐊᒍᑦ.  ᐊᒃᓱᕈᕐᓇᓛᖑᔪᖅ ᐃᓕᓐᓄᑦ ᐱᑦᑎᐊᕐᓗᑎᑦ ᐃᒻᒥᓂᒃ ᐃᑉᐱᓐᓂᐊᑲᒻᒪᑎᓪᓗᑎᑦ.  ᖁᕕᐊᓱᓐᓂᖅᓴᐅᓗᓂ ᐃᕝᕕᑦ ᐱᓪᓗᑎᑦ ᐱᔭᕆᐊᑭᓕᖅᑎᑦᑎᒍᑕᐅᓂᐊᖅᑐᑦ ᐊᓯᖕᓃᖃᑦᑕᕐᓗᑎᑦ.

4. ᐃᓕᓐᓂᐊᒃᑲᓐᓂᕆᑦ ᐃᓄᑑᙳᕐᓂᑉ ᒥᒃᓵᓄᑦ

ᐃᓕᓐᓂᐊᒃᑲᓐᓂᖅᑐᓂ ᐃᓄᑑᙳᕐᓂᕐᒥᒃ, ᐊᒻᒪᓗ ᑕᐃᒪᐃᑦᑐᒐᓚᐅᓲᖑᓂᖏᓐᓂᑦ ᐃᓄᐃᑦ, ᐃᓄᑑᙳᖏᓐᓂᖅᓴᐅᒐᔭᖅᑐᑎᑦ.  ᐃᓄᑑᙳᕐᓂᖅ ᑲᒪᒋᒐᓱᐊᕐᓗᒍ ᐊᒃᓱᕈᕐᓇᓂᖅᓴᐅᒻᒪᑦ ᑐᑭᓯᐅᒪᙱᒃᑯᕕᐅᒃ.

5. ᓇᓂᓯᒋᑦ ᐊᓯᖕᓂᑦ ᐃᑲᔪᕈᓐᓇᖅᑐᒥᒃ

ᐱᖃᑏᑦ, ᖃᑕᙳᑏᑦ ᐅᕝᕙᓘᓐᓃᑦ ᐃᓅᓯᓕᕆᔨ, ᐃᓄᒻᒥᒃ ᐅᖃᖃᑎᖃᕆᑦ.  ᐃᑲᔪᕐᓂᖃᓪᓚᕆᒍᓐᓇᕐᒪᑦ.  ᐃᓄᑑᙳᖅᓯᒪᒍᕕᑦ ᒪᒥᓴᓐᓇᓛᖑᕗᖅ ᐃᓕᓐᓄᑦ ᐃᓅᖃᑎᖕᓂᑦ ᐅᖃᖃᑎᖃᖃᑦᑕᕐᓗᑎᑦ.