ᐃᓱᒪᒥᒍᑦ ᐋᓐᓂᐊᕈᑎᓖᑦ

ᐃᓱᒪᒥᒍᑦ ᐋᓐᓂᐊᕈᑎᓖᑦ

ᐊᒥᓱᑦ ᐃᓄᐃᑦ ᖃᑕᙳᑎᒌᓪᓗ ᐊᒃᑐᖅᑕᐅᓲᖑᕗᑦ ᐃᓱᒪᒥᒍᑦ ᐋᓐᓂᐊᕈᑎᖃᖅᑐᖃᓕᕌᖓᑦ. ᐃᓱᒪᒃᑯᑦ ᐋᓐᓂᐊᕈᑎᖃᖅᖢᓂ ᐊᔪᕐᓇᓲᖑᖕᒪᑦ ᐃᓱᒪᑦᑎᐊᕆᐊᒃᓴᖅ, ᑲᒪᓇᓱᒋᐊᒃᓴᖅ ᐃᒃᐱᒋᔭᒥᓂᒃ, ᖃᐅᑕᒫᓪᓗ ᐱᓕᕆᐊᕆᓲᖏᓐᓂᒃ ᑲᒪᓇᓱᒋᐊᒃᓴᖅ. ᐃᓱᒪᒃᑯᑦ ᐋᓐᓂᐊᕈᑏᑦ ᐋᓐᓂᐊᕈᑕᐅᖕᒪᑕ ᐃᓱᒪᒃᑯᑦ ᐊᒃᑐᐃᔾᔪᑎᒋᔪᓐᓇᖅᖢᒋᑦ, ᐃᒃᐱᒋᔭᒃᑯᑦ ᑎᒥᒃᑯᓪᓗ ᐃᒃᐱᒋᔭᒃᑯᑦ.

 

·       ᐃᓱᒪᒃᑯᑦ ᐋᓐᓂᐊᕈᑎᖃᕐᓂᖅ ᐊᒃᑐᐃᔾᔪᑕᐅᔪᓐᓇᖅᐳᖅ ᑲᓇᑕᒥᐅᑕᓕᒫᓂᒃ ᐃᓅᓯᖏᑦᑕ ᐃᓚᖓᒍᑦ ᖃᑕᙳᑎᖓᓐᓂᒃ, ᐱᖃᓐᓇᕆᔭᖓᓐᓂᒃ ᐃᖅᑲᓇᐃᔭᖃᑎᖓᓐᓂᒡᓘᓐᓃᑦ ᑕᐃᒪᐃᑦᑐᖃᓕᕌᖓᑦ.

·       ᑲᓇᑕᒥᐅᑕᑦ 20%-ᖏ ᐃᓱᒪᒥᒍᑦ ᐋᓐᓂᐊᕈᑎᖃᓕᕈᓐᓇᖅᑐᑦ ᐃᓅᓯᖓᑦᑕ ᐃᓚᖓᒍᑦ.

·       ᐃᓄᐃᑦ ᖃᓄᑐᐃᓐᓇᖅ ᐅᑭᐅᓖᑦ ᐃᓱᒪᒥᒍᑦ ᐋᓐᓂᐊᕈᑎᖃᓕᕈᓐᓇᖅᐳᑦ, ᐃᓕᓐᓂᐊᕐᓂᖅ, ᑮᓇᐅᔭᓕᐅᕐᓂᖅ, ᐃᓕᖅᑯᓯᕆᔭᕐᓗ ᐱᔾᔪᑕᐅᓗᑎᒃ.

·       8%-ᐸᓗᑦᑎᐊᑦ ᐃᓐᓇᐃᑦ ᐃᓅᓯᖓᑦᑕ ᐃᓚᖓᓐᓂᒃ ᐃᓱᒫᓗᖕᓇᖅᑐᒧᑦ ᑎᑭᑕᐅᔪᓐᓇᖅᑐᑦ.

 

ᐃᓱᒪᒃᑯᑦ ᐋᓐᓂᐊᓕᕈᑕᐅᓲᑦ ᖃᓄᑐᐃᓐᓈᓗᒃ ᓴᖅᑭᑦᑐᓐᓇᖅᐳᑦ, ᑎᒥᒃᑯᑦ ᐋᓐᓂᐊᓕᕈᑕᐅᓲᑦ ᖃᓄᑐᐃᓐᓇᖅᑕᐅᖅ ᓴᖅᑭᓲᖑᖕᒪᑕ ᐃᓱᒪᑦᑎᐊᒥᓂᒃ. ᐃᓱᒪᒃᑯᑦ ᐋᓐᓂᐊᕈᑎᖃᕐᓂᖅ ᐃᓄᒐᓴᒡᔪᐊᓄᑦ ᑲᑉᐱᐊᒋᔭᐅᕗᖅ ᑐᑭᓯᓂᕐᓗᒃᑕᐅᕙᒃᖢᓂᓗ, ᑭᓯᐊᓂ ᑲᑉᐱᐊᓱᒍᓐᓃᖅᐹᓪᓕᓲᑦ ᐃᓄᐃᑦ ᑐᑭᓯᔾᔫᒥᔭᕌᖓᑕ ᐃᓱᒪᒃᑯᑦ ᐋᓐᓂᐊᕈᑎᖃᕐᓂᖅ ᐱᓪᓗᒍ. ᐃᓱᒪᒃᑯᑦ ᐋᓐᓂᐊᕈᑎᖃᕈᕕᑦ, ᖃᐅᔨᒪᔭᕐᓂᒡᓘᓐᓃᑦ, ᑐᓴᒐᒃᓴᑦᑎᐊᕙᒃᑕᖃᖅᐳᖅ: ᐃᓱᒪᒃᑯᑦ ᐋᓐᓂᐊᕈᑕᐅᕙᒃᑐᓕᒫᑦ ᖃᓄᐃᑦᑐᓐᓃᕈᓐᓇᖅᑐᑦ.

 

ᑖᒃᑯᓇᓂ ᐅᖃᐅᓯᐅᔪᓂᒃ, ᖃᐅᔨᓂᐊᖅᐳᑎᑦ ᐃᓚᖏᓐᓂᒃ ᐃᓱᒪᒃᑯᑦ ᐊᓐᓂᐊᓕᕈᑕᐅᒐᔪᒃᑐᓂᒃ – ᑕᐃᔭᐅᖃᑦᑕᕆᓪᓗᓂ ᐃᓱᒪᖃᑦᑎᐊᙱᓐᓂᖅ  –ᑲᒪᒋᔭᐅᔾᔪᑎᖏᓪᓗ.

 

ᓂᑲᓪᓗᖓᓂᖅ

ᓂᑲᓪᓗᖓᓂᖅ ᐊᔾᔨᒋᙱᑕᖓ ᓄᒫᓱᖕᓂᐅᑉ. ᓂᑲᓪᓗᖓᔪᑦ ᐃᒪᓐᓇᐅᒐᔪᖕᒪᑦ ᓄᒫᓱᓗᐊᕐᓂᑯᒧᑦ ᓂᕆᐅᖕᓂᖃᕈᓐᓃᓚᐅᑲᓲᖑᔪᑦ ᖃᓄᑭᐊᖅ ᐊᑯᓂᐅᑎᒋᔪᖅ. ᖃᓄᑐᐃᓐᓇᑦᑎᐊᖅ ᐃᓅᓯᖏᓐᓄᑦ ᐊᒃᑐᕈᑕᐅᔪᓐᓇᖅᑐᖅ, ᐃᒃᐱᒋᔭᓕᒫᖏᑦ ᐊᒃᑐᖅᑕᐅᔪᓐᓇᕆᓪᓗᑎᒃ, ᑎᒥᒃᑯᑦ ᖃᓄᐃᙱᑦᑎᐊᕈᓯᖏᑦ, ᐱᓕᕆᖃᑎᒌᒍᓯᖏᑦ ᐊᒻᒪ ᐃᖅᑲᓇᐃᔮᖏᑦ. ᓂᑲᓪᓗᖓᔪᑦ ᐃᓄᐃᑦ, ᐃᒪᓐᓇᐅᖅᑰᔨᔪᓐᓇᖅᑐᑦ “ᓱᓪᓗᐊᓘᑉ ᐃᓱᐊᓂ ᖃᐅᒪᔪᖃᖅᑰᔨᙱᑦᑎᐊᖅᖢᓂ” — ᓱᓪᓗᐊᓗᖕᒥᒃ ᑕᐅᑐᒍᓐᓇᕐᒪᑕ ᓱᓪᓗᑯᑖᖑᓪᓗᓂ, ᑖᖅᖢᓂᓗ. ᓂᑲᓪᓗᖓᓂᖅ ᐃᓐᓇᑐᐊᕐᓂᒃ ᐊᒃᑐᐃᓲᖑᙱᑦᑐᖅ. ᐊᒃᑐᐃᔪᓐᓇᕐᒥᔪᖅ ᓄᑕᖅᑲᓂᒃ ᒪᒃᑯᒃᑐᓂᒡᓗ. ᐃᓕᓐᓂᐊᕐᕕᖕᒥ ᐊᒃᓱᕈᕐᓇᖅᑐᑦ ᐱᕈᖅᓴᓂᕐᓗ ᐊᔪᕐᓇᖅᑐᖅᓯᐅᕈᑕᐅᔪᓐᓇᖅᑐᑦ ᐊᔪᕐᓇᓈᖅᓯᔾᔪᑕᐅᔪᓐᓇᖅᖢᓂᓗ ᓄᑕᖅᑲᓄᑦ ᖃᓄᐃᙱᓐᓇᓱᒃᑲᓗᐊᖅᖢᑎᒃ. ᓄᑕᖅᑲᑦ ᓂᑲᓪᓗᖓᔪᑦ ᓂᕐᕆᕐᓗᓕᓲᑦ, ᐃᖢᕆᙱᖦᖢᑎᒡᓗ ᐋᓐᓂᐊᖅᖢᑎᒡᓗ, ᐆᒻᒪᕆᒍᓐᓃᖅᖢᑎᒡᓗ. ᐱᓂᖅᓵᓘᖕᒪᓪᓘᓐᓃᑦ ᓄᒫᓱᑐᐃᓐᓇᕐᓂᕐᒥᒃ, ᕿᒃᓵᖕᓂᕐᒥᒡᓗ, ᐅᕝᕙᓘᓐᓃᑦ ᐆᒻᒪᕆᒍᓐᓃᖅᓯᒪᔪᓂᒃ. ᓂᑲᓪᓗᖓᔪᑦ ᓂᕆᐅᖕᓂᖃᕈᓐᓃᓲᑦ ᓯᕗᓂᒃᓴᒥ ᖃᓄᐃᓛᕋᓱᒋᐊᒃᓴᖅ ᐃᓱᒪᔪᓐᓇᕐᒪᑕᓘᓐᓃᑦ ᐃᒻᒥᓃᕈᒪᓪᓗᑎᒃ. ᐃᓄᒐᓴᐃᑦ, ᐃᓛᓐᓂᒃᑯᓪᓗ ᖃᑕᙳᑎᒌᑦ, ᑲᙳᓱᓲᖑᖕᒪᑕ ᓂᑲᓪᓗᖓᓂᑎᒃ ᐱᔾᔪᑎᒋᓪᓗᒍ. ᑕᐃᒪᐃᑦᑕᕆᐊᖃᙱᑦᑎᐊᖅᑐᓯ. ᐳᐃᒍᖅᑕᐃᓕᒋᔅᓯ ᓂᑲᓪᓗᖓᓂᖅ ᐋᓐᓂᐊᕆᔭᐅᒐᔪᖕᓂᖓᓂᒃ. ᐊᒃᑐᐃᔪᓐᓇᖅᑐᖅ ᒪᒃᑯᒃᑐᓂᒃ ᐃᓐᓇᕐᓂᒡᓗ, ᐊᖑᑎᓂᒃ ᐊᕐᓇᓂᒡᓗ, ᓇᓂᒥᐅᑕᐅᒥᐊᕋᓗᐊᖅᐸᑕ, ᖃᓄᑐᐃᓐᓇᑦᑎᐊᕐᓗ ᐊᔪᙱᑦᑎᐊᕋᓗᐊᖅᐸᑕ.  

 

ᖁᕕᐊᑦᑕᓗᐊᒪᔮᖅᐸᒃᑐᑦ ᑲᑕᑳᓪᓚᒃᐸᒃᖢᑎᒡᓗ

ᖁᕕᐊᑦᑕᓗᐊᒪᔮᖅᐸᒃᑐᑦ ᑲᑕᑳᓪᓚᒃᐸᒃᖢᑎᒡᓗ ᐋᓐᓂᐊᕆᔭᐅᓲᖑᕗᖅ ᖃᓄᐃᓐᓂᕆᔭᑎᒃ ᐊᓯᔾᔨᖅᓴᕋᐃᖦᖢᓂ. ᖁᕕᐊᑦᑕᓗᐊᒪᔮᖅᐸᒃᑐᑦ ᑲᑕᑳᓪᓚᒃᐸᒃᖢᑎᒡᓗ “ᖁᕕᐊᓱᓗᐊᒪᔮᕌᓪᓚᓚᐅᖅᖢᑎᒃ” ᐆᒻᒪᕆᒃᓯᑦᑎᐊᖅᖢᑎᒃ ᐱᓕᕆᔪᒻᒪᕆᐊᓘᓕᖅᖢᑎᒃ ᑲᑕᑳᓪᓚᒃᐸᒃᖢᑎᒃ ᓄᒫᑦᑕᓗᐊᕐᓂᑯᒧᑦ ᖃᓄᐃᓕᐅᕆᐊᒃᓴᖅ ᓱᕙᓕᑭᐊᖅᓴᑦᑎᐊᓕᕈᓐᓇᖅᑐᑦ. ᖃᐅᔨᒪᔭᐅᖕᒥᔪᖅ “ᖁᕕᐊᑦᑕᓗᐊᒪᔮᖅᐸᒃᖢᑎᒃ ᐋᓐᓂᐊᕈᑎᓖᑦ.” ᑖᓐᓇ ᐊᓐᓂᐊᕈᑕᐅᓲᖅ ᐱᕐᔪᐊᖑᓗᐊᕐᓂᑯᒧᑦ ᑕᐃᒪᐃᑦᑐᑦ ᐃᖅᑲᓇᐃᔭᕐᕕᖕᒥᓂᒃ ᐱᓕᕆᑦᑎᐊᕈᓐᓇᐃᓪᓕᓲᑦ, ᐅᕝᕙᓘᓐᓃᑦ ᐃᓅᓯᕐᒥᓂᒃ ᑲᒪᑦᑎᐊᕈᓐᓃᓲᑦ.

 

100 ᐃᓄᖕᓂᒃ ᐊᑕᐅᓯᖅ ᐃᓄᒃ ᑕᐃᒪᓐᓇ ᐋᓐᓂᐊᖃᓲᖑᕗᖅ. ᐱᒻᒪᕆᐅᕗᖅ ᖃᐅᔨᒪᔭᕆᐊᒃᓴᖅ ᐃᕝᕕᑐᐊᖑᙱᓐᓇᕕᑦ. ᐊᓯᖕᓄᑦ ᐅᖃᓪᓚᖃᑎᖃᖃᑦᑕᕈᕕᑦ ᖁᕕᐊᑦᑕᓗᐊᒪᔮᖅᐸᒃᖢᑎᒃ ᑲᑕᑳᓪᓚᒃᐸᒃᖢᑎᒡᓗ ᐃᓅᓯᓕᖕᓂᒃ ᐃᑲᔫᑎᒋᔪᓐᓇᖅᑕᑦ ᐃᓅᓯᑦᑎᐊᕙᖃᓕᕈᓐᓇᓛᕐᓂᕐᓂᒃ ᖃᑯᒍᒃᑲᓐᓂᑭᐊᖅ ᖃᖓᑐᐃᓐᓇᑦᑎᐊᖅ. ᐃᑲᔪᖅᑕᐅᖃᑦᑕᕈᕕᑦ ᐊᑲᐅᓂᖅᓴᒧᑦ ᑐᕌᖓᓂᖅᓴᐅᔪᓐᓇᖅᐳᑎᑦ.

 

ᓯᕘᕋᓂᖅ ᐊᒻᒪ ᐅᐃᒻᒪᒃᓴᕋᐃᓐᓂᖅ

ᐱᖏᒐᒃᖢᓂ ᐅᕝᕙᓘᓐᓃᑦ ᖁᒃᓴᓱᒃᖢᓂ ᐃᓅᓯᑦᑎᓐᓂ ᐊᑐᖅᑕᐅᒐᔪᖕᒪᑦ ᐃᓅᓯᑦᑎᓐᓃᖃᑕᐅᖕᒪᑦ. ᑭᒃᑯᓕᒫᑦᑎᐊᑦ ᓯᕘᕋᓕᕈᓐᓇᖅᑐᑦ ᖃᖓᙳᕌᖓᑦ. ᓯᕘᕋᒐᓛᑐᐃᓐᓇᕋᓗᐊᕈᕕᑦ ᐱᓕᕆᐊᕆᔭᕐᓂᒃ ᐅᔾᔨᕈᓱᑦᑎᐊᕐᓂᖅᓴᐅᔪᓐᓇᖅᐳᑎᑦ, ᐆᒻᒪᕆᒍᓯᕐᓂᒃ, ᐊᒻᒪ ᐱᔪᒃᓯᔾᔪᓯᕐᓂᒃ. ᑭᓯᐊᓂ ᓯᕘᕋᕐᔪᐊᕈᕕᑦ, ᐃᒃᐱᒍᓱᒍᓐᓇᖅᐳᑎᑦ ᐊᔪᖅᑰᔨᓕᕐᓗᑎᑦ, ᓇᓗᓕᕐᓗᑎᑦ, ᐱᖏᒐᒃᑐᒻᒪᕆᐊᓘᓕᕐᓗᑎᓪᓗ ᐱᓕᕆᐊᖑᔫᑉ ᐱᓗᐊᔮᓕᖅᑎᓪᓗᒍ ᐊᓯᖕᓄᑦ ᑕᐅᑐᒃᑕᐅᓗᓂ ᑕᐃᒪᓐᓇᐅᓗᐊᖅᑰᔨᒋᔭᐅᙱᒃᑲᓗᐊᕐᓗᓂ. ᓯᕘᕋᕐᔪᐊᕐᓇᖅ ᐊᒃᑐᐃᔪᓐᓇᖅᑐᖅ ᖃᐅᑕᒫᑦ ᐃᓅᓯᑦᑎᓐᓄᑦ ᓈᒻᒪᙱᑦᑐᖅ ᑎᒥᒃᑯᑦ ᐃᓱᒪᒃᑯᓪᓗ ᐊᒃᑐᐃᔾᔪᑕᐅᔪᓐᓇᕐᒪᑦ.

 

ᑎᒥᒃᑯᑦ ᐊᒃᑐᖅᑕᐅᔪᑦ “ᓯᕘᕋᓕᕌᖓᑕ” ᒪᑯᐊᖑᔪᓐᓇᖅᐳᑦ:

 

·       ᐆᓕᒃᑐᐊᓘᓕᖅᖢᑎᒃ ᓴᔪᒃᓱᓕᖅᖢᑎᒡᓘᓐᓃᑦ.

·       ᑐᖅᑯᔮᖏᑦᑎᒍᑦ ᓴᒡᕕᖏᑦᑎᒍᓪᓘᓐᓃᑦ ᑐᐱᓯᒪᖅᑰᔨᓕᖅᖢᑎᒃ.

·       ᐊᓂᖅᓵᖅᑐᒡᒐᓕᖅᖢᑎᒃ ᐅᕝᕙᓘᓐᓃᑦ ᑎᒡᓕᕐᓂᖏᑦ ᓱᒃᑲᓴᓗᐊᓕᖅᖢᑎᒃ.

·       ᐃᔾᔭᙳᖅᑰᔨᓪᓗᑎᒃ ᓂᐊᖁᖏᑦᑎᒍᓪᓘᓐᓃᑦ ᐅᐃᔾᔮᖅᑰᔨᓕᖅᖢᑎᒃ.

·       ᐊᐅᒪᔮᓕᖅᖢᑎᒃ ᕿᐅᖅᑰᔨᓕᖅᖢᑎᒡᓘᓐᓃᑦ, ᐊᒡᒐᖏᓪᓗ ᑭᐊᒃᑎᓯᒪᓪᓗᑎᒃ.

·       ᖁᒃᓴᓪᓚᒃᓴᐃᕋᐃᓕᓲᑦ.

·       ᓄᑭᖏᑦ ᓱᑲᖓᓕᓲᑦ, ᓴᐅᓂᙳᓕᖅᖢᑎᒃ, ᐅᕝᕙᓘᓐᓃᑦ ᒪᐃᓕᖅᖢᑎᒃ.

·       ᑕᖃᓯᒪᕐᔪᐊᓕᓲᑦ.

·       ᓯᓂᒍᓐᓇᐃᓪᓕᑲᑕᓲᑦ.

 

ᓯᕘᕋᓕᕌᖓᑕ ᐃᓱᒪᐅᑉ ᐃᓚᖓᓂᒃ ᐊᒃᑐᐃᓲᖑᕗᖅ ᐅᖃᓪᓚᖃᑎᖃᕋᓱᒃᑲᓗᐊᖅᖢᓂ ᑕᒻᒪᖅᑕᓕᕈᑕᐅᔪᓐᓇᕐᒪᑦ. ᑕᐃᒪᓐᓇᐃᓕᖓᓪᓗᓂ ᐊᔪᕐᓇᕐᓂᖅᓴᐅᓲᖑᕗᖅ ᐃᒃᐱᒋᔭᒥᒃ ᐊᐅᓚᑦᑎᑦᑎᐊᕋᓱᒋᐊᒃᓴᖅ ᐃᓅᖃᑎᒋᔭᒧᑦ. ᕿᐊᓴᕋᐃᓕᖅᑐᑦ ᓯᕘᕋᓕᕌᖓᑕ ᐃᒪᐃᓕᖓᓕᖅᐸᒃᐳᑦ:

 

·       ᓄᖅᑲᖓᔪᓐᓇᐃᓪᓕᓪᓗᑎᒃ, ᓂᙵᒃᓴᕋᐃᓕᖅᖢᑎᒃ, ᓲᖑᓴᓕᖅᖢᑎᒃ ᐅᕝᕙᓘᓐᓃᑦ ᓯᕘᕋᓕᖅᖢᑎᒃ.

·       ᐃᓱᒫᓗᒃᑐᐊᓘᓕᖅᖢᑎᒃ.

·       ᓯᕘᕋᔪᐊᓘᓕᖅᖢᑎᒃ ᐱᐅᙱᑦᑐᒥᒃ ᓴᖅᑭᑦᑐᖃᕐᓂᐊᕋᓱᒋᓐᓈᓕᖅᖢᑎᒃ; ᑲᑕᒃᓯᒪᔪᐊᓘᓕᖅᖢᑎᒃ.

·       ᐃᓱᒪᑦᑎᐊᕈᓐᓇᐃᓪᓕᓪᓗᑎᒃ; ᐃᓱᒪᒋᔭᒃᓴᖃᖅᑰᔨᔪᓐᓃᖅᖢᑎᒃ.

 

“ᑕᕝᕙᙵᔅᓴᐃᓐᓇᖅ ᐅᐃᒪᔭᓕᓲᑦ” ᓂᕆᐅᒋᙱᑕᒃᑯᑦ ᓴᖅᑭᑦᑐᓐᓇᖅᐳᖅ, ᑲᑉᐱᐊᓱᓕᖅᖢᑎᒃ ᐅᕝᕙᓘᓐᓃᑦ ᓯᕘᕋᓕᖅᖢᑎᒃ ᐊᓂᖅᓵᑐᕋᓗᐊᖅᖢᑎᒃ ᐊᓂᕐᓂᑭᓕᖅᖢᑎᒃ ᐅᐃᔾᔭᙳᓕᖅᖢᑎᒡᓘᓐᓃᑦ ᐅᕝᕙᓘᓐᓃᑦ ᑎᒡᓕᕐᓂᖏᑦ ᓱᒃᑲᓴᓕᖅᖢᑎᒃ. ᐃᓚᖏᑦ ᐃᓄᐃᑦ ᐅᒃᐱᕈᓱᓲᖑᓪᓗᑎᒃ ᐆᒻᒪᓯᕆᓇᓱᒋᓪᓗᑎᒃ ᑐᖁᓂᐊᕋᓱᒋᓕᖅᖢᑎᒡᓗ. ᑕᕝᕙᙵᔅᓴᐃᓐᓇᖅ ᐅᐃᒪᔭᓕᖅᑐᑦ 5 ᒥᓂᑦ-ᒥ 20 ᒥᓂᑦ-ᒧᑦ ᐊᑯᓂᐅᑎᒋᒐᔪᒃᐳᖅ. ᑭᓯᐊᓂᑦᑕᐅᖅ ᐊᑯᓂᐅᓂᖅᓴᖅ ᑕᐃᒪᐃᑦᑐᓐᓇᕐᒥᔪᑦ, ᐃᑲᕐᕋᒐᓵᕐᔪᖕᓄᑦ ᑎᑭᓪᓗᒍ. ᐅᐃᒪᔭᓕᓵᖅᑲᐅᑎᓪᓗᒋᑦ 10 ᒥᓂᑦ-ᒥᒃ ᓯᕘᕋᔪᐊᓘᓚᐅᑲᓲᑦ. ᑕᐃᒪᐃᒐᔪᒃᑐᑦ, ᑕᐃᔭᐅᓲᖑᕗᑦ ᐅᐃᒻᒪᒃᓴᕋᐃᓐᓂᕐᒥᒃ ᐋᓐᓂᐊᕈᑎᖃᕐᓂᕋᖅᑕᐅᓪᓗᑎᒃ. 

 

ᑐᓵᔭᒐᖃᓲᑦ

ᑐᓵᔭᒐᖃᓲᑦ ᐋᓐᓂᐊᖃᓲᖑᕗᑦ ᐃᓱᒪᑦᑎᐊᕈᓐᓇᐃᓪᓕᔾᔪᑎᒋᓪᓗᒍ, ᐊᓯᒥᓂᒃ ᐱᓕᕆᖃᑎᖃᕈᓐᓇᐃᓪᓕᓲᑦ ᐃᒃᐱᒋᔭᒥᓂᒡᓗ ᐊᐅᓚᑦᑎᔪᓐᓇᐃᓪᓕᓲᑦ. ᐃᓄᖕᓂᒃ ᖃᓄᑐᐃᓐᓈᓗᒃ ᐊᒃᑐᐃᔪᓐᓇᖅᑐᖅ. ᐊᓯᖏᓪᓗ ᐃᓄᐃᑦ ᖃᐅᔨᔭᕌᖓᑕ ᑐᓵᔭᒐᖃᖅᑐᓂᒃ ᑐᓵᔭᒐᖃᖅᑐᓄᑦ  ᖃᐅᔨᔾᔪᑕᐅᔪᓐᓇᖅᐳᖅ ᑐᓵᔭᒐᖃᕐᓂᖅ ᐃᒻᒥᒧᑦ ᖃᓄᖅ ᐊᒃᑐᐃᑎᒋᔪᓐᓇᕐᒪᖔᑦ. ᖃᓄᐃᓕᐅᕈᓯᖏᑦ ᑐᓵᔭᒐᖃᖅᑐᒧᑦ ᐊᔪᕐᓇᙱᓕᖅᐹᓪᓕᕈᓐᓇᖅᑐᑦ ᐊᔪᕐᓇᖅᓯᕚᓪᓕᕈᓐᓇᖅᑐᓪᓘᓐᓃᑦ ᖃᓄᐃᓕᐅᖅᐸᒡᓗᓂ ᑲᒪᒋᔭᕆᐊᒃᓴᖅ.

 

ᑐᓵᔭᒐᖃᖅᑐᑦ ᐃᒪᐃᓲᖑᕗᑦ:

 

·       ᑐᓵᓲᖑᕗᑦ ᐃᓛᓐᓂᒃᑯᓪᓗ ᑕᑯᓲᖑᕗᑦ ᑕᑯᔭᐅᔪᓐᓇᙱᑦᑐᓂᒃ ᐊᓯᒥᓄᑦ.

·       ᐅᒃᐱᕈᓱᓕᕈᓐᓇᖅᐳᑦ ᐊᓯᖏᑦᑕ ᖃᐅᔨᒪᔭᖏᓐᓂᒃ ᓱᓕᙱᑦᑐᓂᒃ.

·       ᐃᓱᒪᑐᐃᓐᓇᕆᐊᖃᓲᑦ ᐊᓯᖏᓐᓄᑦ ᐃᓄᖕᓄᑦ ᐋᓐᓂᖅᑕᐅᓂᐊᕋᓱᒋᓪᓗᑎᒃ.

 

ᑲᒪᒋᔭᐅᖃᑦᑕᑐᐊᖅᐸᑕ, ᑐᑭᓯᔪᓐᓇᖅᑐᑦ ᑕᒪᒃᑯᐊ ᖃᐅᔨᖃᑦᑕᖅᓯᒪᔭᖏᑦ ᐱᓪᓚᑦᑖᙱᓐᓂᖏᓐᓂᒃ ᑭᓯᐊᓂ ᐃᓱᒪᖏᓐᓃᓐᓂᖏᓐᓄᑦ ᓈᒻᒪᙱᓕᐅᕈᑕᐅᓕᖅᐸᖕᓂᖏᓐᓂᒃ. ᐊᔾᔨᒌᙱᕈᓘᔭᖅᑐᓂᒃ ᑐᓵᔭᒐᖃᖅᑐᑦ ᐊᖅᑯᓵᖅᓯᕈᓘᔭᖅᐸᒃᑐᑦ. ᑐᓵᔭᒐᖃᖅᑐᓂᒃ ᐊᑐᖅᑕᐅᓂᖅᐹᖑᓲᖅ ᐅᑭᔨᖓᓪᓗᑎᒃ ᐊᐃᓐᓈᕈᓱᓕᖅᖢᑎᒃ ᐱᓕᕆᓇᓱᒋᐊᒃᓴᖅ, ᑕᐃᒪᐃᓕᖓᔪᑦ ᐃᓱᒪᓕᓲᖑᕗᑦ ᑲᑉᐱᐊᓇᖅᑐᓂᒃ, ᐅᒃᐱᕈᓱᓕᓲᖑᓪᓗᑎᒃ ᐃᓄᖕᓂᒃ ᐱᖁᑎᓂᒡᓘᓐᓃᑦ ᐋᓐᓂᖅᑕᐅᓂᐊᕋᓱᒋᓪᓗᑎᒃ, ᑐᓵᔭᒐᖃᓕᖅᐸᒃᖢᑎᒡᓗ.